2021 წელი ქართულმა საბანკო სექტორმა მოგებით დაიწყო, რომლის მოცულობა 113.36 მლნ ლარს შეადგენს. თუმცა წინა წლის დეკემბერთან შედარებით შემცირებულია საპროცენტო შემოსავლები და მისი მოცულობა 367.56 მლნ ლარს უტოლდება, კლება 14 მლნ ლარია, გაზრდილია სხვა და არასაპროცენტო შემოსავლები, ზრდა 3 მილიონი ლარია.
საკონვერსიო ოპერაციებიდან კი სექტორმა 13.46 მლნ ლარის ზარალი მიიღო. გარდა შემოსავლებისა, მნიშვნელოვანი ცვლილებებია ხარჯების ნაწილშიც, რომლის მოცულობაც მიუხედავად საპროცენტო ხარჯების მატებისა 2020 წლის დეკემბერთან შედარებით 24.4 მლნ ლარით არის შემცირებული.
გარდა შემოსავლებისა და ხარჯისა მნიშვნელოვანი ცვლილებებია დეპოზიტებისა და სესხების კუთხითაც. მაგალითად, დეპოზიტების მოცულობა 2021 წლის პირველი თებერვლისათვის 34.88 მილიარდი ლარია, ზრდა პირველი იანვრის შემდეგ 0.72 %-ს შეადგენს, დეპოზიტების ლარიზაციის კოეფიციენტი 38.55 %, პირველი იანვრის მდგომარეობასთან შედარებით ლარიზაცია 0.06%-ით არის შემცირებული.
დეპოზიტებისგან განსხვავებით, 2021 წლის იანვარში, გასული წლის დეკემბერთან შედარებით შემცირებულია ბანკების მიერ გაცემული სესხების მოცულობა, შემცირება 48.2 მლნ ლარია. აღნიშნული ცვლილებების შედეგად 2021 წლის პირველი თებერვლისათვის საკრედიტო პორტფელის ლარიზაციის კოეფიციენტი 44.14 %-ს შეადგენს, შემცირება 0.18% არის.
აქვე აღსანიშნავია, რომ 2021 წლის იანვარში, წინა თვესთან შედარებით, ყველა საბანკო პროდუქტზე საპროცენტო განაკვეთი გაიზარდა. საქართველოს ეროვნული ბანკის ვებ-გვერდზე გამოქვეყნებული ინფორმაციის მიხედვით, 2021 წლის იანვარს უძრავი ქონების შესაძენად და რემონტისთვის სესხებზე საშუალო საპროცენტო განაკვეთმა 10,96% შეადგინა, რაც წინა თვესთან შედარებით 0,26%-ით მეტია. 2%-ზე მეტით, 23.62%-მდე გაძვირდა ავტოსესხზე საპროცენტო განაკვეთი. 18,17%-დან 19,39%-მდე გაძვირდა ლომბარდული სესხი. რაც შეეხება ერთ-ერთ ყველაზე მოთხოვნად სამომხმარებლო სესხებს, მიმდინარე წლის იანვარში 20,56%-ს შეადგენდა, წინა თვეში კი 20,28% იყო.
შეცვლილი საპროცენტო განაკვეთები ბიზნეს დაკრედიტების ნაწილში შემდეგნაირად გამოიყურება:
● საშუალო საპროცენტო განაკვეთი ლარში გაიზარდა შემდეგი მიმართულებებით: მრეწველობა, მშენებლობა, ვაჭრობა, სასტუმროები და რესტორნები, ტრანსპორტი და კავშირგაბმულობა, ფინანსური შუამავლობა, ოპერაციები უძრავი ქონებით, განათლება, ჯანდაცვა და სოციალური მომსახურება.
● საშუალო საპროცენტო განაკვეთი უცხოურ ვალუტაში გაიზარდა შემდეგი მიმართულებებით: მრეწველობა, ოპერაციები უძრავი ქონებით, განათლება, ჯანდაცვა და სოციალური მომსახურება.
აღნიშნული ცვლილებების გათვალისწინებით, ლარში ბიზნეს სესხების საშუალო პროცენტმა - 11.54% -დან, 12.09%-მდე მოიმატა, ხოლო უცხოურ ვალუტაში 7.13%-დან, 6.97%-მდე შემცირდა.
2020 წლის იანვარში შემოსავლების მოცულობამ ჯამურად 410.9 მლნ ლარი შეადგინა, საოპერაციო ხარჯებმა კი 305.9 მლნ.
სესხები
