ნახევარფაბრიკატების ქართული ბრენდი „რერა“ წარმოებას და ლოგისტიკურ ცენტრს აფართვებს, ამასთან კომპანიამ პროდუქციის ასორტიმენტში ახალი ბრენდი „ხინდა დაამატა, რომელიც დაბალმსყიდველუნარიან მომხმარებელზეა გათვლილი.

„რერა“ ესაა ხორცპროდუქტების იმპორტიორი კომპანია G&A- ს ერთ-ერთი ბრენდი, რომელიც პრემიუმ ხარისხს მიეკუთვნება. კომპანიას ბიზნესის რამდენიმე მიმართულება აქვს -  ესენია ლოგისტიკური ცენტრი, გაყინული ხორცპროდუქტების რეალიზაცია/წარმოება და იმპორტი. ახალი საწარმოს გახსნის შემდგომ კომპანია უკვე 350-400 ტონამდე ნახევარფაბრიკატებს აწარმოებს. მის მშენებლობაში დაახლოებით ერთი მილიონი ლარი დაიხარჯა.

როგორც“რერას“ გაყიდვების მენეჯერი ნიკა ლომიძე „კომერსანტთან“ საუბრობს ამჟამად პანდემიით გამოწვეული ძირითადი პრობლემა ხორცპროდუქტების იმპორტს უკავშირდება. ვალუტის კურსის ცვლილებასთან ერთად პროდუქციის საიმპორტო ღირებულებაც გაზრდილია, ხოლო გაყიდვები კოვიდსიტუაციის გამო ძველებურ ნიშნულს ვერ უბრუნდება.

„ახალი საწარმო თბილისში გავხსენით და სრული დატვირთვით ფუნქციონირებს. გაფართოებასთან ერთად ბაზარზე ახალი ბრენდი „ხინდა“ შემოვიტანეთ, რომელიც ყველა სავაჭრო ობიექტში უკვე განთავსებულია და კარგი რეალიზაციით გამოირჩევა. „ხინდა“ ესაა ნახევარფაბრიკატები,  რომელიც დაბალმსყიდველუნარიან მოსახლეობაზეა გათვლილი.

პანდემიას წარმოებაზე არ უმოქმედია, თუმცა იმპორტის მიმართულებით სერიოზული პრობლემები გვაქვს -  ვალუტის გაუფასურების გამო ტრანსპორტირების ფასები იზრდება.  გაყიდვები იკლებს ფასების ზრდასთან ერთად.

ჩვენ ლოგისტიკური ცენტრიც გვაქვს, სადაც 5000 ტონა გაყინული ხორცპროდუქტების შენახვა შეგვიძლია, გვყავს საკმაოდ დიდი კომპანიები მეიჯარეებად, ვინც დღეს ბაზარზე ფუნქციონირებენ. ამ მიმართულებით ვიზრდებით და ახალ სამაცივრე მეურნეობას ვაშენებთ, სადაც დამატებით 200 ტონა პროდუქციის შენახვა შეიძლება,“ - ამბობს ნიკა ლომიძე.

კომპანია G&A Group საქართველოს ბაზარზე 2012 წლიდან მოღვაწეობს. მისი საქმიანობის სფერო მოიცავს რამდენიმე მიმართულებას: სამაცივრე საწყობების გაქირავება და ლოჯისტიკური მომსახურება; საოფისე ფართების გაქირავება; გაყინული ნახევარფაბრიკატების, ხორცპროდუქტებისა და თევზეულის წარმოება და დისტრიბუცია. კომპანიაში გაერთიანებულია სამი ბრენდი - „რერა“ (ნახევარფაბრიკატების პრემიუმ ხარისხის ბრენდი რომელიც მზადდება გაყინული ხორცპროდუქტებით) , „ხინდა“(ნახევარფაბრიკატები, რომელიც  შედარებით დაბალფასიან სეგმენტზე გათვლილი), „ნობათი“(გაყინული დაფასოებული ხორცპროდუქტები).

ბრენდი „რერა“  პროგრამის „აწარმოე საქართველოში“ თანადაფინანსებით ამოქმედდა. ამ ეტაპზე, მოქმედი წარმოების ფარგლებში „რერაში“ დაახლოებით 150 ადამიანია დასაქმებული, სამომავლოდ კი ეს რიცხვი 200-მდე გაიზრდება.