პოლიტიკური პარტია „ლელო საქართველოსთვის“ ამერიკელი კონგრესმენების მიერ მაიკ პომპეოსადმი გაგზავნილ წერილს ეხმაურება. როგორც გრიგოლ გეგელია აცხადებს, წერილმა კიდევ ერთხელ ცხადყო, რომ ნაცვლად პროდასავლური ინტერესების გაღრმავებისა, მმართველმა პარტიამ ქვეყანაში რუსეთის სახელმწიფოს პოლიტიკური და ეკონომიკური ინტერესების გაძლიერებას შეუწყო ხელი.
„აშშ-ის სენატორებისა და კონგრესმენების წერილი წარმოადგენს მკაფიო ვერდიქტს, რომელიც ფარდას ხდის „ქართული ოცნების“ მმართველობის ანტისახელმწიფოებრივ წლებს. წერილი ცხადყოფს, რომ ნაცვლად პროქართული და პროდასავლური ინტერესების გაღრმავებისა, „ქართულმა ოცნებამ“ შექმნა ნოყიერი ნიადაგი რუსებისათვის ხელსაყრელი პოლიტიკური და ეკონომიკური ინტერესების გასაძლიერებლად. „ქართული ოცნების“ მიერ წარმოებულმა უგუნურმა საგარეო და საშინაო პოლიტიკამ შესაძლებელი გახადა ამ სამარცხვინო მომენტის დადგომა, როდესაც ხელისუფლება ღიად არის ეჭვმიტანელი ჩვენივე ქვეყნის საუკეთესო გეოპოლიტიკური ინტერსების მტრობასა და რუსეთის ინეტერსების გატარებაში. სენატორთა წერილი კითხვის ნიშნის ქვეშ აყენებს ხელისუფლების პროდასავლურ ორიენტაციას და ღიად მიანიშნებს რომ საქართველოს მთავრობის მავნებლური და უგუნური გეოპოლიტიკური სვლები, პირველ რიგში კი, ანაკლიის პორტის ისტორიული პროექტის ხელის შეშლა პირდაპირ არის განპირობებული ივანიშვილის კავშირებით რუსეთის ფედერაციასთან. ანაკლიასთან დაკავშირებით სენატორები და კონგრესმენები აღნიშანვენ რომ „ქართულმა ოცნებამ“ ხელი შეუწყო ამერიკული კომპანიების მიზანმიმართულ გარიყვას იმ პორტის მშენებლობიდან, რომელიც საქართველოს რუსეთზე დამოკიდებულებისგან დაიცავდა, შედეგად დაზარალდა ჩვენი ქვეყნის საუკეთესო ინტერესები და ანაკლიის გრანდიოზული პროექტი, აღმოსავლეთისა და დასავლეთის შემაერთებელი კარიბჭე, რომელიც საქართველოს გლობალური მნიშვნელობის მოთამაშედ აქცევდა და ჩვენი ქვეყნის ეკონომიკურ გეოპოლიტიკურ და სამხედრო მნიშვნელობას გააათმაგებდა. სენატორები აგრეთვე აღნიშნავენ, რომ „ქართული ოცნების“ ხელისუფლების პირობებში გაუარესდა მმართველობის სტანდარტები, შემცირდა პირდაპირი უცხო ინვესტიცია და გართულდა პირობები ჩვენი სტრატეგიული პარტნიორი ქვეყნების ინვესტორთათვის. სამაგიეროდ, იმავე წლებში გზა გაეხსნა კანონსაწინააღმდეგო ვაჭრობას, ხოლო ქართული ფინანსური სისტემა გამოიყენებოდა საერთაშორისო სანქციათა გვერდის ასავლელად. სამწუხაროდ, დღეს ვხედავთ, რომ „ქართული ოცნების“ ხელისუფლებამ არნახულად აზარალა ჩვენი ქვეყნის იმიჯი და იგი მიზანმიმართულად წაიყვანა საერთაშორისო იზოლაციისკენ, რაც გამოიწვევს ინვესიტიციების შემდგომ კლებას და ქართული საკითხის საბოლოო გაქრობას საერთაშორისო დღის წესრიგიდან“, - განაცხადა გრიგოლ გეგელიამ.