რადიო „კომერსანტის“ გადაცემაში „ცოდნა და წარმატება ნანა ტოხვაძესთან ერთად“ კოალიცია განათლება ყველასათვის - საქართველო“-ს დირექტორმა, გიორგი ჭანტურიამ განათლების სისტემაში მიღებული გადაწყვეტილებების ნაკლოვანებებზე ისაუბრა და განაცხადა რომ პროცესი არ არის თანამონაწილეობითი და მასში საზოგადოებისა და დაინტერესებული პირების ჩართულობა არ ხდება.

მისი განცხადებით, საქართველოში განათლების პოლიტიკა არის რეაქტიული და იმპულსური. „ასე საქმე არ კეთდება, თუნდაც პრემიერ-მინისტრის დონეზე გაცემული განკარგულებით, რომლის მიხედვითაც, თურმე კერძო სექტორში უნდა გადმოვიღოთ მკაცრი რეგულაციები,რომელიც რეალურად, არავის სჭირდება. ფორმალურად, შეიძლება მინისტრმა ახალი სამოქმედო გეგმა და სტრატეგია გვაჩვენოს, თუმცა მათში ახალი არაფერია, შინაარს,რომ დავანებოთ თავი, თავად პროცესია უკვე არასწორი. ვინაიდან, ეს სამოქმედო გეგმები და სტრატეგიები საზოგადოების, ორგანიზაციების, ექსპერტების ჩართულობის გარეშე მიიღება და არ არის თანამონაწილეობითი. ცენტრალიზებულად კი მხოლოდ სახელმწიფო, ამას ვერ გადაწყვეტს,- ამბობს გიორგი ჭანტურია. მან გადაცემაში მასწავლებელთა ეროვნული ჯილდოს მნიშვნელობაზე და მასწავლებლების ინდივიდუალურ პასუხისმგებლობაზე ისაუბრა.

მისი განცხადებით, მასწავლებელთა ეროვნული ჯილდოს მიზანი იყო,რომ შეექმნა საუკეთესო მასწავლებლების ქსელი, ისინი დასაყრდენი არიან, როგორც მასწავლებლებისთვის, ასევე გადაწყვეტილების მიმღები პირებისთვისაც, რომლებმაც პირდაპირ იციან, ვის უნდა მიმართონ. თავად მასწავლებლებმაც უნდა აიღონ ინდივიდუალური პასუხისმგებლობა და როცა რაღაც არ ხორციელდება სწორად, უნდა გამოხატონ საკუთარი პოზიცია.

„მასწავლებლეთა კორპუსში სერიოზული გამოწვევები გვაქვს, გასატარებელია ბევრი ცვლილება. ჩანაცვლების პოლიტიკა უკვე დაწყებულია და ბევრი მასწავლებელი, ნამდვილად ღირსეულად გაუშვეს. რაც შეეხება, გამოცდებს, გამოცდამ შეიძლება დაადასტუროს კვალიფიკაციის ცოდნა, თუმცა, მისი ჩაბარებით, ვერ ვიგებთ მასწავლებელი როგორია. გრძელვადიან პერიოდში უნდა ვნახოთ ვინ შედის პროფესიაში, აუცილებლად უნდა შეიქმნას სხვადასხვა სახის პროგრამები,რომლითაც ჩვენს მასწავლებლებს დავეხმარებით, შევამოწმებთ თუ რამდენად არიან ისინი მზად. უნდა აღინიშნოს,რომ მოთხოვნა ნამდვილად არის გაზრდილი, მათ შორის არიან მოტივირებული ახალგაზრდები,რომლებიც მზად არიან წავიდნენ რეგიონებშიც,- ამბობს გიორგი ჭანტურია.

მასალა მოამზადა ნათია კეკენაძემ