Georgian Bicycle Group-მა საქართველოში საცალო ქსელი განავითარა და ტურისტულ სააგენტოებთან ერთად ველოსიპედების გაქირავების სისტემის ჩამოყალიბა.
როგორც „კომერსანტს“ Georgian Bicycle Group-ის ხელმძღვანელმა ბექა კიკნაველიძემ განუცხადა,თანამშრომლობის მემორანდუმის ფარგლებში Georgian Bicycle Group-მა თანამშრომლობა და დაიწყო „კავკასუს თრეველთან“ და „ექსპო ჯორჯიასთან“, რომელიც სამთო ტურებს ახორციელებს. მთავარი მიზანი ქვეყანაში ველოსიპედის მოხმარებისა და მისი ცხოვრების წესად დანერგვაა.
„მაკროეკონომიკური მდგომარეობიდან გამომდინარე, გვინდოდა ველოტურების სერვისი განგვევითარებინა. ტურისტულ კომპანიებთან ერთად მთელი საქართველოს მასშტაბით სამთო ველოტურები დავიწყეთ. ჩვენს მაღაზიაში უკვე გვაქვს 4 ელექტო ველოსიპედი, რომლის ღირებულებაც 4500 ევროა. გვინდა, რომ ველოსიპედი ქვეყანაში გახდეს ცხოვრების წესი და ამაში ტურების მოწყობა გვეხმარება.“-ამბობს ბექა კიკნაველიძე.
კომპანია ასევე თანაშრომლობს შვეიცარიელ პარტნიორებთან. ისინი ერთად საქართველოში სხვადასხვა ბილიკებს სწავლობენ, სადაც ველოტურების მოწყობა შეიძლება.
გარდა ამისა, ადგილობრივი წარმოების პირველი ველოსიპედის წარმოება, რომელიც 2019 წლის აპრილიდან, ქართული ველოსიპედებით უნდა გამოჩენილიყო ბაზარზე, ქვეყანაში არსებული მაკრო- ეკონომიკური პრობლემების გამო გადაიდო.
Georgian Bicycle Group-ის ხელმძღვანელის ბექა კიკნაველიძის თქმით, მას შემდეგ, რაც ქვეყანაში ლარის კურსის გაუფასურების ტრენდია, ამოქმედდა საბანკო რეგულაციები და ზოგადად, ბანკები კლიენტებთან ურთიერთობისას უფრო ფრთხილები გახდნენ, პროექტისთვის საჭირო დაახლოებით, 120 000 აშშ დოლარის (საწყის ეტაპზე) ფინანსური რესურსების მოძიება გართულდა.
„ბანკებს სესხის გაძვირების გამო, კიდევ დაპაუზდა წარმოება. ჩვენი პროექტის განხორციელება ვცადეთ სტარტაპ საქართველოს ფარგლებში, მაგრამ უარი მოივიღეთ. პასუხი იყო ის რომ არ გვქონდა მათი სტანდარტების მიხედვით მასალები ატვირთული იმდენი რამდენიც ამ პროექტს სჭირდება.“-ამბობს ბექა კიკნაველიძე.
კიკნაველიძის თქმით, ამ ეტაპზე ქალაქში ველობილიკების ნაკლებობაა. თუმცა სამთო ველოსიპედით, რომელსაც კომპანია აქირავებს, შესაძლებელია ყველანაირ გზაზე გადაადგილება.
შეგახსენებთ, რომ Georgian Bicycle Group-ი (მათივე შვილობილი კომპანია,მაღაზია BIKE.GE) 2011 წელს დაარსდა და იყო პირველი, რომელმაც მომხმარებელს შესთავაზა სპეციალიზებული ველო მაღაზია პროფესიონალური ველოსიპედების ფართო არჩევანით. Bikes.ge-ს თბილისში ამჟამად ორი ფილიალი აქვს ვაკესა და საბურთალოზე.
ნათია ლომიძე