გერმანიაში 2 ნოემბრიდან ეპიდემიის გავრცელების საწინააღმდეგო ახალი შეზღუდვები ამოქმედდება. ამის შესახებ ინფორმაცია მოსახლეობას ქვეყნის კანცლერმა ანგელა მერკელმა რეგიონების ლიდერებთან კონსულტაციების შემდეგ მიაწოდა.
„დოიჩე ველეს“ ინფორმაციით, ნაწილობრივი კარანტინის პირობებში, რომელიც მინიმუმ ერთ თვეს გასტანს, დაიხურება რესტორნები და ბარები, გარდა გატანის მომსახურებისა, კვლავ გაუქმდება მსხვილი ღონისძიებები, შეზღუდვა დაწესდება ნაკლებად აუცილებელ მიმოსვლაზე, აიკრძალება სასტუმროებში ღამის გათენება, გარდა გადაუდებელი სიტუაციებისა, შესაძლებლობის შემთხვევაში ყველამ სახლიდან უნდა იმუშაოს. საჯაროდ შეხვედრებზეც წესდება შეზღუდვა და იკრძალება ორ ოჯახზე მეტის შეკრება, შეკრებილთა რიცხვი კი 10-ს არ უნდა აღემატებოდეს. იზღუდება გასართობი დაწესებულებების ფუნქციონირებაც, დაიკეტება თეატრები და კინოდარბაზები. დაიხურება საცურაო აუზები, სპორტდარბაზები და საუნები.
რაც შეეხება სკოლებს და საბავშვო ბაღებს, ისინი ღია რჩება. კვლავ შესაძლებელი იქნება რელიგიური ღვთისმსახურებებისა და საპროტესტო აქციების გამართვა. მოხუცთა თავშესაფრებში დაშვებული იქნება მნახველების მიღება. ღია რჩება მაღაზიებიც.
„ჩვენ ვართ ძალიან სერიოზულ ვითარებაში. ჩვენ ახლა უნდა ვიმოქმედოთ, რათა თავიდან ავიცილოთ მწვავე საგანგებო ჯანდაცვითი ვითარება ეროვნულ დონეზე. თუკი ინფექცია ამ ტემპებით გავრცელდება, ჩვენ მივალთ ჯანდაცვითი სისტემის შესაძლებლობების ზღვარზე“ , - აღნიშნა მერკელმა პრესკონფერენციაზე.
მერკელის განცხადებით, რეანიმაციაში მყოფი პაციენტების რიცხვი ბოლო ათ დღეში გაორმაგდა, ხოლო ინფიცირების 75% შემთხვევაში დაავადების გავრცელების წყარო დაუდგენელია. ორ კვირაში ხელისუფლების წარმომადგენლები, ცენტრალურ და რეგიონულ დონეზე, კვლავ შეხვდებიან, რათა შეაფასონ, საკმარისად ეფექტურია თუ არა ახალი ზომები.
აქვე მერკელი ბიზნესებს დაჰპირდა, რომ ახალი ზომების შედეგად დაზარალებული კომპანიები ეკონომიკურ მხარდაჭერას მიიღებენ.
IPN.GE