პარლამენტის განათლებისა და მეცნიერების კომიტეტის მიერ საქართველოში, ზოგადი განათლების სისტემაზე COVID 19-ით გამოწვეული პანდემიის გავლენის კვლევის საკითხზე შექმნილმა თემატური მოკვლევის ჯგუფმა დღევანდელ შეხვედრაზე სკოლების დირექტორებს, ადმინისტრაციის წევრებსა და პედაგოგებს მოუსმინა. ინფორმაციას პარლამენტის პრესსამსახური ავრცელებს.
ჯგუფის წევრები სამუშაო შეხვედრაზე აღნიშნულ საკითხთან დაკავშირებით დაინტერესებული მხარეებიდან შემოსულ მოსაზრებებსა და რეკომენდაციებს გაეცნენ.
საბჭოს თავმჯდომარის შალვა პაპუაშვილის განცხადებით, თემატური მოკვლევის ფარგლებში ზეპირი მოსმენები, მნიშვნელოვანია ქართულ ზოგადსაგანმანათლებლო დაწესებულებებში დისტანციური სწავლების ეფექტიანად განხორციელების ხელშეწყობისა და საუკეთესო გამოცდილებათა თავმოყრის თვალსაზრისით.
„150-მდე სხვადასხვა მოსაზრება შემოვიდა თემატური მოკვლევის ფარგლებში, რომელიც შესწავლილია და აისახება ანგარიშში. ზეპირი მოსმენები მნიშვნელოვანია იმისათვის, რომ თქვენგან გავიგოთ ის ძირითადი აქცენტები, რომელიც თქვენს წერილობით რეკომენდაციებში თუ წინადადებებშია მოცემული. ჩვენ გვექნება კიდევ რამდენიმე მოსმენა და ჩვენი კომიტეტი მიიღებს საბოლოო დოკუმენტს, სადაც აისახება ის დაკვირვებები, რომელიც მოკვლევის ჯგუფმა გააკეთა. სხვადასხვა საჯარო ინსტიტუტს გაეცემა რეკომენდაციები იმ მიზნით, რომ აღმოიფხვრას ის ხარვეზები, რომელიც არსებობს დისტანციურ სწავლებასთან დაკავშირებით იმისათვის, რომ დისტანციურ სწავლებას, როგორც სწავლების ერთ-ერთი მეთოდს, ვნახოთ რა პოტენციალი აქვს და როგორ შეიძლება სწავლების ამ ფორმის გამოყენება“, - განაცხადა შალვა პაპუაშვილმა.
შეხვედრაზე თემატური მოკვლევის ჯგუფის წევრმა და განათლებისა და მეცნიერების კომიტეტის თავმჯდომარის მოადგილემ თამარ ტალიაშვილმა მადლობა გადაუხადა ზოგადსაგანმანათლებლო სისტემის წარმომადგენლებს პანდემიის პერიოდში მათ მიერ გაწეული სამუშაოსთვის.
„მინდა დაგიდასტუროთ ჩემი პატივისცემა თქვენი ძალიან დიდი შრომისათვის, რომელიც თქვენ გასწიეთ. ქვეყანამ შეძლო ეთქვა, რომ ჩვენ პანდემიის პერიოდში არ შეგვიწყვეტია საგანმანათლებლო პროცესი. ამან გადაიარა სწორედ თქვენს მხრებზე“, - აღნიშნა თამარ ტალიაშვილმა.
ზეპირი მოსმენის ფარგლებში უკვე შედგა შეხვედრა არასამთავრობო და საერთაშორისო ორგანიზაციების და პროფესიული ასოციაციების წარმომადგენლებთან და უახლოეს პერიოდში ასევე დაგეგმილია ზეპირი მოსმენა აღნიშნული საკითხით დაინტერესებულ სხვა ჯგუფებთან.