გაქრება თუ არა კინოთეატრი „რუსთაველი“ ? - კითხვას რომელიც დიდი ხანია გვესმის, წლების შემდეგ პასუხი გაეცა - „სს კინოთეატრი რუსთაველი“ ისტორიული შენობის რესტავრაცია-ადაპტაციას გეგმავს. ესკიზი თბილისის არქიტექტურის სამსახურთან უკვე შეთანხმებულია. ბიზნესმენი ოთარ ბუბაშვილი ახალა დედაქალაქის მთავრობისგან მშნებლობის ნებართვას ელოდება.
აღსანიშნავია, რომ დედაქალაქის ისტორიული კინოთეატრი არც ძველი იერსახით და არც ძველი ფუნქციით არ დაბრუნდება, უფრო სწორედ შენობას გაცილებით მეტი ფუნქცია დაეკისრება. არქიტექტურის ვებგვერდზე განთავსებული ინფორმაციის მიხედვით, ირკვევა, რომ -1, სარდაფის სართულზე 104 ადამიანზე გათვლილი კინოდარბაზი განთავსდება. შენობის ნულ სართულზე კი ცენტრალური კინო დარბაზი მოეწყობა, რომელიც 165-170 ადამიანზეა გათვლილი. ვესტიბიულში ასევე იგეგმება კინო მუზეუმის, კინო ბიბლიოთეკის კაფის ფუნქციით და მცირე რესტორანის მოწყობა. ყველაზე მნიშვნელოვანი არის ის, რომ შენობა სასტუმროს ფუნქციას შეიძენს. 1, 2, 3, 4 და 5 სართულებზე სასტუმროს ნომრები განთავსდება, სასტუმროსთვის საჭირო დამხმარე ფართებით, ერთი გამონაკლისით, რომ მე-4 სართულზე კინო-ბარი ლაუნჯი და ტერასაა დამატებული.
განმარტებით ბარათში ვკითხულობთ, რომ პროექტით შენობის პირვანდელი სახის დაბრუნება იგეგმება. დოკუმენტში ვკითხულობთ, რომ რეკონსტრუქციის ნაწილში დეკორით შემკული სვეტების, ჭერების და კიბის უჯრედების რესტავრაციაა განსაზღვრული. ასევე მოხდება ფასადისა და ქანდაკების რესტავრაცია.
რაც შეეხება არქიტექტურულ კონცეფციას. ავტორები წერენ, რომ პროექტის მთავარი მიზანია, რომ შენობას შეუნარჩუნდეს მისი ძირითადი კინოს ფუნქცია, მიმართულება და მის გარშემო აეწყოს სრულიად პროექტი, რაზეც მათი თქმით, შენობის ცენტრში არსებული ცენტრალური კინო დარბაზი მეტყველებს. დოკუმენტში ვკითხულობთ, რომ ნულ სართულზე განთავსებული ატრიუმი წარმოადგენს პროექტის მთავარ ღერძს-გულს.
პროექტის ავტორები მიიჩნევენ, რომ პროექტის დამატებითი ფუნქციები კინოთეატრის შემადგენელი ნაწილია და მის უკეთ ფუნქციონირებას უწყობს ხელს. მაგალითად მათ სასტუმრო მოჰყავთ და ამბობენ, რომ ის კინოფესტივალების ჩატარების დროს დაიტვირთება.
ოფიციალურ დოკუმენტში პროექტის ავტორები წერენ, რომ კინოთეატრ რუსთაველის ისტორიული შენობა, თანამედროვე ხელოვნების მუზეუმის გვერდით თითქოს დაიკარგა. ამიტომ მათ გადაწყვიტეს ძველი და ახალი არქიტექტურის შერწყმა. რაც მათი აზრით, წინა პლანზე წამოწევს იმ ექსპრესიას და დრამატურგიას რაც კინო ხელოვნებას ახასიათებს.
კიდევ ერთი საკითხი, რაზეც პროექტის ავტორები განმარტებით ბარათში ამახვილებენ ყურადღებას შენობის სახურავია. ოფიციალურ დოკუმენტში ვკითხულობთ, რომ რუსთაველის გამზირზე არსებულ ისტორიულ შენობებს სხვადასხვა ტიპის, ფორმის სახურავების თემატიკა ახასიათებთ. მათი განმარტებით, ახალი მოცულობაც ზუსტად ამის გამოძახილია თანამედროვე პერიფრაზებით და ისტორიული მასალების ახლებური გამოყენებით.
ბაჩო ადამია