2020 წლის 30 სექტემბრის მონაცემებით, სადაზღვევო ბაზარზე 18 კომპანია ოპერირებს. 17 მათგანი ფლობს სიცოცხლის და არასიცოცხლის დაზღვევის ლიცენზიას, ხოლო ერთი მათგანი მხოლოდ არასიცოცხლის დაზღვევის ლიცენზიას.
2020 წლის 9 თვის განმავლობაში საქართველოს სადაზღვევო სექტორის მიერ მოზიდულმა სადაზღვევო პრემიამ პირდაპირი დაზღვევის საქმიანობიდან 513,4 მილიონი ლარი შეადგინა. ამავე პერიოდის შედეგებით, მზღვეველების სადაზღვევო მოგებამ 129,7 მილიონი ლარი, წმინდა მოგებამ კი 44,3 მილიონი ლარი შეადგინა, რაც წინა წლის ანალოგიურ პერიოდთან შედარებით თითქმის 10,5 მლნ. ლარით მეტია. აღსანიშნავია, რომ 2019 წლის 6 თვეში სადაზღვევო ბაზრის წმინდა მოგებამ 33,8 მილიონი ლარი შეადგინა.
სადაზღვევო კომპანიების აქტივების ჯამური მოცულობა კი 976,9 მილიონ ლარს, ხოლო კაპიტალი 282,7 მილიონ ლარს შეადგენდა. აღსანიშნავია, რომ 2019 წლის 6 თვეში კომპანიების აქტივები - 835,9 მილიონ ლარს, კაპიტალი კი 245.1 მილიონ ლარს შეადგენდა.
საქართველოს მოსახლეობის 16 პროცენტი სარგებლობს კერძო სამედიცინო დაზღვევით, ასევე საქართველოში რეგისტრირებული ავტომობილების მხოლოდ 6 პროცენტია დაზღვეული. 2020 წლის 9 თვეში 609,027 სამედიცინო დაზღვევის პოლისი იყო მოქმედი. ავტოდაზღვევის კუთხით კი, 91,898 პოლისი იყო გაყიდული.
სადაზღვევო ასოციაციის ხელმძღვანელი დევი ხეჩინაშვილი „კომერსანტთან“ პანდემიურ 2020 წელს აჯამებს და სადაზღვევო სექტორში არსებულ მნიშვნელოვან პრობლემებზე საუბრობს. მისი თქმით, პანდემიამ ჯანმრთელობის დაზღვევაზე მოთხოვნა გაზარდა, ხოლო ავტოდაზღვევის მსურველების რიცხვი საგრძნობლად შეამცირა.
„ამ ეტაპზე ვხედავთ პანდემიის გავლენას ანუ პირველი უპანდემიო კვარტალი იყო ძალიან კარგი და ყველა სახეობაში როგორც პრემიაში ასევე დაზღვეულების რაოდენობაში იყო ზრდა, შემდეგ ლოკდაუნმა ზრდა შეაჩერა და სხვადასხვანაირად იმოქმედა ჯანმრთელობის დაზღვევის თვალსაზრისით. საინტერესო მომენტია, რომ დაზღვეულების რაოდენობამ ჯანმრთელობის დაზღვევის კუთხით ზრდა დაიწყო და ყოველთვიურად შეინიშნება მატება. რაც შეეხება ავტოდაზღვევას, მის საცალო ნაწილში დაზღვეულთა რაოდენობის შემცირებაა.
ვფიქრობ, რომ პანდემიამ და სადაზღვევო ინდუსტრიის მიერ მომსახურების დონის შენარჩუნებამ, ასევე კოვიდიანი პაციენტების მართვამ, აჩვენა ბაზარს, რომ ეს კარგი საქმეა და აშკარად ახლაც კი ნოემბრის პერიოდში გამძაფრებულია ჯანმრთელობის დაზღვევაზე მოთხოვნა. მცირე ზომის კომპანიები აფორმებენ პირველად ხელშეკრულებებს და თანამშრომლებს აზღვევენ, გაიზარდა ნდობაც და ინტერესიც. რაც შეეხება ავტოდაზღვევის შემცირებას, ვფიქრობ აქ პრიორიტეტების გადანაწილებამ ითამაშა განსაზღვრული როლი და შეზღუდული ფინანსების პირობებში ადამიანებმა ავტომობილების ნაცვლად ჯანმრთელობის დაზღვევაზე გააკეთეს არჩევანი, თუმცა ეს ჯერ კიდევ გასაანალიზებელია“, - აცხადებს ხეჩინაშვილი.
სადაზღვევო ასოციაციის ხელმძღვანელი სადაზღვევო სექტორის გაზრდილ ხარჯებზეც საუბრობს და აღნიშნავს, რომ კოვიდინფიცირებული პაციენტების მხოლოდ მართვა უხეში გათვლებით 100-120 ლარი ჯდება. მისი თქმით, სადაზღვევოებს კოვიდგადატანილი პაციენტების ჯანმრთელობის მდგომარეობაზე ზრუნვაც უწევთ, რომლებსაც ვირუსმა გარკვეული პრობლემები დაუტოვა.
„სადაზღვევო სექტორს ზრდა არ აქვს, მაგრამ წითელი ციფრებიც არ არის და ეს პოზიტიურია. თუმცა სადაზღვევოებს ხარჯები გაეზარდათ, მაგალითად დიდ კომპანიებს 1500-მდე კაცი ჰყავთ კოვიდ ინფიცირებული რომელსაც მართავენ, რომელთა ხარჯს თვითონ იღებენ. პირველადი უხეში გათვლებით მხოლოდ მართვა 100-120 ლარი ჯდება, მედიკამენტის და სხვა ყველა დანახარჯების გარეშე. ხარჯის მეორე ნაწილი პოსტკოვიდური მდგომარეობიდან მოდის, მაგალითად კოვიდგადატანილი ადამიანები, რომლებსაც ვირუსმა გარკვეული ჯანმრთელობის პრობლემები დაუტოვა, სადაზღვევოებს მიმართავენ. ეს პოსტკოვიდური თემები აშკარად სადაზღვეოებისთვის წინ წამოვა, მართალია ეს ხელშეკრულებებში გათვალისწინებული არ არის, თუმცა კომპანიები კონკრეტულ ქეისებს გადიან და ასეთ შემთხვევებსაც შეძლებისდაგვარად აფინანსებენ, რაც არ არის მარტივი. მართვის ხარჯებს სადაზღვევოები თვითონ ანაზღაურებენ, ეს არ არის საბოლოოდ მცირე თანხები. თუმცა პოსტკოვიდური ხარჯების დაფარვაზე ალბათ საუბარი და განხილვა იქნება, ვფიქრობ საჭირო აღმოჩდება სახელმწიფო პროგრამების გაფართოებაც.
რაც შეეხება 2021 წელს, არც ის იქნება მარტივი, თუ მოგვისწრო ვაქცინამ, მაინც ფაქტია რომ ეს პროცესი ზაფხულამდე გადავა, ამიტომ სავარაუდოდ მომავალი წლის ნახევარი ისევ კოვიდური პროცესების მართვის პერიოდი იქნება, შესაბამისად სადაზღვევოების კუთხით განსაკუთრებული ზრდის იმედი არ გვაქვს. ფაქტია, რთული წელი იქნება.
კოვიდმა იმედია ბევრს დაანახა, რომ სავალდებულო დაზღვევის შემოტანა საჭიროა და მათ შორის პირველი არის ავტომფლობელების პასუხისმგებლობის დაზღვევა, ამ ნაბიჯებით სადაზღვევო ურთიერთობების განვითარება აუცილებელია, რომ ისეთივე დაცული გახდეს ჩვენი საზოგადოება როგორც არიან უცხოეთში“, - აღნიშნავს დევი ხეჩინაშვილი.
ნინო თამაზაშვილი