ოფიციალური პარიზი, ბერლინი და რომი სანქციებით პირველად დაემუქრა იმ ქვეყნებს, რომელიც დაარღვევენ გაეროს ემბარგოს ლიბიისთვის იარაღის მიწოდებაზე, - ინფორმაციას Reuters-ი ავრცელებს.
საფრანგეთის პრეზიდენტი, ემანუელ მაკრონი, გერმანიის კანცლერი, ანგელა მერკელი და იტალიის პრემიერ-მინისტრი, ჯუზეპე კონტე მოუწოდებენ „ყველა ჩართულ მხარეს, შეწყვიტონ ჩარევა და სრულად სცენ პატივი გაეროს უსაფრთხოების საბჭოს მიერ დადგენილ ემბარგოს იარაღის მიწოდების შესახებ“. ამის შესახებ აღნიშნულია სამი ქვეყნის ლიდერების განცხადებაში, რომელიც ბრიუსელის სამიტის მსვლელობისას მომზადდა.
„ჩვენ მზად ვართ, განვიხილოთ სანქციების შესაძლო გამოყენება, თუკი გაგრძელდება ემბარგოს პირობების დარღვევა ზღვაზე, ხმელეთზე ან ჰაერში. ველით საგარეო ურთიერთობებისა და უსაფრთხოების პოლიტიკის საკითხებში ევროკავშირის უმაღლესი წარმომადგენლობის წინადადებას“ - აღნიშნულია განცხადებაში.
ბოლო რამდენიმე კვირაა, თურქეთი საჰაერო დახმარებას უწევს, იარაღით ამარაგებს და სირიელ მოკავშირეთა მებრძოლებით ეხმარება საერთაშორისო საზოგადოების მიერ აღიარებულ ლიბიის მთავრობას, რომელიც ერთი წელია, ხალიფა ჰაფტარისა და მისი ჯარის მომხრეთა მოგერიებას ცდილობს.
23 ივნისს ემანუელ მაკრონმა განაცხადა, რომ თურქეთი ლიბიაში სახიფათო თამაშს თამაშობს. მის განცხადებას თურქეთის საგარეო უწყება ასე გამოეხმაურა: „ლიბიასთან დაკავშირებით, ემანუელ მაკრონის განცხადება გონების დაბინდვით შეიძლება აიხსნას“.
2011 წელს მუამარ კადაფის გადაყენების შემდეგ, ლიბიაში ორმმართველობა ჩამოყალიბდა. ტრიპოლი და ქვეყნის დასავლეთ მხარე ხელისუფლების კონტროლის ქვეშაა, რომელსაც მხარს უჭერს გაერო. აღმოსავლეთ ნაწილი და სამხრეთი 2014 წელს არჩეული „ტობრუკეს“ მთავრობის კონტროლის ქვეშაა, რომელიც ხალიფა ჰაფტარის და მისი ჯარის მომხრეა.
Imedinews