„ირაკლი ღარიბაშვილის განცხადება არსებულ დღის წესრიგს აცდენილია“, - ასე აფასებს სოციალური სამართლიანობის ცენტრის (ყოფილი EMC) სოციალური პოლიტიკის პროგრამის დირექტორი თათული ჭუბაბრია პრემიერ-მინისტრის განცხადებას ახალი სოციალურ ხედვის შესახებ. ღარიბაშვილის თქმით, ქვეყანაში არსებულ პოლიტიკა უნდა შეცვალოს და შრომისუნარიან მოქალაქეებს სახელმწიფომ ნაცვლად დახმარებისა, ახალ სამუშაო ადგილები უნდა შესთავაზოს. თათული ჭუბაბრია ამბობს, რომ პრემიერის განცხადება წინააღმდეგობაში მოდის და არსებული მოდელის შესახებ ბევრ რამეს უარყოფს. მისი თქმით, საინტერესოა ის ფაქტიც, რომ ღარიბაშვილს ყურადღება არ გაუმახვილებია სოციალური კოდექსის რეფორმაზე, რომლის მიზანიცაა სოციალური დაცვის სისტემის გაძლიერება საქართველოში და მოიცავს მარეგულირებელი ჩარჩოს შემუშავებას სოციალური, ჯანმრთელობისა და დაზღვევის სექტორებისთვის.
„მაშინ, როცა ჯანდაცვის სამინისტრო თავად მუშაობს სოციალურ კოდექსზე, რომელიც მიზნად ისახავს სოციალური დაცვის სისტემის სრულყოფილი და ინტეგრირებული მიდგომის დანერგვას, დღევანდელ განცხადებაში არ იყო ნათქვამი, როგორ ითვალისწინებს ღარიბაშვილის დაპირება ამ კოდექსს. კოდექსი კი თავისთავად შრომის, სოციალური დაცვის და ბავშვთა დაცვის საკითხსაც მოიცავს. დღევანდელი განცხადება არსებულ დღის წესრიგს აცდენილი იყო, ასევე წინააღმდეგობაში მოდიოდა და უარყოფდა ბევრ რამეს არსებული მოდელის შესახებ. გასაგებია, რომ კოდექსმაც უნდა გადაიხედოს სოციალური დახმარებების სისტემებს და არსებულ სქემებს, მაგრამ ჯერ ვერავინ საუბრობს ჯანდაცვის სამინისტროში კონკრეტულად რა იქნება გადასახედი. ის, რომ შრომისუნარიანი ადამიანები იღებენ დახმარებას, გაკრიტიკებული არ არის თვით სოციალური პოლიტიკის დამგეგმარებლების მხრიდან ჯანდაცვის სამინისტროში. ასევე ბოლო წლების ცვლილებაა ისიც, რომ სოციალურ დახმარებას არ უხსნიან ადამიანებს იმის გამო, რომ მათ დასაქმება დაიწყეს. ის, რომ ე.წ. სოციალური დახმარებები ადამიანებს სიღარიბის მახეში აბამს, ესეც არასწორი განცხადებაა და აცდენილია მათსავე პოლიტიკას, რადგან ბოლო წლებში თავადვე გადახედეს სოციალური დახმარებების იმ სისტემას, რომელიც გამორიცხავდა დახმარების მიღებას დასაქმების შემთხვევაში“, - განაცხადა თათული ჭუბაბრიამ.
სოციალური სამართლიანობის ცენტრის სოციალური პოლიტიკის პროგრამის დირექტორის თქმით, ქართული ოცნება მუშაობს იმ მოდელით, რომელიც ნაციონალური მოძრაობის ხელისუფლებამ შეიმუშავა. მისი თქმით, წლების განმავლობაში სოციალური დაცვის კუთხით ფუნდამენტური ცვლილება არ განხორციელებულა.
„პრობლემა, რაზეც წლებია ვსაუბრობთ, არის ის, რომ მიზნობრივი დახმარებები არის მწირი. დახმარებები, რომელიც სიღარიბის ზღვარს ქვემოთ მყოფ ადამიანებს ენიშნებათ, ბაზისურ საჭიროებებსაც ვერ ფარავს. სოციალური გასაცემლების მოცულობა ბიუჯეტიდან არაადეკვატურად დიდია და მაინც ვერ ფარავს საჭიროებებს. ახლა სწორედ ამის გადაფასება შეიძლება მოხდეს, მაგრამ დაახლოებით ორი დეკადაა ამ პოლიტიკას ჯერჯერობით გადაფასება არ ჰქონია. მიზნობრივი დახმარებების გაცემა მხოლოდ მოწყვლად ჯგუფებზე მწირი ოდენობებით მიზანს ვერ აღწევას“, - აცხადებს თათული ჭუბაბრია.
შეგახსენებთ, რომ შრომის ბაზარზე არსებული გამოწვევის საპასუხოდ გასული წლის 1-ლი იანვრიდან დასაქმების სააგენტო ამოქმედდა. თუმცა, უმუშევრობის პრობლემასთან ბრძოლის სახელმწიფოს მესამე მცდელობაც წარუმატებელი აღმოჩნდა. 4 მილიონი ლარის ბიუჯეტის მქონე დასაქმების სააგენტომ გასულ წელს 352 ადამიანი დაასაქმა.
ბაჩო ადამია