პარლამენტის განათლებისა და მეცნიერების კომიტეტმა „COVID 19-ით გამოწვეული პანდემიის გავლენა ზოგადი განათლების სისტემაზე საქართველოში“ საკითხის თემატური მოკვლევის ფარგლებში, ზეპირი მოსმენა გამართა. ინფორმაციას პარლამენტის პრესსამსახური ავრცელებს.
თემატური მოკვლევის მიზანია, პანდემიის პირობებში მოსწავლისთვის ხარისხიან ზოგად განათლებაზე თანაბარი ხელმისაწვდომობის შესწავლა და ზოგადი განათლების მიმართულებით პანდემიით წარმოქმნილი გამოწვევების განსაზღვრა.
შეხვედრას განათლების სპეციალისტები, არასამთავრობო და საერთაშორისო ორგანიზაციების და პროფესიული ასოციაციების წარმომადგენლები ესწრებოდნენ.
სხდომაზე მოწვეულმა ორგანიზაციებმა ონლაინ სწავლების პირობებში სკოლების წინაშე არსებულ პრობლემებზე და გამოწვევებზე ისაუბრეს.
სამუშაო ჯგუფს აღნიშნულ საკითხთან დაკავშირებით მათი მოსაზრებები და რეკომენდაციები გააცნეს, რის შემდეგ შეხვედრა კითხვა-პასუხის ფორმატში წარიმართა.
განათლებისა და მეცნიერების კომიტეტის თავმჯდომარის და თემატური მოკვლევის ჯგუფის მთავარი მომხსენებლის, შალვა პაპუაშვილის განცხადებით, ზეპირ მოსმენებზე გამოთქმული წინადადებები და მოსაზრებები საბოლოო დასკვნაში აისახება, რის საფუძველზეც გაიცემა რეკომენდაციები.
„მიმდინარე კვირის განმავლობაში გვექნება შეხვედრები სხვადასხვა ჯგუფებთან. მათ შორის, პედაგოგებთან და სკოლის ადმინისტრაციის წარმომადგენლებთან. ასევე, განათლების სისტემაში ჩართულ ინსტიტუტებთან. საბოლოო ჯამში, თემატური მოკვლევის ჯგუფი და კომიტეტი დისკუსიის საფუძველზე შეიმუშავებს რეკომენდაციებს, რომელიც განიხილება შემდგომ განათლების სამინისტროსთან ერთად და გადაეცემა შესაბამის ინსტიტუტებს იმისთვის, რომ ეს რეკომენდაციები გაითვალისწინონ“, - აღნიშნა შალვა პაპუაშვილმა.
თემატური მოკვლევა ხორციელდება USAID-ის პროგრამა დემოკრატიული მმართველობის ინიციატივისა (GGI) და EGERYA Solution-ის მხარდაჭერით.