გაყინული ხილ-ბოსტნეულის მწარმოებელმა კომპანიამ „გემუანმა“ რებრენდინგი დაასრულა და იანვრის ბოლოს ქართულ ბაზარზე ახალი შეფუთვით დაბრუნდება. ამავე დროს გასული წლის მანძილზე კომპანიის ექსპორტი არათუ არ შემცირდა, არამედ მნიშვნელოვნად გაიზრდა.
ბრენდის სამომავლო გეგმებზე „გემუანის“ დამფუძნებელმა ნონა თოდუამ ისაუბრა.
-რითი იყო გამოწვეული რებრენდინგი და როგორი იქნება თქვენი პროდუქციის ახალი შეფუთვა?
-ჩვენ შევცვალეთ შეფუთვის მასალაც და დიზაინიც. ჩვენი პროდუქცია ალუმინის ჰერმეტულ ყუთებში დაფასოვდება და ეს პირველ რიგში სასურსათო უსაფრთხოებასთანაა დაკავშირებული. საქმე იმაშია, რომ პლასტმასის შეფუთვაში, რომელსაც ჩვენ აქამდე ვიყენებდით, შენახვის წესების დარღვევის შემთხვევაში ჰაერი იპარება და პროდუქტის ხარისხი ფუჭდება. დღევანდელ რეალობაში ძალიან ძნელია იმის გარანტირება, რომ პროდუქტი ტრანსპორტირება, გადატანა და შენახვა ყველა აუცილებელი ნორმების დაცვით მოხვდება.
ეს განსაკუთებით აქტუალურია ზაფხულში, რადგანაც ჩვენი პროდუქციის შენახვას მკაცრი ტემპერატურული რეჟიმი აქვს - მაქსიმუმ 22 გრადუსი. ახალი შეფუთვა ამ პრობლემას მოხსნის. ასევე შეიცვალა დიზაინი და გაფორმება. ოქტომბერში ჩვენ ქართულ ბაზარზე მუშაობა შევაჩერეთ და ამჟამად ვბრუნდებით, ძირითადად სავაჭრო ქსელებში, რადგანაც ჩვენი პროდუქციის მსხვილი მომხმარებელი, სასტუმრო-სარესტორნო ბიზნესი - დღეს გაჩერებულია.
-შეჩერდა თუ არა ექსპორტი?
-არა, რადგანაც ჩვენ გრძელვადიანი შეთანხმებების საფუძველზე ვმუშაობთ, თუმცა, რებრენდინგის თაობაზე ჩვენი უცხოელი პარტნიორები უკვე გავაფრთხილეთ და უახლოეს პერიოდში ისინი ჩვენს პროდუქციას ახალ შეფუთვაში მიიღებენ.
-როგორი იყო თქვენი პროდუქციის ექსპორტის ტენდენციები 2020 წელს?
-2020 წელს ჩვენი ექსპორტი 30%-ით გაიზარდა და ეს შესაძლებელი იმის წყალობით გახდა, რომ ჩვენ პარტნიორებთან სტაბილური ურთიერთობები დავამყარეთ. ჩვენი საქმიანობის პირველი წელს ძირითადი მიზანი სხვადასხვა სერტიფიკატების მიღება და მყარი პარტნიორების მოძიება იყო, დღეს კი უკვე სტაბილური მიწოდების სტადიაზე გავედით.
ჩვენი საექსპორტო ბაზრებია ევროპა, ბალტიისპირეთი და რუსეთი. ძირითადად ჩვენ გადამამუშავებელი მრეწველობისთვის ინგრედიენტებს ვყიდით, თუმცა ზრდა მზა პროდუქციის ევროპაში ექსპორტის კუთხითაც დაფიქსირდა.
-როგორი იყო კომპანიისთვის 2020 წელი?
ვერ ვიტყვი, რომ ცუდი იყო. რა თქმა უნდა, როგორც ყველა კომპანიას, პანდემიის გამო ჩვენც გარკვეული პრობლემები გვქონდა, მაგალითად, დანადგარების შეკეთებისთვის უცხოელი სპეციალისტების ჩამოყვანის ან უცხოეთში პროდუქციის ნიმუშების გაგზავნის კუთხით. თუმცა, 2018-2019 წლებში ჩვენ სწრაფად მივდიოდით წინ, 2020 წელს ეს ტემპი შენელდა და დაფიქრების საშუალება მოგვეცა.
-რა გეგმები გაქვთ 2021 წელს?
-რამდენიმე ახალი პროექტი გვაქვს დაგეგმილი, რომელიც პანდემიის გამო შეჩერდა, დღეს კი განახლების სტადიაზე, პოტენციურ პარტნიორებთან და ინვესტორებთან მოლაპარაკებები უკვე მიმდინარეობს. სავარაუდოდ, ამ პროექტების რეალიზება 2021 წელს დაიწყება.
თენგიზ აბლოთია
წყარო: east-fruit.com
გემუანი
