„გეოფლაუერმა“ ორგანული მთის ჩაის წარმოება დაიწყო

„გეოფლაუერმა“ ორგანული მთის ჩაის წარმოება დაიწყო

access_time2021-09-26 13:30:23

კომპანია „გეოფლაუერმა“ ორგანული მთის ჩაის MONTEA-ს წარმოება დაიწყო და ოქტომბრიდან უკვე აგროჰაბის სამივე ფილიალში გაიყიდება. როგორც კომპანიის დამფუძნებელი გოჩა ძნელაძე ამბობს, „გეოფლაუერს“ ორი - დასაყენებელი 80-გრამიანი და ერთჯერადი 40-გრამიანი პირამიდის ტიპის დაფასოება აქვს. რაც შეეხება სახეობებს, ამ ეტაპისთვის ხელმისაწვდომი შავი კლასიკური, მწვანე კლასიკური, შავი კლასიკური ბერგამოტითა და მწვანე კლასიკური ჟასმინის არომატით იქნება, ნოემბრიდან კი ხილისა და დეტოქს-ჩაიც დაემატება.

„დაფასოებული ჩაის წარმოება აგვისტოში დავიწყეთ, რომელიც ოქტომბრიდან პირველ ეტაპზე „აგროჰაბის“ თაროებზე, შემდეგ კი სხვა ქსელურ მარკეტებშიც გამოჩნდება. მოგეხსენებათ, ეს არის ორგანული მთის ერთი პლანტაციის ჩაი, საქართველოში პირველი კომპანია, რომელსაც ადგილობრივი ჩაი ორგანული სერტიფიცირებით აქვს, შესაბამისად პრემიალური პროდუქტია, რაც იმას ნიშნავს, რომ ფასიც შედარებით მაღალი ექნება“, - განმარტავს „გეოფლაუერის“ დამფუძნებელი.

გოჩა ძნელაძე საექსპორტო გეგმებზეც საუბრობს, მისი თქმით, სავარაუდოდ უკვე 2022 წლის დასაწყისში ჩაი MONTEA-ს ექსპორტს უკრაინასა და ბალტიისპირეთის ქვეყნებში განახორციელებენ, შემდგომ კი გერმანიის ბაზარსაც აითვისებენ.

ინფორმაციისთვის, კომპანია „გეოფლაუერი“ 2000 წლიდან ხილსა და სამკურნალო მცენარეებს გადაამუშავებს, დაუფასოებული პროდუქტი კი ექსპორტზე გერმანიაში, პოლონეთში, ესპანეთში, თურქეთსა და რუსეთში გააქვს.

გეოფლაუერის ჩაის პლანტაცია, რომლითაც ორგანულ ჩაის აწარმოებენ, ტყიბულის რაიონის სოფელ წნორში 20 ჰექტარზეა გაშენებული.

შეგახსენებთ, აზერბაიჯანსა და საქართველოში დაწყებულია ერთ დროს აყვავებული, თუმცა ბოლო პერიოდში დაპაუზებული სექტორის, ჩაის, კვლავ გამოცოცხლება. ამის შესახებ წელს ჩაის საერთაშორისო დღის აღსანიშნავად FAO-ს და EBRD-ის მიერ მხარდაჭერილ ვირტუალურ მრგვალ მაგიდაზე  ითქვა.  შეხვედრაზე ორივე ქვეყნის ჩაის წარმოების ისტორია მიმოიხილეს. აღინიშნა, რომ  საბჭოთა ქვეყნებს ჩაით სწორედ საქართველო და აზერბაიჯანი ამარაგებდნენ.

აზერბაიჯანი და საქართველო უკიდურეს ჩრდილოეთით მდებარე ჩაის მწარმოებელი რეგიონის ნაწილია. გასული საუკუნის 80-იან წლებში, ორივე ქვეყანა ყოფილ საბჭოთა კავშირის უდიდეს ნაწილს ამარაგებდა ჩაით. იმ დროისთვის, საბჭოთა კავშირი მსოფლიოში რიგით მეოთხე ადგილს იკავებდა ჩაის მწარმოებელ ქვეყნებს შორის, ინდოეთის, ჩინეთისა და შრი-ლანკას შემდეგ. 

მიუხედავად ამისა, 1990-იანი წლების დასაწყისში, საბჭოთა კავშირის დაშლამ ორივე ქვეყნის ჩაის სექტორის მკვეთრი ჩამოშლა გამოიწვია. დღეს, საერთო წარმოებით, რაც დაახლოებით 3000 ტონაა, ისინი წარმოადგენენ გლობალური ჩაის წარმოების 0,05 პროცენტს. დღეს, ქართული და აზერბაიჯანული ჩაისადმი ინტერესი იზრდება. ბოლო წლების განმავლობაში, ორივე ქვეყნის მთავრობამ გადამწყვეტი ნაბიჯები გადადგა ჩაის სექტორის ასაღორძინებლად. 2018 წელს, აზერბაიჯანში დამტკიცდა განვითარების პროგრამა, რომლის თანახმადაც 2027 წლისთვის ჩაის პლანტაციების რაოდენობა 3000 ჰექტარამდე და წლიური წარმოება 8500 ტონამდე გაიზრდება - რაც რვაჯერ მეტია 2018 წელთან შედარებით, - აცხადებენ FAO-ში.

2016 წელს საქართველოში მთავრობამ შეიმუშავა პროგრამა, რომელიც ითვალისწინებს 7000 ჰექტარზე არსებული და მიტოვებული პლანტაციის რეაბილიტაციას, უახლოესი წლების განმავლობაში.

შეხვედრაზე განმარტეს ქართული და აზერბაიჯანული ჩაის უნიკალური თვისებებიც: აზერბაიჯანული და ქართული ჩაი გამოირჩევა უნიკალური თვისებებით, რაც განპირობებულია ჩაის წარმოების რეგიონის უკიდურეს ჩრდილოეთით მდებარეობითა და კასპიისა და შავი ზღვის სანაპიროებისთვის დამახასიათებელი კლიმატური პირობებით. აქაურ ჩაის ნაყენს აქვს გამჭირვალე შეფერილობა და მისი წარმოება შესაძლებელია თითქმის ნულოვანი ქიმიკატების გამოყენებით, რაც ქმნის ორგანული პროდუქტის წარმოების საინტერესო შესაძლებლობებს ორივე ქვეყანაში. საერთაშორისო ბაზარზე ქართულ და აზერბაიჯანულ ჩაის უპირატესობას ანიჭებენ ის მომხმარებლები, რომლებიც ყურადღებას აქცევენ ჯანმრთელობასა და ეკოლოგიას“, აცხადებენ FAO-ში. 

საერთაშორისო კვლევით დასტურდება, რომ მაღალი კატეგორიის ჩაიზე მოთხოვნა, როგორც ადგილობრივ, ისე მსოფლიო ბაზარზე საკმაოდ მზარდია. მათი ინფორმაციით, აზერბაიჯანელი ხალხი ჩაის მაღალი მოხმარებით გამოირჩევა, ერთ სულ მოსახლეზე 2 კილოგრამზე მეტ ჩაის მოიხმარენ და ამით ადგილს იკავებენ ისეთ წამყვან ჩაის მომხმარებელ ქვეყნებს შორის, როგორებიცაა გაერთიანებული სამეფო, თურქეთი და მაროკო.

როგორც FAO-ს საინვესტიციო ცენტრის დირექტორმა შეხვედრაზე განაცხადა, მდგრადი და პერსპექტიული მიდგომა, პოტენციური რისკების გათვალისწინებით, მათ შორის კლიმატის ცვლილებით გამოწვეული რისკები, არის მთავარი ფაქტორი აზერბაიჯანისა და საქართველოს ჩაის სექტორების წარმატებული განვითარებისათვის.  როგორც წესი, ტემპერატურის და ნალექების მატება იწვევს ახალი მავნებლების გავრცელებას, რაც ქმნის პესტიციდების გამოყენების და ნიადაგის მორწყვის აუცილებლობას, რისი საჭიროებაც ამჟამად არ დგას.


„როგორც ახლახანს გამოქვეყნებული FAO-EBRD-ს კვლევებიდან ჩანს, ქართული და აზერბაიჯანული ჩაის მწარმოებლებს აქვთ პოტენციალი ისარგებლონ უკვე არსებული დადებითი რეპუტაციით, რომელიც აქვთ როგორც ქვეყნის შიგნით, ისე მეზობელ ქვეყნებში, შესაბამისად, სათანადო მხარდაჭერით, დაიკავონ მეტი სივრცე საერთაშორისო ბაზარზე“,- აღნიშნავენ FAO-ში.

სოფლის მეურნეობის სამინისტროს ოფიციალური მონაცემებით, ამჟამად, ჩაის პლანტაციები 19 ათას ჰექტრამდე ფართობზეა შემორჩენილი, აქედან ექსპლუატაციაშია 2.4 ათას ჰექტარი, დანარჩენი 16.6 ათასი ჰექტარი გატყევებულია და ეკალ-ბარდებითაა დაფარული. აქედან დაახლოებით 7.5 ათასი ჰექტარი რეაბილიტაციას ექვემდებარება. ჩაის მწარმოებელი რეგიონებია: გურია, სამეგრელო, აჭარა და იმერეთი. 

საქართველოში, ხელსაყრელი ნიადაგურ-კლიმატური პირობების გამო, ჩაის კრეფის სეზონი 6 თვე გრძელდება. დარგის ექსპერტების აზრით, ნედლეულის მაღალი ხარისხი და კონკურენტული ფასი ქართული ჩაის ძირითად უპირატესობას წარმოადგენს.

შეგახსენებთ, პროექტ „ქართულ ჩაის, სახელმწიფო 2016 წლიდან ერთიანი აგროპროექტის ფარგლებში დაიწყო. 2019 წელს მისი დაფინანსება 400 ათასი ლარით შემცირდა და სულ 500 ათასი ლარი შეადგინა.



ჩაის სექტორის მიმოხილვა: ბელა გელაშვილი

წყარო: bm.ge





რა ენერგეტიკული შეცდომები დაუშვა ევროპამ

რა ენერგეტიკული შეცდომები დაუშვა ევროპამ
access_time2021-10-17 20:00:44
ევროპა თავადაა დამნაშავე საკუთარ ენერგეტიკულ პრობლემებში. ამის შესახებ Financial times-ი იუწყება. რუსეთს ხშირად ადარებენ დათვს, თუმცა, გაზზე ფასების ზრდა მეტყველებს, რომ ამჟამად მასხარის როლი უფრო მოუხდებოდა. ბუნებრივი გაზი რუსეთის ერთ-ერთი მთავარი საექსპორტო საქონელია, ევროკავშირს კი ის დღეს ძალიან აკლია. ფასების ზრდა ევროპაში მცირე მარაგებისა და აზიაში მაღალი მოთხოვნის შედეგია, რაც რუსეთის...

დასავლეთი უკრაინას ევროკავშირში წევრობის იმედს არ აძლევს

დასავლეთი უკრაინას ევროკავშირში წევრობის იმედს არ აძლევს
access_time2021-10-17 18:00:22
ევროკავშირი უკრაინაში რეფორმების პროცესის დამუხრუჭებით უკმაყოფილოა, უკრაინა კი თავის მხრივ უკმაყოფილოა ევროკავშირში წევრობის პერსპექტივის არარსებობით. ბრიუსელს და კიევს შორის ურთიერთობებში აშკარა სიცივე იგრძნობა. ევროპის აუდიტის...

საქართველოს მოსახლეობის 17%-მდე საარსებო შემწეობას იღებს

საქართველოს მოსახლეობის 17%-მდე საარსებო შემწეობას იღებს
access_time2021-10-17 11:00:07
სოციალური მომსახურების სააგენტოს მონაცემების მიხედვით, ქვეყანაში საარსებო შემწეობის მიმღებთა რაოდენობა სულ უფრო იზრდება. სტატისტიკა მზარდია, არა მხოლოდ წლიურ, არამედ თვიურ...

თურქეთი საქართველოს გავლით პროდუქციის ევროკავშირში ექსპორტს შეძლებს

თურქეთი საქართველოს გავლით პროდუქციის ევროკავშირში ექსპორტს შეძლებს
access_time2021-10-16 12:11:40
თურქეთმა მიიღო უფლება თავისუფალი ვაჭრობის რეჟიმში განახორციელოს თურქულ ნედლეულზე საქართველოში წარმოებული პროდუქციის ექსპორტი ევროკავშირში.  ახალი შეთანხმება არ...

2022 წლის ბიუჯეტში პანდემიის მართვისთვის თანხა მცირდება

 2022 წლის ბიუჯეტში პანდემიის მართვისთვის თანხა მცირდება
access_time2021-10-17 12:00:40
ხელისუფლება 2022 წლის სახელმწიფო ბიუჯეტში პანდემიის მართვისთვის საჭირო თანხას ამცირებს. სახელმწიფო ხაზინის პირველადი პროექტის თანახმად, კოვიდ 19-თან დაკავშირებული ხარჯები 310 მლნ ლარითაა შემცირებული. 276 მილიონი ლარით იკლო მოსახლეობის ჯანმრთელობის დაცვისთვის განსაზღვრულმა დაფინანსებამაც. ხელისუფლება ჯანდაცვის სექტორის...


მსგავსი სიახლეები

up