პრემიერ ირაკლი ღარიბაშვილის განცხადებით ორნიშნა ეკონომიკური ზრდა ივნისშიც შენარჩუნდება. როგორც მან მთავრობის სხდომაზე აღნიშნა ზრდის ტემპი 15-18 პროცენტის ფარგლებში იმერყვევებს.

12 თვიანი უწყვეტი ვარდნის შემდეგ, ეკონომიკამ ზრდა მარტიდან დაიწყო. თუ მარტში წინ წლის ანალოგიურ პერიოდთან შედარებით 4%-იანი ზრდა დაფიქსირდა, აპრილში ზრდის ტემპმა 45%-ს მიაღწია, რამაც ამ დრომდე ბოლომდე პასუხგაუცემელი კითხვები გააჩინა. ზრდის ტემპი 25% იყო მაისშიც. პირველ კვარტალში დაფიქსირებული 4.5%-იანი ვარდნის მიუხედავად, იანვარ-მაისში კი ეკონომიკა ჯამურად 11.5%-ით გაიზარდა.

მშპ-ის ზრდის განსაზღვრისთვის მიმდინარე პერიოდთან ერთად საბაზისო - შესადარისი პერიოდის მაჩვენებლებიც მნიშვნელოვანია. გასულ წელს, ყველაზე მკაცრი ლოქდაუნი აპრილში იყო გამოცხადებული, რა დროსაც გარკვეული პერიოდი კერძო ავტომობილით გადაადგილება და ონლაინ ვაჭრობაც აიკრძალა, რის შედეგადაც ეკონომიკა 16.6%-ით შემცირდა. 13.5%-იანი ვარდნა იყო მაისშიც, ივნისში კი რეგულაციების შემსუბუქების შემდეგ ეკონომიკა შედარებით ნაკლებად - 7.7%-ით შემცირდა. წელს, გარდა იმისა რომ რეგულაციები შერბილებულია ეკონომიკა ძირითადად გასული წლის ვარდნის ფონზე იზრდება.

გასული წლის სექტემბერში, ფინანსთა სამინისტრომ პარლამენტს განსახილველად 2021-ის ბიუჯეტის თავდაპირველი ვერსია წარუდგინა, რომელიც 5%-იან ეკონომიკურ ზრდაზე იყო გათვლილი. ეპიდსიტუაციის დამძიმებისა და სავალუტო ფონდის რეკომენდაციის შემდეგ დეკემბერში დამტკიცებულ ბიუჯეტში ეკონომიკის 4.3%-იანი ზრდა იყო გათვალისწინებული. ამის შემდეგ სავალუტო ფონდმა საქართველოს მშპ-ის ზრდის პროგნოზი კიდევ შეუმცირა და 3.5%-ით განსაზღვრა. აპრილ-მაისის სწრაფი ზრდის შემდეგ კი პროგნოზები საპირისპირო მიმართულებით შეიცვალა მსოფლიო ბანკმა ის 6%-მდე გაზარდა, პარლამენტი კი ბიუჯეტის 1.1 მლრ ლარით გაზრდას განიხილავს და 4.3%-იან ზრდაზე დაგეგმილ ქვეყნის მთავარ ფინანსურ დოკუმენტს 7.7%-იან ზრდაზე აკეთებს.

ქვეყანაში რეგულაციების რეალური შემსუბუქება 17 მაისიდან კომენდანტის 23:00 სთ-მდე გადაწევითა დარესტორნებისთვის შაბათ-კვირას დახურულ სივრცეში მუშაობის მიცემის უფლებით  დაიწყო. ივნისში სახმელეთო საზღვრების გაიხსნა, ასევე გაუქმდა ღია სივრცეში პირბადის ტარების ვალდებულება. 1-ლი ივლისიდან გაუქმდა კომენდანტის საათიც.

დღემდე მთავარ გამოწვევად ვაქცინაციის დაბალი ტემპი და გაუარესებული ეპიდსიტუაცია რჩება. აპრილში ისრაელიდან ვიზიტორთა რაოდენობა 13 000%-ით გაიზარდა, მაისში 24 000%-ით, ივნისში კი 34 000%-ით. ზრდა სავარაუდოდ შენელდება, რადგან 23 ივლისიდან საქართველოდან ისრაელში დაბრუნებულ ნებისმიერ პირს, მაშინაც კი თუ სრულადაა აცრილი და კოვიდიც გადატანილი აქვს 7 დღიანი სავალდებულო კარანტინი მოუწევს. გაუარესბულ ეპიდვითარებას 5 ივლისს პოლონელი ტურისტის დაჭრაც დაემატა, რის შემდეგაც სპონტანურად ასობით ჯავშანი გაუქმდა.