თბილისში „გასტრონომის“ ორი ახალი ფილიალი იხსნება, რომელიც თავის თავში მოიცავს როგორც რესტორანს, ასევე საშოპინგო სივრცეს - ამის შესახებ „კომერსანტს“ „გასტრონომის“ დამფუძნებელმა გიორგი თენაძემ განუცხადა.

„ჩვენი მიზანია ავითვისოთ 4 უბანი, რომელიც პრემიუმ სეგმენტს განეკუთვნება. ჩვენი მესამე ფილიალი დეკემბრის ბოლოს ბელიაშვილზე იხსნება და მეორე ფილიალი მარტის დასაწყისში, საბურთალოზე. გვექნება განახლებული პროდუქციის დიდი არჩევანი.  ახალ ფილიალებში უკვე იქნება ახალი პროდუქცია - გლუტენ ფრი, ბიო, ვეგანოვი და ლაქტოს ფრი. ამ პერიოდში ახალი ფილიალების დამატების რისკი ნამდვილად არსებობს, თუმცა ვრისკავთ.

ორ ახალ ფილიალში იქნება რესტორანი. ერთ სივრცეში გვექნება როგორც საშოპინგე, ისე სარესტორნო სივრცე. შესაბამისად, ფილიალების სივრცე ბევრად დიდი იქნება, ვიდრე წინა ორი,“- განმარტავს „გასტრონომის“ დამფუძნებელი.

ამჟამად დედაქალაქში პრემიუმ სეგმენტისთვის „გასტრონომის“ ორი ფილიალი ფუნქციონირებს. ახალი სივრცეების გახსნის საინვესტიციო მოცულობას გიორგი თენაძე არ ასახელებს, თუმცა აღნიშნავს, რომ წინა ორისგან ბელიაშვილისა და საბურთალო ფილიალები მოცულობითა და პროდუქციის მრავალფეროვნებით განსხვავებული და ბევრად მასშტაბური იქნება.

„გასტრონომი“ თითქმის მთლიანად იმპორტული პროდუქციითაა წარმოდგენილი. „კომერსანტი“ დაინტერესდა, როგორ აისახა პანდემია და ლარის კურსის ცვლილება მომხმარებლის ქცევასა და პროდუქციის ფასებზე, რაზეც „გასტრონომის“ დამფუძნებელი გვპასუხობს, რომ რითეილ სექტორი მნიშვნელოვნად გაიზარდა, რისი მიზეზიც რესტორნებზე და სასტუმროებზე მოთხოვნის შემცირებაა. მოსახლეობა ძირითადად საკვების სახლში მომზადებაზე გადავიდა.

„პანდემიის მიუხედავად, რითეილ სექტორი იზრდება, მიზეზი რესტორნებზე და სასტუმროებზე  შემცირებული მოთხოვნაა. ახლა ძირითადად სახლში ამზადებენ საკვებს. არსებული მდგომარეობა მომხმარებელს დაეტყო ხელფასზე, ბევრი დარჩა უმუშევარი, რესტორნებში კვება ორჯერ და სამჯერ ძვირი ღირს, შესაბამისად, home cooking-ზე ორიენტირდნენ.

რაც შეეხება ფასებს, არ გაგვიზრდია - ჩვენი მარჟის შემცირების ხარჯზე ფასები შევინარჩუნეთ,“- აღნიშნავს გიორგი თენაძე.

ამ სეგმენტში სულ რამდენიმე ასეთი ქსელია, რომელიც ძვირადღირებულ პროდუქციის რეალიზებას ახდენს, გიორგი თენაძეს მიაჩნია, რომ ბიზნესი არის ნიშური და მაღალ სოციალურ ფენაზე გათვლილი და არა მასობრივ მომხმარებელზე. შესაბამისად, არც „აგროჰაბს“ და არც „ევროპროდუქტს“ „გასტრონომი“ კონკურენტად არ მიიჩნევს.

„ჩვენ  გვაქვს ძალიან მცირე ნიშა, არ ვყიდით ქართულ პროდუქტებს, პროდუქტების 99% არის იმპორტირებული. მხოლოდ რამდენიმე სახეობის ქართულ ღვინოს ვყიდით.  შესაბამისად, „ევრო პროდუქტს“ და „აგროჰაბს“ კონკურენტად არ აღვიქვამთ, აბსოლუტურად სხვადასხვა სფეროში ვართ და მეორეც, ჩვენი ბიზნესი არის ნიშური და არა მასობრივ მომხმარებელზე გათვლილი. ასევე გათვლილია მაღალ სოციალურ ფენაზე, გურმანებზე და მათზე, ვინც ექსკლუზიურ კერძებს ამზადებს სახლში და ეძებს ექსკლუზიურ პროდუქტებს,“- ამბობს გიორგი თენაძე.

მარიამ მორგოშია