საინვესტიციო კომპანია “საქართველოს კაპიტალმა” მასში შემავალი ბიზნესების ნაწილი ეტაპობრივად გაყიდვის გადაწყვეტილება მიიღო.  ამის შესახებ კომპანიის წლიური ანგარიშიდან ირკვევა, რომელიც ინვესტორებისთვის მომზადდა. დოკუმენტის თანახმად, გასაყიდ სეგმენტებს შორის მოხვდა საოფისე და ტურისტული უძრავი ქონების ბიზნესი, ასევე “ჯორჯიან ბევერეჯის ჰოლდინგი”, რომელიც “თელიანი ველსა” და ლუდის მწარმოებელს აერთიანებს, ასევე ტექდათვალიერების ქსელი “გრინვეი” და სხვა კომპანიები.

თუმცა, როგორც” კომერსანტს” კომპანია გრინვეის გენერალური დირექტორი ვახტანგ ებიტაშვილი უყვება, ტექდათვალიერების ქსელის გაყიდვას საინვესტიციო კომპანია უახლოეს მომავალში არ გეგმავს.

“ინფორმაცია კომპანია გრინვეის გაყიდვის თაობაზე სიმართლეს არ შეესაბამება და მეტიც, ხაზგასმით განვაცხადებ, როგორც გენერალური დირექტორი, რომ გაყიდვა არ გეგმება არც ამ ეტაპზე, არც უახლოეს მომავალში” _ ამბობს ვახტანგ ებიტაშვილი.

გრინვეის ტექდათვალიერების სერვისი 2020 წელს 252 ათას ავტომობილს მოემსახურა, რაც 2019 წელთან შედარებით 26%-ით შემცირდა.

“კომპანია გრინვეი ბაზარზე  უკვე 2 წელიწადზე მეტია რაც წარმოდგენილია.  თბილისში 11 სერვისცენტრი გვაქვს, ჯამში  სულ 16 ობიექტი გამოგვდის და მთელი საქართველოს მასშტაბით ვოპერირებთ.

2019 წელთან შედარებით, საკმაოდ დიდი ვარდნა გვქონდა და ეს პანდემიის პირდაპირი ზეგავლენაა. საუბარი მაქვს მოგების 26 პროცენტიან შემცირებზე.  ჩვენს ხელთ არსებული ინფორმაციით, დაახლოებით იგივე ვარდნა აქვს ტექინსპექტირების ინდუსტრიის ყველა მონაწილეს.

პანდემიის გავლენა ჩვენს სფეროზე ძალიან ნეგატიურად აისახა, თუმცა მიუხედავად ამ სირთულეებისა “გრინვეი დინამიურად ვითარდება და მომავალი რამდენიმე წლის განმავლობაში ჩვენი მიზანია შიდა ინსტიტუციების გაძლიერება, გლობალურად ინდუსტრიის განვითარება და ეკოუსაფრთხოებისა და საგზაო უსაფრთხოების კუთხით ჩვენი წვლილის შეტანა პოზიტიური მიმართულებით. ამ ყველაფერს ბევრი სირთულე ახლავს თან, ეს დინამიური პროცესია. იმედს არ ვკარგავთ და ვპროგნოზირებთ, რომ უახლოეს პერიოდში, როდესაც ვაქცინაციის აქტიური ეტაპი დაიწყება,  ტექინსპეტირება და ჩვენი ინდუსტრიაც აღმასვლას დაიწყებს, დაუბრუნდება 2019 წლის მაჩვენებლებს და ფინანსურად უკეთესი წელი გვექნება იმიტომ, რომ ჩვენს ქვეყანას ამის პოტენციალი გააჩნია. ავტომობილების რაოდენობა წლიდან წლამდე მატულობს, შემსაბამისად ჩვენი ინდუსტრიაც პირდაპირ მიბმულია ავტომობილების რაოდენობაზე, დინამიკაში ყველაფერი უნდა გაიზარდოს,” _ განმარტავს “გრინვეის გენერალური დირექტორი.