„საქართველოს შრომის კანონმდებლობა არასაკმარისად არეგულირებს სამუშაო საათებს, დასვენების დროს, კვირის განმავლობაში დასვენებას, ღამის სამუშაოს და მთავრობას არ აძლევს შრომის ყველა პირობის გაკონტროლების საშუალებას“, - ამის შესახებ საერთაშორისო ორგანიზაცია Human Rights Watch-ის ადამიანის უფლებების 2020 წლის ანგარიშშია ნათქვამი.
„ადამიანის უფლებების სწავლებისა და მონიტორინგის ცენტრის“ (EMC) სოციალური პოლიტიკის პროგრამის დირექტორი კოტე ერისთავი ეთანხმება Human Rights Watch-ის ანგარიშს და თვლის, რომ მის გამოსასწორებლად სახელმწიფოს აქტიურ ჩარევაა საჭირო.
„ძალიან კარგია, რომ ავტორიტეტული ორგანიზაცია როგორიც Human Rights Watch-ია ეხმაურება ამ თემას. ჩვენ უკვე დიდი ხანია ვამბობთ, რომ შრომითი უფლებების კუთხით საქართველოში რთული ვითარებაა. მიუხედავად იმისა, რომ ახალი კანონი არსებობს და ქვეყანაში არის შრომითი ინსპექცია, მას არ აქვს შესაბამისი ფინანსური და ადამიანური რესურსი იმისათვის, რომ თავისი ფუნქცია შეასრულოს. სახელმწიფოსთვის პრიორიტეტი უნდა გახდეს, რომ გააძლიეროს შრომის ინსპექცია და მას ჰქონდეს შესაბამისი მანდატი და რესურსი თავისი მოვალეობის შესასრულებად“, - აცხადებს კოტე ერისთავი.
Human Rights Watch აცხადებს, რომ სუსტი რეგულაციები და აქედან გამომდინარე შრომის პრაქტიკა, რომელიც ხშირად პრიორიტეტს წარმოების მიზანს ანიჭებს, ძირს უთხრის დასაქმებულების უსაფრთხოებას. გარდა ამისა Human Rights Watch-ი წერს, რომ შრომის კანონთან დაკავშირებული ზოგიერთი ხარვეზის აღმოსაფხვრელად და შრომის ინსპექტირების გასაძლიერებლად ხელისუფლებამ საკანონმდებლო ცვლილებები შეიმუშავა, თუმცა საკანონმდებლო ორგანოში ამ ცვილელებზე დებატები, ჯერჯერობით, არ გამართულა.
კოტე ერისთავი იმედოვნებს, რომ საკანონმდებლო ცვლილებები მიმდინარე წელს მაინც შემუშავდება, მიუხედავად იმისა, რომ მას ბევრი მოწინააღმდეგე ჰყავს, მათ შორის ბიზნეს წრეებში.
„Human Rights Watch-ის მძიმე ინდუსტრიაში დასაქმებულებზეც საუბრობს, რომლებიც არანორმირებულ და ზეგანაკვეთურ სამუშაო გარემოში უწევთ შრომა. იმედი გვაქვს, რომ გაზაფხულიდან განახლდება შრომის კანონმდებლობა, რომელიც ჯერ კიდევ შარშან უნდა დაინიცირებულიყო და მშრომელებისთვის ახალი გარანტიები შემოეღო, გარდა ამისა იმედია შრომის ინსპექციაც გააქტიურდება. იმედი მაქვს, რომ ეს პროცესი წინ წავა, მიუხედავად იმისა, რომ გავლენიან ბიზნეს წრეებში შრომის კანონმდებლობის ინიცირებას ბევრი მოწინააღმდეგე ჰყავს. ვიმედოვნებ, რომ მშრომელების ინტერესების დაცვა და უფლებების რეალიზება სახელმწიფოსთვის პრიორიტეტი იქნება“, - განმარტავს კოტე ერისთავი.
ანგარიშში ასევე აღნიშნულია, რომ სამუშაო ადგილებთან დაკავშირებული უბედური შემთხვევების შედეგად ქვეყანაში გასული წლის ოქტომბრის ჩათვლით დაიღუპა 36 და დაშავდა 107 ადამიანი.
ნინო თამაზაშვილი