კოვიდ-19-ის გამო შექმნილი კრიზისული სიტუაციიდან გამოსვლა ზოგიერთმა კომპანიამ წარმატებით შეძლო. კომპანია Geo house-ის დირექტორი პაატა რაჭველიშვილი ამბობს, რომ პანდემიის გამო შექმნილ კრიზისს თავი დააღწია. მთავარი ფაქტორი, რამაც წარმოების ზრდა განაპირობა, მისი თქმით, სტრატეგიის დროული შეცვლა აღმოჩნდა, კერძოდ, ონლაინ გაყიდვების გააქტიურება, რამაც 2020 წელს დაწესებული შეზღუდვების პერიოდში საწარმო გაკოტრებისგან გადაარჩინა.
კომპანია ფლობს შოურუმს თბილისში, ასევე ხის საამქროს გარდაბანში.
რაჭველიშვილის ინფორმაციით, გლობალურ ბაზრებზე მიმდინარე პროცესების გამო ნედლეული დაახლოებით 20-30%-ით გაძვირდა, რამაც გარკვეული დონით გავლენა ადგილობრივ ბაზარზეც იქონია.
,,მთელი ძალები წარმოებისკენ გადავისროლეთ, ახალ ნიშნულებზე გავედით, ამიტომ გაცილებით უკეთესი შედეგი დავდეთ. წარმოება გაიზარდა არა მხოლოდ შარშანდელთან შედარებით, არამედ პანდემიამდელი მაჩვენებლებიც გავაუმჯობესეთ. გასული წლის მაისიდან ჩვენ დავიწყეთ ონლაინ გაყიდვები, ამანაც იმოქმედა, სეგმენტი ათვისებული არ გვქონდა და ეს მოხერხდა. მეტი შესაძლებლობა გაჩნდა, მეტი ობიექტის სრულყოფა შეგვიძლია. შესაბამისად, მოთხოვნამაც მოიმატა. იმ ხალხმა, ვინ აპირებდა ზაფხულში დასვენებას საზღვარგარეთ, აქცენტი ბინის კეთილმოწყობაზე გადაიტანა. ჩვენ ინტერიერზე ვზრუნავთ, ვამზადებთ კარებს და ხის მასალებს, რაზეც მოთხოვნა შინამეურნეობების მხრიდან აშკარად გაზრდილია. ახალი ტექნოლოგიები შემოვიტანეთ და წარმოება სრულად დავტვირთეთ. ხელოსნების ახალი ჯგუფი დავაკომპლექტეთ, სპეციალისტების დეფიციტის გამო ზოგს გადამზადება დასჭირდა, დასაქმებულებს ამ მხრივაც ვეხმარებით“, - ამბობს მეწარმე.
ამ ეტაპზე კომპანიაში 65 ადამიანია დასაქმებული.
რაც შეეხება ფასებს, როგორც რაჭველიშვილი ,,კომერსანტთან“ ამბობს, დაახლოებით 10%-ით გაძვირდა მომსახურება, რაც გლობალური პროცესებით არის გამოწვეული.
,,თავდაპირველად დიდი შეფერხებები იყო ევროპაში პანდემიის გამო, მერე საინტერესო ტენდენცია გამოიკვეთა - მასიურად დაიწყეს სახლების გარემონტება. ის, რასაც უშვებდნენ ექსპორტზე, თვითონ გამოიყენეს, რამაც ჩვენთან ერთხანს დეფიციტი შექმნა. თან, გაძვირდა ყველაფერი, დაახლოებით 20-30%-ის ფარგლებში. ჩვენ საშუალო მარჟა დავიჭირეთ, ამან საშუალება მოგვცა, რომ 10%-ზე მეტად არ გაგვეძვირებინა სერვისი. მოთხოვნა კი საკმაოდ გაიზარდა, მიზეზი აქაც ანალოგიურია - პანდემიისას გართობისთვის გათვალისწინებული ხარჯი ხალხმა რემონტებისკენ მიმართა, ტენდენცია ამ მხრივ რადიკალურად შეიცვალა, რაც ჩვენი ბიზნესისთვის მომგებიანი აღმოჩნდა“, - ამბობს პაატა რაჭველიშვილი.
კომპანიის სერვისი ძირითადად ინდივიდუალურ შეკვეთებს მოიცავს. პაატა რაჭველიშვილის თქმით, Geo house არ ქმნის სტანდარტულ ავეჯს, ნამუშავრების უდიდესი ნაწილი - კარები და ავეჯის უმეტესობა, ექსკლუზიურად იქმნება და არ მეორდება.
რაც შეეხება ფასებს, კარების შემთხვევაში, 600 ლარიდან იწყება. ხოლო 1 კვ/მ ავეჯის დამზადების საწყისი ფასი 450 ლარია და ნაკეთობის ხარისხის და სამუშაოს სირთულის შესაბამისად მატულობს.
კომპანიის მომსახურება საშუალო და მაღალშემოსავლიან სეგმენტზეა გათვლილი.
მარი ჩიტაია