თბილისის მერის განცხადებით, ღია კაფეები მუნიციპალური საიჯარო გადასახადისგან 1-ელ იანვრამდე გათავისუფლდებიან.  ამის შესახებ თბილისის მერმა კახა კალაძემ დედაქალაქის მთავრობის სხდომის დაწყებამდე განაცხადა.

„პანდემიამ სერიოზული პრობლემები შექმნა ქვეყანაში ეკონომიკური განვითარების თვალსაზრისით, პრობლემები შეუქმნა ბიზნესსექტორს, მცირე და საშუალო ბიზნესი განსაკუთრებით დაზიანდა. ჩვენ ბევრი კარგი გადაწყვეტილება მივიღეთ მხარდაჭერის თვალსაზრისით, რათა ჩვენი შესაძლებლობის ფარგლებში მაქსიმალურად დავხმარებოდით სხვადასხვა დარგის წარმომადგენლებს. მათ შორის იყო ღია კაფეები, რომლებსაც მუნიციპალური სერვისები იჯარით ჰქონდათ აღებული. მათ მიეცათ შეღავათი, მუნიციპალიტეტისთვის გადასახდელი იჯარისგან გათავისუფლებულიყვნენ. აღნიშნული შეღავათი მოქმედებდა მიმდინარე წლის პირველ თებერვლამდე, მაგრამ ვინაიდან ძალაში რჩება გარკვეული ტიპის შეზღუდვები, ქვეყანაში ჯერ კიდევ არის მძიმე ეკონომიკური მდგომარეობა და არ არის გახსნილი მთლიანად, არის ტურისტების ნაკლებობაც, მივიღეთ გადაწყვეტილება, რომ შეღავათი კიდევ გავავრცელოთ იმ სუბიექტებზე, რომლებსაც აქვთ ღია კაფეები. ასეთი 200-მდე სუბიექტია და ისინი 2022 წლის პირველ იანვრამდე გათავისუფლდებიან მერიისთვის გადასახდელი საიჯარო საფასურისგან. ვფიქრობ, ეს გარკვეული მხარდაჭერა და თანადგომა იქნება ჩვენი მხრიდან ამ ბიზნესისადმი“, -განაცხადა კახა კალაძემ.

მისივე თქმით, პანდემიის გამო დაზარალებული ბავშვთა გასართობი ცენტრები დედაქალაქის ბიუჯეტიდან ხუთი ათას ლარს მიიღებენ.

„ამ რთულ ვითარებაში მხარდაჭერა ძალიან მნიშვნელოვანია. სექტორი, რომელიც ძალიან დაზარალდა პანდემიის დროს არის ბავშვთა გასართობი ცენტრები. ბავშვთა დღის ცენტრები ყველაზე ადრე დაიხურნენ ამ პანდემიის განმავლობაში და მუშაობა დაახლოებით, ერთი წლის შემდეგ დაიწყეს. ჩვენ გვინდა ფინანსური დახმარება აღმოვუჩინოთ მათაც და დავეხმაროთ 5 ათას-5 ათასი ლარით. სუბსიდიას მიიღებს ყველა ის ბიზნესსუბიექტი, რომელიც რეგისტრირებული 2020 წლის 28 ნოემბრამდე და დღემდე არ არის ლიკვიდირებული. მათ მაქსიმალურად ექნებათ მხარდაჭერა. განცხადებების მიღება დაიწყება 2 ივნისიდან და გაგრძელდება 10 ივნისამდე. პროგრამაში მონაწილეობისა და ფინანსური დახმარების მისაღებად ორგანიზაციების წარმომადგენლებმა თბილისის მერიაში უნდა შემოიტანონ განცხადება. ასევე, თბილისის მერიის ვეგბვერდზე იქნება მითითებული დეტალები და ამ პროგრამის ფარგლებში დახმარებას მიიღებს 70-მდე ობიექტი და დაახლოებით, 350 ათას ლარამდე დაიხარჯება ამ მიმართულებით“, – განაცხადა კალაძემ.