2020 წლის 31 დეკემბრის მონაცემებით, საქართველოში კერძო სამედიცინო დაზღვევით მოსახლეობის მხოლოდ 17% სარგებლობს, თუმცა ეს მაჩვენებელი წინა წლის ანალოგიურ პერიოდთან შედარებით გაზრდილია. დაზღვევის სახელმწიფო ზედამხედველობის სტატისტიკის მიხედვით, 2020 წლის მონაცემებით, სულ გაცემულია 620 408 პოლისი, რაც 17 575-ით მეტია 2019 წლის ანალოგიურ პერიოდთან შედარებით. 2018 წელს სულ გაცემული იყო ჯანმრთელობის დაზღვევის 553 675 პოლისი.
2020 წლის მონაცემებით, საქართველოში რეგისტრირებული ავტომობილების 6% დაზღვეულია. დაზღვევის სახელმწიფო ზედამხედველობის სტატისტიკის მიხედვით, 2020 წლის მონაცემებით, სულ სახმელეთო სატრანსპორტო საშუალებათა დაზღვევამ (გარდა სარკინიგზო ტრანსპორტისა) 93,196 შეადგინა, რაც 2019 წლის ანალოგიურ პერიოდთან შედარებით 2562-ით შემცირებულია. 2018 წელს კი სულ გაცემული იყო 75,863 სახმელეთო სატრანსპორტო საშუალებათა დაზღვევა.
აღსანიშნავია, რომ 2020 წლის 31 დეკემბრის მდგომარეობით, საქართველოს სადაზღვევო სექტორის მიერ მოზიდულმა სადაზღვევო პრემიამ პირდაპირი დაზღვევის საქმიანობიდან 667,3 მილიონი ლარი შეადგინა. ამავე პერიოდის შედეგებით, მზღვეველების სადაზღვევო მოგებამ 172,5 მილიონი ლარი, წმინდა მოგებამ კი 47,6 მილიონი ლარი შეადგინა, რაც წინა წლის ანალოგიურ პერიოდთან შედარებით თითქმის 22,4 მლნ. ლარით მეტია. აღსანიშნავია, რომ 2019 წლის განმავლობაში სადაზღვევო ბაზრის წმინდა მოგებამ 25.2 მილიონი ლარი შეადგინა.
სადაზღვევო კომპანიების აქტივების ჯამური მოცულობა კი 915,8 მილიონ ლარს, ხოლო კაპიტალი 279,1 მილიონ ლარს შეადგენდა. აღსანიშნავია, რომ 2019 წლის 31 დეკემბრის მდგომარეობით კომპანიების აქტივები - 799.0 მილიონ ლარს, კაპიტალი კი 234.8 მილიონ ლარს შეადგენდა.