„ეკონომიკა სწრაფად არის გასახსნელი, რადგან მკაცრი შეზღუდვების პირობებში ვცხოვრობთ და თითოეულ დღე მნიშვნელოვანია, არსებული ვითარება და გახარიას გადადგომა ბიზნესს გახსნას გააჭიანურებს, ყოველ დღე კი გაჩერებული ეკონომიკის გამო 15-16 მილიონს ვკარგავთ“, - ასე აფასებს კავკასიის უნივერსიტეტის ეკონომიკის სკოლის დეკანი, ეკონომისტი სოსო ბერიკაშვილი პრემიერ-მინისტრ გიორგი გახარიას გადადგომას.

კითხვაზე, რა პროცესებს უნდა ველოდოთ ბიზნესსა და ეკონომიკაში არსებულ ვითარებაში, სოსო ბერიკაშვილი ამბობს, რომ მთავრობის მოულოდნელი გადადგომა, ზოგადად ნეგატიურ პროცესებს გამოიწვევს როგორც ქვეყნის შიგნით, ასევე მის ფარგლებს გარეთ, თუმცა პოლიტიკურ-ეკონომიკური კრიზისი საქართველოში აქამდეც იყო.

„პოლიტიკური კრიზისი და არასტაბილურობა ეკონომიკისთვის და ბიზნესისთვის ცალსახად ცუდია, თუმცა პოლიტიკურ-ეკონომიკური კრიზისი საქართველოში ისეც იყო და არ ვფიქრობ, რომ გიორგი გახარიას წასვლა გაზრდის ან შეამსუბუქებს ამ კრიზისს. პრობლემაა ის არის, რომ აღმასრულებელი ხელისუფლების გადადგომა, მაშინ როდესაც ბიზნესებთან მოლაპარაკებების პროცესი მიმდინარეობს და ეკონომიკა რაღაცის მოლოდინშია, არ არის კარგი. რაც შეეხება გახარიას მუშაობას, ვერ ვიტყვი რომ ძალიან ეფექტური იყო.

საერთაშორისო დამკვირვებლების და ინვესტორებისთვისაც პოლიტიკური არასტაბილურობა, რომელიც ქვეყანაში ყოველთვის არის, რა თქმა უნდა არასახარბიელო მდგომარეობაში გვაყენებს“ - აცხადებს სოსო ბერიკაშვილი.