გახდება თუ არა საქართველო ფინანსური და ტექნოლოგიური ჰაბი? ეს საკითხი კიდევ ერთხელ მას შემდეგ გააქტიურდა, რაც საქართველოში კრიპტოვალუტის უდიდესი ბირჟის Binance-ის დამფუძნებელი ჩანპენ ჩჟაო ჩამოვიდა.
რადიო „კომერსანტის“ დილის ეთერში სწორედ საქართველოს ფინანსურ და ტექნოლოგიურ პოტენციალზე ისაუბრა ფინტექ ასოციაციის თავმჯდომარემ დავით კიკვიძემ. მისი თქმით, სახელმწიფო უნდა იყო დაინტერესებული, რომ დიდი საერთაშორისო კომპანიის წარმომადგენლები და კომპანიები საქართველოში ჩამოიყვანონ, რადგან ეს საერთაშორისო ინტეგრაციის მთავარი გასაღებია.
„Binance-ი თავისით დაინტერესდა საქართველოთი და თავისი ინიციატივით ჩამოვიდა ჩვენს ქვეყანაში. ამ ყველაფერმა ქართულ ბაზარზე დიდი ინტერესი გამოიწვია. არადა, ამას მთავრობის წევრები თავად უნდა აკეთებდნენ. სახელმწიფო თავად უნდა უზრუნველყოფდეს მსგავსი ტიპის ორგანიზაციების ქართული ბაზრით დაინტერესებას. რადგან ეს საერთაშორისო ინტეგრაციის მთავარი გასაღებია“, - განაცხადა დავით კიკვიძემ.
დავით კიკვიძის თქმით, ქვეყანას თანამედროვე ტექნოლოგიებისა და ფინანსების განვითარების კუთხით დიდი პოტენციალი აქვს. ამ შემთხვევაში მნიშვნელოვანია, რომ სახელმწიფომ ის დარგები შეისწავლოს, რისი განვითარების მეტი შანსიც გვაქვს და სადაც მნიშვნელოვანი ნაბიჯების გადადგმა შეგვიძლია. ასეთ დარგებად დაასახელა - Crowdfunding-ი და landing-ი ანუ ონლაინ სესხები, რომლებიც მსოფლიოს მასშტაბით ერთ-ერთ მნიშვნელოვან ალტერნატიული საფინანსო ინსტიტუტებად ჩამოყალიბდნენ.
„პოტენციალი ნამდვილად გვაქვს, იმიტომ რომ არაერთი მსხვილი ორგანიზაცია დაინტერესდა არა მხოლოდ ქართული ბაზრით, არამედ საქართველოში ბიზნესის კეთებით. ეს იმიტომ რომ საქართველოში ტექნოლოგიების მიმართულებით ბიზნესის კეთება საკმაოდ მარტივია. აქ არსებობს ის ინფრასტრუქტურა, რაც ტექნოლოგიური ტიპის კომპანიის ჩამოსაყალიბებლად და ტექნოლოგიური პროდუქტების შესაქმნელადაა საჭირო. ისინი აქ იწყებენ ახალი პროდუქტების და სერვისების შექმნას, აქვე ტესტავენ და მსხვილ ბაზრებზე გასვლას მერე იწყებენ. მათ საქართველო საკუთარი რეგიონული წარმომადგენლობის ეპიცენტრად აქციეს,“— გამაცხადა დავით კიკვაძემ.
დავით კიკვიძის თქმით, ქართული ბაზარი პატარაა, მაგრამ „მაღალტექნოლოგიურად მიმღებელი მომხმარებელი“ ვყავს. სწორედ ეს განაპირობებს საერთაშორისო კორპორაციების ჩვენი ქვეყნით დაინტერესებას.
საუბრის ბოლოს დავით კიკვიძემ განაცხადა, რომ 2 მსხვილი საერთაშორისო კომპანიაა დაინტერესებულია საქართველოში შემოსვლით. მათი ძირითადი მიმართულება საგადახდო ბიზნესია.
მოამზადა მაკა ბიბილაშვილმა