გერმანიის მთავრობა მოქალაქეებს აფრთხილებს, რომ 31 აგვისტომდე თავი შეიკავონ ევროკავშირის ქვეყნების მიღმა მოგზაურობისგან. ეს ნიშნავს, რომ გერმანელებს ამ დრომდე შეეზღუდათ ვიზიტები მსოფლიოს 160-ზე მეტ ქვეყანაში.
გერმანიის სამთავრობო კაბინეტის ეს გაფრთხილება მსოფლიო ვიზიტების შესახებ 10 ივნისის სხდომაზე გაჟღერდა და მიზნად მიმდინარე კორონავირუსის პანდემიის პრევენციას ისახავდა.
აღსანიშნავია, რომ ეს აკრძალვა ე.წ. მესამე ქვეყნების მიმართ, რომლებიც გარკვეულ კრიტერიუმებს აკმაყოფილებენ, შეიძლება მოიხსნას. თუ ქვეყანაში მცირეა დაინფიცირების მაჩვენებელი, მუშაობს ჯანდაცვის ეფექტური სისტემა, ჰიგიენის წესები ეფექტურადაა დანერგილი და ტესტირების ჩატარების მაღალი სტანდარტებია. გერმანიის მთავრობამ დაჟინებით მოითხოვა კრუიზების აკრძალვაც, რადგან დასაწყისიდანვე საზღვაო ხომალდებზე პანდემიის გავრცელების მაჩვენებელი მაღალი იყო.
გერმანიის საგარეო საქმეთა მინისტრმა ჰეიკო მაასმა ტურისტული მოგზაურობების კონტროლის მიმართულებით უპრეცედენტო ნაბიჯები გადადგა ჯერ კიდევ 17 მარტს, რაც ივნისის შუა რიცხვებამდე გაგრძელდა.
გასულ კვირას, კაბინეტმა გადაწყვიტა, რომ გერმანელებისთვის 31 ევროპულ ქვეყანაში ვიზიტების აკრძალვა გაეუქმებინა. ეს მოიცავს გერმანიის 26 პარტნიორ ქვეყანას ევროკავშირში, დიდ ბრიტანეთს, რომელმაც ცოტა ხნის წინ დატოვა ევროკავშირი და ოთხი ქვეყანა „შენგენის ზონიდან“ - ისლანდია, ნორვეგია, შვეიცარია და ლიხტენშტეინი.
ჩამოთვლილ 29 ქვეყანაში ვიზიტების აკრძალვას გერმანია ორშაბათს, 15 ივნისს გააუქმებს. თუმცა ესპანეთისა და ნორვეგიის შემთხვევაში, ეს ოდნავ მოგვიანებით მოხდება, რადგან აქ ჯერ კიდევ მოქმედებს შემოსვლასთან დაკავშირებული ბარიერები.
მკაცრი გაფრთხილება გერმანიისგან ჩანაცვლდება დეტალური სამოგზაურო რეკომენდაციებით თითოეული ქვეყნისთვის.
ექსპერტები აღნიშნავენ, რომ მოგზაურობის აკრძალვა პოპულარულად სამოგზაურო ქვეყნებისთვის, როგორებიცაა თურქეთი, ეგვიპტე, ტუნისი - მძიმე ეკონომიკური შედეგების მომტანი იქნება.
„თავისუფალი დემოკრატების“ წარმომადგენელმა მარსელ კლინგემ გააკრიტიკა ეს აკრძალვა და მას „ გერმანიის ტურისტული ინდუსტრიისთვის სასიკვდილო დარტყმა“ უწოდა.
პოპულარულ ტურისტულ მიმართულებებს, როგორიცაა თურქეთი, ძალიან სჭირდებათ გერმანელი ტურისტები. თურქეთის პრეზიდენტს რეჯეფ თაიპ ერდოღანს ამ საკითხის ანგელა მერკელთან განხილვა სატელეფონო საუბარში სურს.
ამასთან, ესპანეთმა გერმანელი ტურისტებისთვის აკრძალვა შეამსუბუქა. ბალეარის კუნძულები კი 10 900-ამდე გერმანელს შემოსვლის ნებას აძლევს.თავის მხრივ, ესპანეთი უცხოელი ვიზიტორებისთვის საზღვრების გახსნას 1 ივლისს გეგმავს.
Thelocal.ge
მოამზადა მარიამ მორგოშიამ