კომპანია GeoFresh 2021 წელს ლურჯი მოცვის და სატაცურის ექსპორტის დაწყებას სპარსეთის ყურის ქვეყნებში გეგმავს.

კომპანია 2016 წელს 2-მა ებრაელმა ბიზნესმენმა დააარსა და ის დღეს კახეთში 13 ჰექტრის სატაცურის, ხოლო სამეგრელოში ლურჯი მოცვის 7 ჰექტრის  პლანტაციებს ფლობს. სავარაუდოდ, 2021 სატაცურის მოსავალი 20-25, ხოლო ლურჯი მოცვის - 60-70 ტონას მიაღწევს.

ამ დროისთვის კომპანია Global G.A.P  სერტიფიკატის მიღებაზე მუშაობს, რაც შემდგომში პროდუქტების ექსპორტის საშუალებას მისცემს.

საიტი east. Fruit.com  GeoFresh-ის გენერალური დირექტორს სალომე ყველიაშვილს გაესაუბრა.

რატომ გადაწყვიტეს ინვესტორებმა მაინც და მაინც სატაცურის და ლურჯი მოცვის მოყვანა, თანაც, ქვეყნის სხვადასხვა რეგიონებში?

ლურჯი მოცვი ძალიან პერსპექტიული კენკრაა, მას მთელს მსოფლიოში საკუთარი ნიშა უჭირავს. საქართველოში მისი მოყვანისთვის ძალიან შესაფერისი კლიმატური პირობებია.

მუშაობა 2016 წელს დავიწყეთ, პირველი მოსავალი 30 ტონა იყო, 2021-ში კი უკვე 60-70-ს ველოდებით.

ლურჯი მოცვის კრეფის სეზონი ივნისი-ივლისია. ჩვენ ასევე საწარმო გვაქვს, სადაც კენკრა იყინება, ინახება და იფუთება. დღეს ჩვენ ამ საწარმოს მოდერნიზებაზე ვმუშაობთ, კერძოდ გაყინვის და შენახვის სისტემებს ვაახლებთ.

წარმატებული დასაწყისის შემდეგ ებრაელმა ინვესტორებმა სატაცურის მოყვანის შესაძლებლობების შესწავლაც დაიწყეს. დღეს არსებულ პლანტაციაში ძალიან დიდი შრომაა ჩადებული, თუნდაც იმიტომ, რომ შესაფერისი აგრონომის მოძიება ძალიან რთულია, მაგრამ ჩვენ ეს მოვახერხეთ.

პირველი მოსავალი 2020 წელს მივიღეთ, და ის 8 ტონას შეადგენდა, 2021 წელს კი 20-25 ტონას ველით.

როგორი იყო 2020 წელი გაყიდვების კუთხით?

როგორც წესი, ჩვენი პროდუქციის დიდი ნაწილი ექსპორტზე მიდის, სატაცურის 60% და ლურჯი მოცვის 70%. ძირითადად პროდუქცია რუსეთში იყიდება. ჩვენ ასევე ქართულ სავაჭრო ქსელებთანაც ვმუშაობთ. მთლიანობაში, პანდემიის მიუხედავად,  წელი წარმატებული იყო.

2021 წლისთვის რა მოლოდინები გაქვთ?

ძალიან პოზიტიური. კარგ მოსავალს ველოდებით.  წინასწარი ინფორმაციით მოთხოვნა საქართველოშიც და უცხოეთში წინა წელთან შედარებით უფრო მაღალი იქნება.

მოსავლის ზრდასთან ერთად ჩვენ ქართულ ბაზარზე ჩვენს პოზიციებს ვაძლიერებთ და პარალელურად ახალ საექსპორტო ბაზრებს ვითვისებთ. მაგალითად, ამჟამად სპარსეთის ყურის ქვეყნებთან მოლაპარაკებები მიმდინარეობს, ასევე ისრაელის ბაზრის ათვისების იმედიც გვაქვს.

ისრაელში საქართველოდან ლურჯი მოცვის და სატაცურის ექსპორტი არ ხორციელდება და ეს საკითხი ოფიციალური სტრუქტურების დონეზე წყდება. თუ მოლაპარაკებები დადებითად დასრულდება,  ამ ბაზარზე გავალთ. ჩვენ რამდენიმე პოტენციური პარტნიორი ისრაელში უკვე გვყავს, ისინი ჩვენი პროდუქციის იმპორტისთვის მზად არიან.

ასევე ჩვენ სოფელ უდაბნოში 90 ჰექტარი მიწის ნაკვეთის ათვისებას ვგეგმავთ და სავარაუდოდ იქ არა მხოლოდ სატაცური, არამედ სხვა კულტურებიც დაინერგება.

განიხილავთ თუ არა ევროკავშირში ექსპორტის დაწყების შესაძლებლობას?

ამ ეტაპზე არა. დასავლეთ ევროპა ძალიან შორსაა და იქ ჩვენი პროდუქტის სახმელეთო გზით ტრანსპორტირება ხარისხის დანაკარგების გარეშე ძალიან რთულია, ხოლო საჰაეროთი  - ძალიან ძვირი.

რუსეთში და უკრაინაში პროდუქცია სატვირთო ტრაილერებით მიდის, ეს კი ბევრად უფრო მოკლე და შესაბამისად, იაფი მარშრუტია. სპარსეთის ყურეში და ისრაელში საჰაერო გზით მუშაობა და გარკვეულ მიმართულებებზე ლოგისტიკური პრობლემების გადაწყვეტა მოგვიწევს.

ზოგადად, წარმოების ზრდასთან ერთად, ექსპორტის გეოგრაფიის გაფართოება ჩვენი ერთ-ერთი უმთავრესი პრიორიტეტია.

წყარო: east-fruit.com