ბოლო პერიოდში ქვეყანაში უძრავ ქონებაზე ფასის კლება ფიქსირდება. ტურისტების გარეშე დარჩენილი უძრავი ქონების გამქირავებლები განსაკუთრებით რთულ სიტუაციაში აღმოჩნდნენ.

Galt&Taggart-ის ბოლო კვლევის თანახმად, დეველოპერებმა და კერძო ინვესტორებმა დაიწყეს ფასების შემცირება, რათა მოერგონ ახალ რეალობას, განსაკუთრებით კი ბინის გამქირავებლებმა. უძრავ ქონებასთან დაკავშირებულ ფასების ახალ ტენდენციასთან დაკავშირებით დეტალების გასარკვევად „კომერსანტი“ Galt&Taggart-ის უფროს ანალიტიკოსს კახა სამყურაშვილს დაუკავშირდა.

კახა სამყურაშვილის განცხადებით, ბაზარზე ბინების რაოდენობის მატება ქირის ფასის შემცირების განმაპირობებელი ფაქტორია და თუ ტურისტული აქტივობები არ აღდგა, გაქირავების ბაზარს მძიმე ტვირთად დააწვება.

„მაისსა და ივნისში ახალი ბინების გაყიდვების ფასი შემცირდა, თუმცა ეს იყო დაახლოებით 8-9%-იანი და ასეთი მერყეობა არა მარტო ამ თვეებში, ზოგადად, ხშირად ხდება ხოლმე, შესაბამისად იმის თქმა რომ ტრენდი შეიცვალა ძალიან ნაადრევი იქნება და მომდევნო თვეების მოვლენებსაც უნდა დაველოდოთ.

რაც შეეხება ქირის ფასს, 2020 წლის მეორე კვარტალში ცალსახად გამოჩნდა დაახლოებით 11%-იანი კლება, რაც ტურიზმის კრიზისის ფონზე ძალიან ბუნებრივია. Airbnb-ის უამრავი ბინა თავისუფალია და შეიძლება ამ მასპინძლებმა არჩიეს გრძელვადიანად გაქირავების პოლიტიკა.

იმ პირობებში როდესაც კონკრეტული სესხები სუბსიდირებულია, მოლოდინი გვაქვს, რომ გაყიდვების ტემპი წლის მეორე ნახევარში თითქმის იგივე იქნება რაც წინა წელს იყო, ეს კი წლიურ ჭრილში გაყიდვების დაახლოებით 15%-იან კლებას გულისხმობს. ეს ფასების კლების ტემპს შეამცირებს, რადგან ამ მიმართულებით მოთხოვნა დაგენერირდება. რაც ნიშნავს იმას, რომ შესაძლოა ისეთმა ადამიანებმა შეიძინონ ბინა, ვინც საერთოდ არ გეგმავდა უძრავი ქონების შეძენას ან უბრალოდ სამომავლოდ ჰქონდა გათვლილი. ამ სიტუაციის ფონზე, მოთხოვნა დროში ადრე გადმოინაცვლებს და ეს წარმოქმნილი დანაკლისი გავლენას მომავალ წლებზეც იქონიებს.

ზოგადად სანამ ტურიზმის სექტორი არ აღდგება და გაურკვევლობის ფაქტორი არ მოიხსნება ნორმალურ მდგომარეობაში დაბრუნებაზე საუბარი ნაადრევია“,- განმარტავს კახა სამყურაშვილი.

შეგახსენებთ, რომ Galt&Taggart-ის ბოლო კვლევის თანახმად, 2020 წლის ივნისში Area.ge-ზე განთავსებული განცხადებების საშუალო შეწონილი ფასი შემცირდა 817 აშშ დოლარამდე (870 აშშ დოლარიდან) დეველოპერების შემთხვევაში და 846 აშშ დოლარამდე (893 აშშ დოლარიდან) კერძო ინვესტორების შემთხვევაში. 2020 წლის მარტსა და აპრილში შემცირების შემდეგ, ბინის გაყიდვის ახალი განცხადებები კვლავ გაიზარდა 2020 წლის მაისიდან

შედარებით სწრაფად ახალ გამოწვევებზე უძრავი ქონების ქირის ბაზარი რეაგირებს - ქირის ინდექსი აშშ დოლარში წლიურად შემცირდა 10.7%-ით შემცირდა წლის დასაწყისთან შედარებით.

ანი ცარციძე