კორონავირუსის გამო ქვეყანაში ბიზნეს საქმიანობა შეჩერდა და კომპანიების დიდი ნაწილი ზარალს ითვლის. მიუხედავად იმისა, რომ საქართველოს მთავრობა ცდილობს ეკონომიკური აქტივობები ბოლომდე არ შეზღუდოს, ბიზნესის დიდი ნაწილი გაჩერებულია, მათ შორის სამშენებლო ბაზარი.დეველოპერები დღემდე ვერ საუბრობენ თუ რა მდგომარეობა იქნება სექტორში, თუნდაც, უახლოეს პერიოდში, თუმცა აცხადებენ, რომ სამშენებლო ბაზარზე გაყიდვები შემცირდება.
სამშენებლო კომპანია „ივერონის“ დამფუძნებელი არჩილ ჯაყელი მთავრობის ანტიკრიზისულ გეგმას განიხილავს და ამბობს, რომ სექტორისთვის მნიშვნელოვანი იქნება თუ მათ მთავრობა დღგ-სგან გაათავისუფლებს.
„კარგი იქნება, თუ გარკვეული პერიოდით დღგ-სგან გავთავისუფლდებით,. ადრე იყო როდესაც სამშენებლო კომპანია ბინას ჩააბარებდა მესაკუთრეს,ამის შემდეგ ხდებოდა დღგ-ს გადახდა, ახლა კი ნებისმიერი ავანსი იქნება თუ მთლიანი თანხა მაშინვე იბეგრება, ეს საკმაოდ დიდი თანხაა. მითუმეტეს ეს დღევანდელ პირობებში ძალიან დიდ შეღავათს მისცემდა სამშენებლო კომპანიებს.დღეს კი ჩვენი შემდეგი ნაბიჯი არის ის, რომ ყველანაირი ფორმით შევინარჩუნოთ კადრები, ეს ჩვენ ინტერესშიცაა, რადგან როგორც კი მუშაობის აქტიური ტემპი დაიწყება კადრების პრობლემა არ დაგვიდგეს.“-ამბობს არჩილ ჯაყელი.
სამშენებლო კომპანია „ივერონის“ დამფუძნებელი აცხადებს, რომ სექტორს დღეს ყველაზე მეტად გაყიდვების წილი შეუმცირდა და კლებას სამომავლოდაც ელოდებიან.
„მნიშვნელოვანი ამ ეტაპზე ის არის, რომ რაც შეიძლება მალე ამოქმედდეს ქვეყანაში ყველა სექტორი, რომ უფრო რეალურად შევძლოთ საუბარი რა მდგომარეობაში ვართ. ეს დღეს გაურკვეველია, 15 მაისიდან მშენებლობები ამოქმედდება და როგორ უნდა დავიცვათ თავი თითოეულმა ადამიანმა და კომპანიამ ეს ისედაც ვიცით.მშენებლებს ახლა რაც ყველაზე მეტად უჭირთ არის ის რომ გაყიდვები არ არის. სამომავლოდაც ასეთი ტენდენცია გაგრძელდება ალბათ, რადაგან ხალხი დაპანიკებულია და ეშინია ისეთი დიდი შენაძენი, როგორიც უძრავი ქონებაა.“-ამბობს ჯაყელი.
სამშენებლო ბაზარზე გაყიდვების შემცირებაზე საუბრობს, დეველოპერული კომპანია „ჯი დი ჯი ჯგუფის“ დამფუძნებელი ბეჟან წაქაძეც და აცხადებს, რომ დღეს არსებული ანტიკრიზისული გეგმა არის პირველი ნაბიჯი ხანძრის ჩასაქრობად.
„როგორც ყველა ბიზნესს ისე სამშენებლო სექტორს, კორონავირუსმა დარტყმა მიაყენა. ეს დარტყმა არის შემდგომი რეალიზაცია, ხალხი აუცილებლად შეიკავებს თავს უძრავი ქონების შეძენისგან.დღეს გვაქვს, მხოლოდ მდგომარეობიდან გამოსავალი, ხოლო კორონავირუსის შემდეგ პერიოდისთვის, დამატებითი ღონისძიებები იქნება გატარებული მთავრობის მხრიდან. ეს არის პირველი ეტაპი, როდესაც სახელმწიფო ეხმარება გაჭირვებულ ადამიანებს, მათ ვინც ამ მძიმე დროს სამსახური დაკარგა.
გეგმაში ასევე გაჟღერდა, თუ როგორ დაეხმარება სახელმწიფო ბიზნესს საშემოსავლოს კუთხით, ასევე სესხის დაზღვევის კუთხით. მაგრამ ვფიქრობ, სახელმწიფო კიდევ სხვა გეგმაზეც მუშაობს, რომელიც ამ ყველაფრის დასრულების შემდეგ, მდგომარეობის შესაბამისი იქნება.
პანდემიის გამო ვერავინ განსაზღვრავს, რა როგორ იქნება. ამას ჩვენ კი არა დიდი სახელწიფოების ვერ საზღვრავენ. ამბობენ რომ -5%-მდე შემცირდება ჩვენი ეკონომიკა, თუმცა, ესეც პირობითია. ამით იმის თქმა მინდა, რომ ჯერ ნაადრევია ყველაფერზე საუბარი, თუნდაც სამშენებლო სექტორში რა იქნება. მაისიდან იმ რეგულაციების შესრულებით რაც დააწერა ჯანდაცვის სამინისტრომ, განახლდება მშენებლობის პროცესი. დღეს რთულია როგორც დადებით ისე უარყოფით პროგნოზზე საუბარი, რადგან ზუსტი გათვლები არ არსებობს.“-ამბობს ბეჟან წაქაძე.
ნათია ლომიძე