2021 წელი ლონდონის საფონდო ბირჟაზე ქართული კომპანიებისთვის, წინა წელთან შედარებით, აქციების ფასის და მოთხოვნის ზრდით გამოირჩეოდა. ლონდონის საფონდო ბირჟაზე ამჟამად სამი ქართული კომპანიის – საქართველოს ბანკის ჯგუფის (BGEO), თიბისი ბანკის და საქართველოს კაპიტალის აქციებით ხდება ვაჭრობა. ქართული კომპანიების ჩამონათვალს ერთი წლის წინ საქართველოს ჯანდაცვის ჯგუფი გამოაკლდა, რომელიც აგვისტოში მოიხსნა ლისტინგიდან და კერძო კომპანია გახდა.

პირველი ქართული კომპანია, რომლის აქციებიც ლონდონის საფონდო ბირჟაზე დაილისტა, საქართველოს ბანკის ჯგუფი (2006 წელი) იყო. 2014 წლიდანაა ლონდონის საფონდო ბირჟაზე პრემიუმ ლისტინგში თიბისი ბანკი. საქართველოს ჯანდაცვის ჯგუფის აქციები კი ლონდონის ბირჟაზე 2015 წლის ნოემბერში განთავსდა. 2018 წლის მაისში ლონდონის ბირჟაზე ქართული კომპანიების რიცხვი გაიზარდა, რადგან BGEO ორად გაიყო – საქართველოს ბანკად და საქართველოს კაპიტალად.

აღსანიშნავია, რომ ბოლო ორი წელია ლონდონის ბირჟაზე ყველა ქართული კომპანიის აქციების ფასი მცირდებოდა, თუმცა მიმდინარე წლის ბოლო რამდენიმე თვეა ზრდა შეინიშნება.

საქართველოს ბანკის ჯგუფი (BGEO LN)

საქართველოს ბანკის ჯგუფის აქციების ღირებულება 2021 წლის პირველ სამუშაო კვირაში 2020 წლის დეკემბრის ბოლო კვირასთან შედარებით 5.57%-ით გაიზარდა და ერთი აქციის ფასი 12.88 გირვანქა სტერლინგი გახდა. მიმდინარე წლის ბოლო კვირაში კი მისი ფასი 15.38 გირვანქა სტერლინგის ფარგლებში მერყეობს. ბოლო 4 კვირის განმავლობაში, საშუალო დღიური ვაჭრობის მოცულობამ 90 ათასი აქცია შეადგინა.

წლის განმავლობაში ყველაზე დაბალი ღირებულება 2 მარტს დაფიქსირდა, როდესაც BGEO-ს აქციების ფასი 9.51 გირვანქა სტერლინგი გახდა, ხოლო ყველაზე მაღალი ფასი 16.7 გირვანქა სტერლინგი 31 აგვისტოს იყო. აღსანიშნავია, რომ წლის განმავლობაში საქართველოს ბანკის ჯგუფი აქციების ფასი დაახლოებით 27%-ით გაიზარდა.

თიბისი ბანკის ჯგუფი (TBCG LN)

2021 წლის დასაწყისში ლონდონის საფონდო ბირჟაზე თიბისი ბანკის ჯგუფის აქციების ღირებულება დეკემბრის ბოლო კვირასთან შედარებით 5.92%-ით გაიზარდა, შედეგად, ბანკის ერთი აქცია 13.24 გირვანქა სტერლინგი გახდა. მიმდინარე კვირაში კი აქციების ფასი 16.14 გირვანქა სტერლინგის ფარგლებში მერყეობს. ბოლო 4 კვირის განმავლობაში საშუალო დღიური ვაჭრობის მოცულობამ 38 ათასი აქცია შეადგინა.

წლის განმავლობაში TBCG აქციების ყველაზე დაბალი ფასი 9.74 გირვანქა სტერლინგი 30 აპრილს დაფიქსირდა, ყველაზე მაღალი კი 16.26 გირვანქა სტერლინგი 21 ოქტომბერს. აღსანიშნავია, რომ წლის განმავლობაში თიბისი ბანკის ჯგუფის აქციების ფასი დაახლოებით 31%-ით გაიზარდა.

საქართველოს კაპიტალი (CGEO LN)

საქართველოს კაპიტალის აქციების ფასი მიმდინარე წლის დასაწყისში 5.56 გირვანქა სტერლინგი იყო, წლის ბოლო კვირაში კი 6.35 ბრიტანული ფუნტი სტერლინგის ფარგლებშია. ბოლო 4 კვირის განმავლობაში, საშუალო დღიური ვაჭრობის მოცულობამ 80 ათასი აქცია შეადგინა.

2021 წლის განმავლობაში ლონდონის საფონდო ბირჟაზე საქართველოს კაპიტალის აქციების ფასი დაახლოებით 23%-ით გაიზარდა. ყველაზე ძვირი CGEO-ს აქციები 7.20 გირვანქა სტერლინგი 30 ივნისს ღირდა, ყველაზე იაფი კი 4.85 გირვანქა სტერლინგი 3 მარტს. მიმდინარე წლის განმავლობაში საქართველოს კაპიტალის აქციების ფასის ზრდამ დაახლოებით 23% შეადგინა.

ნინო თამაზაშვილი