მთავრობის ეკონომიკური გუნდის შეფასებას ქვეყნის ეკონომიკურ ზრდასთან დაკავშირებით მცირე და საშუალო საწარმოთა ასოციაციის პრეზიდენტი მიხეილ ჭელიძე მხოლოდ ნაწილობრივ ეთანხმება. მისი თქმით, ეკონომიკა იზრდება წინა, უძრაობის წელთან შედარებით, ხოლო პანდემიამდელი მაჩვენებლების გაუმჯობესება არა მხოლოდ წლევანდელი, არამედ მომდევნო რამდენიმე წლის განმავლობაშიც გაჭირდება. მთავარი გამოწვევა, რაც დღესდღეობით სექტორში არსებობს, ჭელიძის განცხადებით, განათლების დაბალ დონეს და ქეშის დეფიციტს უკავშირდება.
,,პანდემიის გამო ბიზნესს ფინანსურ რესურსზე ხელმისაწვდომობა მაქსიმალურად შეეზღუდა. რეალურად გაყიდვაც აღარ იყო წინა 2020 წლის განმავლობაში და მაშინ გაჩერებული კომპანიების ნაწილი ვერც წელს ამოძრავდა. თუმცა მდგომარეობა აშკარად უკეთესია, ვიდრე შარშან იყო. ცვლილება განსაკუთრებით შესამჩნევია წინა წელთან შედარებით, ზოგადად ბიზნესი ნორმალურ მდგომარეობაშია, შეიძლება ითქვას, რომ მუშაობს. სტაბილურობა იგრძნობა, მაგრამ მომავალი განვითარებისთვის ეს არასაკმარისია. კრიზისიდან გამომდინარე, ბევრ ბიზნესს ქეშის დეფიციტი შეექმნა. მართალია, სახელმწიფო პროგრამების საშუალებით პრობლემა მეტნაკლებად მოგვარდა, მაგრამ არასაკმარისია. თუკი 2020 წელს სახელმწიფო არ იყო მზად და დროულად ვერ მოახდინა რეაგირება, 2021 წლის ბიუჯეტში ნაკლოვანებები გათვალისწინებული იყო და ეკონომიკაში ამან ზრდა მოგვცა. არაერთი პრობლემა მოგვარდა, მაგრამ გამოწვევად რჩება განათლების დონე და ქეშის საკითხი, მომდევნო წლებშიც ყველაზე მეტად ამ მიმართულებით მოგვიწევს მუშაობა“, - ამბობს მიხეილ ჭელიძე ,,კომერსანტთან“.
მისი თქმით, გაწეული ღონისძიებების მიუხედავად, პანდემიამდელი მდგომარეობასთან დასაბრუნებლად ბიზნესს სავარაუდოდ 2-3 წელი დასჭირდება იმ დროიდან, როცა ქვეყანა კორონავირუსს დამარცხებულად გამოაცხადებს.
გარდა ამისა, ჭელიძე ცალკე გამოყოფს სასტუმრო და სარესტორნო ბიზნესს, სადაც ბრუნვის ზრდას ახალი რეგულაციების დამტკიცება შეანელებს.
,,რეგულაციები ,,მწვანე პასპორტთან“ დაკავშირებით ბიზნესის ბრუნვას ამცირებს, იქიდან გამომდინარე, რომ მოსახლეობის ნახევარზე მეტი აუცრელია და, შესაბამისად, მათ სარესტორნო მომსახურებაზე წვდომა არ აქვთ, ამ სეგმენტს ჯერჯერობით ყველაზე მეტად გაუჭირდება“, - დასძენს ჭელიძე ,,კომერსანტთან“.
შეგახსენებთ, რომ 2021 წლის მესამე კვარტალში ბიზნესსექტორის ბრუნვა, წინა წლის ანალოგიურ მაჩვენებელთან შედარებით, 38,5%-ით გაიზარდა. საქართველოს ეკონომიკისა და მდგრადი განვითარების მინისტრის ნათია თურნავას განცხადებით, ბრუნვა გაზრდილია ფაქტობრივად ყველა სახეობის საქმიანობასა და ბიზნესსექტორის სხვადასხვა დარგში.
მაღალი ზრდის მაჩვენებელი ფიქსირდება განთავსების საშუალებებსა და საკვების მიწოდების მიმართულებებით, ეს არის რესტორნები და სასტუმროები, სადაც 86%-მდე არის გაზრდილი ბრუნვა.
მარი ჩიტაია