2020 წლის 30 მარტის დადგენილებით. საქართველოს მთავრობამ ყველა დეველოპერული მშენებლობა შეაჩერა. შესაბამისი ცვლილება „საქართველოში ახალი კორონავირუსის გავრცელების აღკვეთის მიზნით გასატარებელი ღონისძიებების დამტკიცების შესახებ“ მთავრობის დადგენილებაში შევიდა. თუმცა, დღეს საქართველოს მთავრობის №211 დადგენილების თანახმად რამდენიმე ეკონომიკური საქმიანობა, მათ შორის მშენებლობა და კომპიუტერული ტექნიკით დისტანციურად ვაჭრობა დასაშვები ხდება.
დეველოპერებს ახლა იმის დამტკიცება მოუწევთ, თუ რატომ არის მათი ეკონომიკური საქმიანობის გაგრძელება მნიშვნელოვანია. სამშენებლო კომპანიებისთვის საქმიანობის გაგრძელების უფლებას კი საგანგებო შტაბი გადაწყვეტს. როგორც დღეს გახდა ცნობილი, ახლა მიმდინარეობს სპეციალური ფორმის შემუშავება, რომელიც კომპანიებმა უნდა შეავსონ და მშენებლობის გასაგრძელებლად თანხმობის მისაღებად ამ ფორმით ეკონიმიკის სამინისტროს მიმართონ. დეველოპერებმა საგანგებო შტაბის წევრები უნდა დაარწმუნონ იმაში, რომ მეწარმე სუბიექტები დადგენილ წესებს ასრულებენ და უსაფრთხოდ ფუნქციონირებენ.
აღსანიშნავია, რომ დეველოპერული სექტორში აღნიშნული აკრძალვის შესახებ ინფორმაციას არ ფლობდნენ. კომპანიები დღესაც შეუფერხებლად აგრძელებენ მუშაობას.
„ანაგი დეველოპმენტში“ აცხადებენ, რომ კომპანიას მშენებლობები არ შეუჩერებიათ. მათი თქმით, მუშაობას ჩვეულებრივად,რეკომენდაციების გათვალისწინებით გრძელდება. „სამშენებლო პროცესები მიმდინარეობს, როგორც დღეს გავიგეთ დამატებითი აქტივობები უნდა ჩავატაროთ და საბჭოს უნდა მივმართოთ, მაგრამ ეს იმას არ ნიშნავს, რომ სამუშაო პროცესის გაგრძელება არ შეგვიძლია. გარდამავალ სტადიაში ვართ, მაგრამ მშენებლობებს არ ვაჩერებთ“, - აცხადებენ „ანაგში“.
მშენებლობები არ გაჩერებულა არც „არქიში“, კომპანიაში აცხადებენ, რომ სამშენებლო პროცესი ყველა წესის დაცვით მიმდინარეობს.
შეგახსენებთ, რომ დღეს გაფართოვდა იმ ეკონომიკური საქმიანობების სია, რომლებსაც შესაბამისი პირობებით, საგანგებო მდგომარეობის პერიოდში ფუნქციონირება არ ეზღუდებათ.ამ საქმიანობებს შორისაა:
შენობებისა და ნაგებობების მშენებლობა (მხოლოდ საქართველოს მთავრობის მიერ განსაზღვრული მეწარმე სუბიექტებისთვის), სამოქალაქო მშენებლობა (მხოლოდ საქართველოს მთავრობის მიერ განსაზღვრული მეწარმე სუბიექტებისთვის), საშენი მასალების წარმოება (მხოლოდ საქართველოს მთავრობის მიერ განსაზღვრული მეწარმე სუბიექტებისთვის), თამბაქოს ნაწარმის წარმოება და ვაჭრობა (გარდა სპეციალიზებული სავაჭრო ჯიხურებისა), სასტუმროები (მხოლოდ საკარანტინო მიზნებისთვის), ტექსტილის რეცხვა და ქიმწმენდა, საგამომცემლო საქმიანობა (პრესის ბეჭდვა), ტელერადიო მაუწყებლობა, ელექტრონული კომუნიკაციები, სადაზღვევო და სალიზინგო საქმიანობა (დისტანციურად), სარეკლამო სააგენტოების საქმიანობა (დისტანციურად), არქიტექტურული საქმიანობა (დისტანციურად), შენობების საერთო დასუფთავება და დეზინფექცია, სახანძრო მომსახურება, ვაჭრობა კომპიუტერებით, კომპიუტერული პერიფერიული მოწყობილობებით და პროგრამული უზრუნველყოფით (დისტანციურად).
დადგენილების თანახმად, დასაშვებია ნებისმიერი ეკონომიკური საქმიანობა, თუ იგი ხორციელდება დისტანციურად მხოლოდ სახლიდან (სახლიდან გაუსვლელად). დაშვებული ეკონომიკური საქმიანობის სპეციფიკის გათვალისწინებით, დისტანციური მუშაობა გულისხმობს სახლიდან მუშაობას, ხოლო კრიტიკულად აუცილებელ შემთხვევებში, ასევე სამუშაო ადგილიდან („სამსახურიდან, ოფისიდან“, მაგრამ არა უმეტეს ხუთი ადამიანისა).
იმ ეკონომიკური საქმიანობების ჩამონათვალი, რომლებსაც, ახალი კორონავირუსის გავრცელების მასშტაბის შემცირების მიზნით დაწესებული შეზღუდვები არ შეეხო, 30 მარტს გამოქვეყნდა, მათ შორისაა: სამედიცინო დაწესებულებები, სურსათის, ასევე ცხოველის საკვების ვაჭრობისა და წარმოების ობიექტები, წისქვილები, პურ-ფუნთუშეულის საცხობები, ელექტროენერგიის, ბუნებრივი გაზის, წყლის განაწილებისა და მიწოდების კომპანიები, ბენზინის, დიზელის მიმწოდებელი სუბიექტები, ბანკები, მიკროსაფინანსო ორგანიზაციები, პრესის ჯიხურები და სხვა.
ამასთან, საქართველოს მთავრობა უფლებამოსილია, დამატებით განსაზღვროს იმ ეკონომიკური საქმიანობების ან/და ეკონომიკური საქმიანობის განმახორციელებელი ობიექტების/მეწარმე სუბიექტების ჩამონათვალი, რომლებიც არ იზღუდება და რომელთა ფუნქციონირებაც აუცილებელია საგანგებო მდგომარეობის პერიოდში.
ბაჩო ადამია