ამერიკაში მოღვაწე ქართველი ექიმი ზურაბ გურული, ქვეყანაში განვითარებულ მოვლენებს ეხმიანება და სოციალური ქსელში სტატუსს ავრცელებს, რომელსაც „კომერსანტი“ უცვლელად გთავაზობთ:
„ჰოლანდიელმა ექიმებმა რეტროსპექტულად შეისწავლეს თავიანთი სამშობლოს ფსიქიკური მდგომარეობა, გერმანელი ნაცისტების მიერ ოკუპირებული ქვეყნის მაცხოვრებლებში და მათ შთამომავლობაში. აღმოჩნდა რომ შიზოფრენიისა და სხვა მძიმე ფსიქიკური დაავადებების შემთხვევები დაახლოებით 75 % ით იყო გაზრდილი. ამის მიზეზად ე.წ. PTSD, ანუ პოსტტრავმული ფსიქიკური მოშლილობა დასახელდა. ამ კვლევის შედეგები არაერთხელ დადასტურდა სხვადასხვა ქვეყნის მკვლევარების მიერ, რომლებიც მასიური სტრესის ზეგავლენას სწავლობდნენ.
ასე რომ, საქართველოში შექმნილ ფსიქიკურ ფონს თავისი სამეცნიერო ახსნა აქვს. გაუთავებელი შიმშილი, ომები, დამცირება, ფსიქიკურად არაადექვატური ადამიანები მთავრობაში და ა.შ., შესაბამის გავლენას ახდენენ ქვეყნის აურაზე, აქედან გამომდინარე ყველა სომატური შედეგით.
ძალიან ცუდად დამთავრდება სულელების დიქტატურა მთელი ერისათვის. ეს წარმოუდგენელი გაუნათლებლობა, წრეგადასული ცინიზმი, აგრესია, კატასტროფულ გამოთაყვანებამდე მისული ფსევდორელიგია და ყველაზე მთავარი ფაქტორი: - შიში!
მუდმივი შიში;
სიმართლის თქმის შიში; ფიზიკური ანგარიშსწორების შიში; სამსახურის დაკარგვის, ხვალინდელი დღის ... იძულებითი კონფორმიზმი ... ფსიქიკურად ანადგურებს ერს და შესაბამისად აისახება სხეულის ჯანმრთელობაზეც.
თუ არ გამოვედით ამ დეგრადირებადი სპირალიდან, და რაც შეიძლება სწრაფად, მომავალი არ გვექნება“, - წერს გურული სოციალურ ქსელში.