ჩანთების ქართული ბრენდი Gepherrin, რომლის შემოსავლის მნიშვნელოვანი ნაწილი პროდუქციის ონლაინ მიწოდებას ეყრდნობოდა, მთავრობის ახალი დადგენილების მიხედვით საქმიანობას დროებით სრულად აჩერებს. როგორც კომპანიის დამფუძნებელმა ილია გეფერიძემ „კომერსანტთან“ განაცხადა, ხდება აქტიური კომუნიკაცია მთავრობასთან, რომ მიწოდების სერვისი არ იყოს შეზღუდული ამ ბიზნესისთვის, თუმცა ამ ეტაპზე უშედეგოდ.
„ჩვენი მოხმარებლის
დიდი ნაწილი დისტანციურად ყიდულობდა ჩვენს პროდუქციას და კურიერს ყველა წესების დაცვით
მიჰქონდა შენაძენი ადგილზე. ახლა ფაქტობრივად, გაჩერებულები ვართ და აღარ ვამუშავებთ არაფერს. საგანგებო მდგომერეობის
გამოცხადების პერიოდიდან 7 თანამშრომელი გვყავდა 700 კვადრატულ მეტრ სივრცეში და უსაფრთხოების
ყველა წესს ვიცავდით, მაგრამ დღეიდან ყველანაირი
შემოსავალი გაგვიჩერდა. ეს ძალაინ ცუდად აისახება ჩვენს საქმიანობაზე და დიდი დარტყმა
იქნება ბიზნესისთვის. იმედი მაქვს, რომ სახელმწიფო შემდეგ რამეს მოიფიქრებს ბიზნესის
დასახმარებლად. ასე თუ გაგრძელდა სიტუაცია, ფაქტობრივად ნოლზე ვრჩებით. ექსპორტი გაჩერდა,
ადგილობრივი გაყიდვები გაჩერდა, სხვა რა უნდა მოვფიქროთ? ძალიან ბევრმა კომპანიამ გამოთქვა
პროტესტი დისტანციური გაყიდვების აკრძალვაზე. ჩვენც აქტიურად ხაზზე ვართ შესაბამის
უწყებებთან, ვრეკავთ და ვცდილობთ, რომ რაღაცაზე დავითანხმოთ, მაგრამ პირდაპირ უარს გვეუბნებიან.“ - განმარტავს „გეფერინის“ დამფუძნებელი ილია გეფერიძე.
რაც შეეხება „გეფერინის“ 60 ზე მეტ თანამშრომელს, ამ ეტაპზე ისინი უხელფასო შვებულებაში არიან. როგორც გეფერიძე აღნიშნავს, მოცემულ სიტუაციაში კომპანიას რესურსი არ გააჩნია.
„რაც შეეხება თანამშრომლებს, ჩვენ სამწუხაროდ მათ ვერაფერს ვერ ავუნაზღაურებთ. დიდი სიამოვნებით, მაგრამ ყველაფერი გაგვიჩერდა, კომპანიას არანაირი შემოსავალი არ გააჩნია და რესურსი არ გვაქვს. ჯამში 60 ამდე თანამშრომელი გვყავს და შეუძლებელია უბრალოდ მათთვის ჩვეული ანაზღაურების გადახდა. ვეცდები ამ ყველაფრის შემდეგ დავაკომპენსირო, მაგრამ მოცემულ სიტუაციაში ამის საშუალება კომპანიას არ აქვს.“ - განაცხადა ილია გეფერიძემ.
ცოტა ხნის წინ ჩანთების ქართულმა ბრენდმა ,,გეფერინმა“, რომელიც ჩინეთში აქსესუარების ექსკლუზიურად გაყიდვაზე მოლაპარაკებას ჩინური აქსესუარების კომპანიასთან (www.viyajewelry.com) აწარმოებდა, ხელშეკრულება კორონავირუსის გამო შეწყვიტა. გარდა ამისა, „გეფერინი“ უკვე 8 თვეა amazon-ზე საკუთარ პროდუქციას ყიდის, თუმცა ამ ეტაპზე ექსპორტი შეჩერებულია.
შეგახსენებთ, რომ მთავრობის 2020 წლის 30 მარტს გამოცემულ 204-ე დადგენილებით საქართველოში გამკაცრდა კორონავირუსის გავრცელების წინააღმდეგ მიღებული ზომები. კერძოდ ონლაინ ვაჭრობა შესაძლებელია საკვები პროდუქციის მიწოდების შემთხვევაში. 2 აპრილს მიღებული დადგენილებით, დისტანციურად ვაჭრობის უფლება ეძლევა იმ კომპანიებს, რომლებიც იცავენ უსაფრთხოების წესებს. გაფართოვდა იმ ეკონომიკური საქმიანობების სია, რომლებსაც შესაბამისი პირობებით, საგანგებო მდგომარეობის პერიოდში ფუნქციონირება არ ეზღუდებათ.
რაც შეეხება ქართულ Gepherrini-ს, ის 2014 წლის აგვისტოდან ფუნქციონირებს და დღემდე მის განვითარებაში 1,5 მილიონ ლარამდე ინვესტიცია ჩაიდო. კომპანიის მიერ წარმოებული პროდუქცია როგორც - ადგილობრივ ბაზარზე, ასევე რამდენიმე ქვეყანაში - ამერიკაში, ჰონგ- კონგში, შვეიცარიაში, შვედეთში, რუსეთში, ყაზახეთში, უკრაინაში და აზერბაიჯანში იყიდება.
მარიამ მორგოშია