გერმანიაში საქართველოს მოქალაქეების ლეგალური სეზონური დასაქმების პროგრამა გაგრძელდება. დასაქმების ხელშეწყობის სახელმწიფო სააგენტოს ინფორმაციით, გერმანულ მხარესთან არსებულ შეთანხმებათა განხორციელება შეუფერხებლად მიმდინარეობს და ქვეყანამ უკვე მიიღო პოზიტიური გამოცდილება.
,,გერმანიის ფედერაციულ რესპუბლიკასთან არსებული შეთანხმების ფარგლებში გამოიკვეთა ისეთი დამსაქმებლები, სადაც უკვე საქართველოს მოქალაქეთა რამდენიმე ჯგუფი მუშაობს და შრომით ურთიერთობაში მყოფი ორივე მხარე კმაყოფილია. დაბრუნებულმა საქართველოს მოქალაქეებმა კი სამშობლოში ჩამოიტანეს თავიანთი დანაზოგი, გამოცდილება, რომელსაც ცხადია გამოიყენებენ შეხედულებისამებრ. დაბრუნებული მოქალაქეების გამოკითხვისას ნაწილი გამოთქვამს სურვილს, მომავალ წელს ისევ ჩაერთოს აღნიშნულ პროგრამაში. რასაკვირველია, კორონავირუსის პანდემიამ გავლენა მოახდინა პროგრამის მიმდინარეობაზე. აღსანიშნავია, რომ გარკვეულწილად, არსებულმა ვითარებამ შეამცირა მოთხოვნა გერმანელ დამსაქმებელთა მხრიდან უცხოურ სამუშაო ძალაზე, თუმცა პროგრამა მიმდინარეობს ისე, რომ გათვალისწინებულია სამივე მხარის (გამგზავნი, მიმღები ქვეყნები და პროგრამით მოსარგებლე საქართველოს მოქალაქე) ინტერესი და არსებული ეპიდემიოლოგიური ვითარება“, - განმარტავენ უწყებაში.
პანდემიური ვითარებიდან გამომდინარე, როგორც უწყებაში აღნიშნავენ, დამსაქმებელთა მხრიდან ასევე ხდება შეთანხმების ფარგლებში დასაქმებული საქართველოს მოქალაქეების ტესტირება, გერმანიის ფედერაციულ რესპუბლიკაში არსებული რეგულაციების მიხედვით.
პროექტის მიზანია ასევე მოხდეს ქვეყნიდან არალეგალური მიგრაციის პრევენცია და მოქალაქეები აღარ მიემგზავრებოდნენ საზღვარგარეთ ხანგრძლივი ვადით ან მუდმივად.
რაც შეეხება კონკრეტულ შემთხვევას, რომელიც გერმანიაში დასაქმებული მოქალაქეების შრომის უფლებების დარღვევას ეხება, დასაქმების ხელშეწყობის სახელმწიფო სააგენტოს ინფორმაციით, ყოველდღიური კონტაქტი აქვთ გამგზავრებულ პირებთან და ამ დრომდე, დამსაქმებლის მხრიდან კონტრაქტით გათვალისწინებული პირობების შეუსრულებლობის ფაქტი მხოლოდ ერთი ჯგუფის შემთხვევაში დაფიქსირდა, სხვა ჯგუფის წევრთა უმრავლესობა კი საქართველოში ბრუნდება კონტრაქტით გათვალისწინებული ვადის ამოწურვის შემდგომ, დამატებითი ფინანსური რესურსით და გამოცდილებით.
ცნობისთვის, 2021 წლის აპრილიდან 2021 წლის 13 სექტემბრამდე გერმანიის ფედერაციულ რესპუბლიკაში სეზონურ სამუშაოზე სახელმწიფოთაშორისი შეთანხმებით საქართველოს 211-მა მოქალაქემ ისარგებლა.
შეგახსენებთ, რომ გერმანიაში სეზონური დასაქმების პროგრამით მომუშავე საქართველოს მოქალაქეების ერთი ჯგუფი, რომლებიც დამსაქმებლის მხრიდან ვალდებულებების შეუსრულებლობის გამო სამშობლოში დროზე ადრე დაბრუნდნენ, სახელმწიფოსგან 18 000 ლარის გადახდას ითხოვენ. აქედან 3 000 ლარი მორალური ზიანის საკომპენსაციოდ, 15 000 ლარი კი ის თანხაა, რომელიც მათ, წესით, საქართველოში უნდა ჩამოეტანათ.
მარი ჩიტაია