დეველოპერული კომპანია „აქსისი“, რომელიც ერთ დროს ყველაზე სანდო სამშენებლო კომპანიად მიიჩნეოდა, აუშენებელ ბინებს ჰყიდის. როგორც „აქსისის“ უკმაყოფილო მომხმარებელმა ნუცა დიდებელმა „კომერსანტს“ განუცხადა, 2006 წელს შეძენილ ბინას ჯერ კიდევ მშენებარეს სტატუსი აქვს და დასრულების ვადაც ამ დრომდე უცნობია.

„2006 წელს 45 000 აშშ. დოლარად, 86 კვ.მ ბინა ვიყიდეთ, თანხა მთლიანად გადავიხადეთ. მშენებლობა დაწყებული არ იყო, თუმცა მაშინ ეს კომპანია ძალიან სანდო გვეგონა. ამჟამად მხოლოდ  8 სართულია დასრულებული. შენობა ალბათ უკვე დალპა და აღარც ვარგა. არც კი ვიცით მშენებლობის გაგრძელებას აზრი აქვს თუ არა. რაც შეეხება უშუალოდ თანხას, რომც დაგვიბრუნონ ვერაფერს ვიყიდით, რადგან მაშინდელთან შედარებით ეს თანხა უკვე არაფერია. „ - აცხადებს ნუცა დიდებელი

ნუცა დიდებელის თქმით ყველაზე შეურაცხმყოფელი კომპანიის მხრიდან მომხმარებლების მიმართ ცინიკური და ზედაპირული დამოკიდებულება აღმოჩნდა.

„დაკავშირება არაფრისმომცემია. 2008 წლიდან ჯერ ომის პრობლემაზე ამახვილებდნენ ყურადღებას, რის შემდეგაც  ბევრჯერ ვცადეთ კომუნიკაციის დამყარება, თუმცა უშედეგოდ. რაც შეეხება პასუხს, მუდმივად მოლაპარაკებებს იმიზეზებდნენ. ამასობაში თავზე დაგვაშენეს „აქსის თაუერსი“ და სხვა ყველა მათი პროექტი განხორციელდა. ვებ-გვერდზე რომ შეხვიდეთ მილიონობით დასრულებულ პროექტს ნახავთ.

ყველაზე ცუდი მათი დამოკიდებულებაა. რამდენჯერაც მივსულვარ ან დამირეკავს, იმდენჯერ ცინიკური პასუხები მიმიღია. ბოლოს პანდემიის დროს დავრეკე და მიპასუხა ეკა სადრაძემ, რომლის პოზიციაც არ ვიცი, ისეთი ირონიით და ცინიზმით მიპასუხა გადმოცემაც მიჭირს.

ჩემს გარდა დაზარალებული კიდევ ბევრია, მათ შორის ემიგრანტებიც, რომლებმაც ძალიან დიდი ტრაგედია გადაიტანეს.

ძალიან შეურაცხმყოფელია. რა განსხვავებაა ცენტრ პოინტსა და აქსის შორის ვერ ვხვდები. ასევე, დაუსრულებელი მშენებლობის შესახებ სტატუსის გამოქვეყნებისას რამდენჯერმე მოსალაპარაკებლად დამიკავშირდნენ, რომ ძალიან ვაქტიურობდი და საქმის გარკვევა სურდათ. ხან ვის დამაკავშირეს ხან ვის, მაგრამ მთელი ამ ხნის განმავლობაში ყველაფერი ტყუილი აღმოჩნდა„ - აცხადებს ნუცა დიდებელი.

როგორც „კომერსანტს“ დეველოპერულ კომპანია „აქსისში“ განუცხადეს უკმაყოფილო მომხმარებლის ბრალდებაზე კომენტარს მალე გააკეთებდნენ, თუმცა ამ დრომდე მათი მხრიდან განმარტება ვერ მივიღეთ.

ანი ცარციძე