რუსულმა გაზპრომმა ბუნებრივი გაზით პოლიტიკურად დატვირთული „ჩრდილოეთის ნაკადი 2“–ის პირველი მილის შევსება დაიწყო. ამის შესახებ ინფორმაციას პროექტის ოპერატორი ავრცელებს.
„მილი თანდათანობით შეივსება გაზით, რათა ტექნიკური ტესტირებისთვის საჭირო მოცულობა და წნევა მივიღოთ“, – ნათქვამია კომპანიის ინფორმაციაში.
გაზპრომმა გერმანიასთან ბალტიის ზღვის ფსკერის გავლით დამაკავშირებელი „ჩრდილოეთის ნაკადი 2“–ის მშენებლობა 10 სექტემბერს დაასრულა.
ამასობაში, ევროპა და ჩინეთი ბუნებრივი გაზის დეფიციტსა და ისტორიულად მაღალ ფასს ებრძვიან. კრიზისმა, როგორც დარგის სპეციალისტები ამბობენ, შეიძლება გლობალური მასშტაბი მიიღოს. დღეისათვის ევროპაში 1000 კბ/მ გაზის ფასი $1200–ს აღწევს. "ჩრდილოეთის ნაკადი 2"–ის მოწინააღმდეგე პოლიტიკოსები ევროკავშირს აფრთხილებდნენ, რომ კრემლი ამ პროექტს გეოპოლიტიკური მიზნებისთვის აუცილებლად გამოიყენებდა, თუმცა გაზსადენის მშენებლობას მწვანე შუქი ჯო ბაიდენისა ანგელა მერკელის ბოლო შეხვედრაზე მიღებულმა ერთობლივმა გადაწყვეტილებამ აუნთო.
აშშ–ის კომპრომისი და კიევის პროტესტი
ივლისის შუა რიცხვებში აშშ–ის პრეზიდენტმა ჯო ბაიდენმა და გერმანიის კანცლერმა ანგელა მერკელმა ვაშინგტონში გამართული მოლაპარაკებების შემდეგ აღიარეს ამ რუსული პროექტის მიმართ აზრთა სხვადასხვაობა. თუმცა, 21 ივლისს ლიდერებმა დაალაგეს კონფლიქტი და გაზსადენთან მიმართებაში შეთანხმდნენ: აშშ არ დაუწესებს სანქციებს Nord Stream 2 AG–ს და მის ხელმძღვანელობას, გერმანია კი უკრაინას ეკონომიკის განვითარებაში დაეხმარება. ასევე, ლიდერები შეთანხმდნენ, რომ თუ რუსეთი შეწყვეტს უკრაინის გავლით ტრანზიტს, მის წინააღმდეგ რამეს მოიმოქმედებენ, თუმცა რას – არ დაუკონკრეტებიათ.
სასამართლო დავები
25 აგვისტოს ცნობილი გახდა, რომ Nord Stream 2 AG–მ გერმანიაში სასამართლო პროცესი წააგო, რომელზეც ის „ჩრდილოეთის ნაკადი–2“–ის ევროკავშირის გაზის დირექტივისგან განთავისუფლებას ითხოვდა.
დირექტივის თანახმად, დაუშვებელია ერთი და იგივე კომპანია იყოს ევროკავშირში გაზის მიმწოდებელიც და ახორციელებდეს ტრანსპორტირებას. ამდენად, „გაზპრომს“ ევროპის ტერიტორიაზე გაზსადენის მხოლოდ ნახევარი სიმძლავრის გამოყენება შეეძლება და დანარჩენ ადგილს ევროპულ მწარმოებლებს დაუთმობს.
„ჩრდილოეთის ნაკადი–2“ ორი გაზსადენი მილისგან შედგება, რომელიც რუსეთიდან ბალტიის ზღვის ფსკერის გავლით გერმანიის გაზგამანაწილებელ სისტემას უერთდება. გაზსადენის საპროექტო სიმძლავრეა წელიწადში 55 მლრდ კბ/მ ცისფერი საწვავის გატარება.