„მხოლოდ სფეროს არანაირი პრობლემა არ აქვს, მთლიანად ქვეყანას, საზოგადოებას და ბიზნესს აქვს პრობლემა. სამი უკიდურესად მძიმე რეალობაა, პოლიტიკური კრიზისი, ეკონომიკური კრიზისი და კოვიდ  კრიზისი, რომლის დაძლევის არანაირი პერსპექტივა არ ჩანს“,  -  ამის შესახებ რადიო „კომერსანტის“ გადაცემაში „კომერსანტის დილა“ საქართველოს რესტორატორთა ასოციაციის დამფუძნებელმა შოთა ბურჯანაძემ განაცხადა.

მისივე განცხადებით, ის უპერსპექტივობა, ფსიქოლოგიური წნეხი და ნიჰილისტური განცხადებები, რომელიც დაავადების კონტროლის წარმომადგენლებისგან მოდის მთლიანად ანგრევს ეკონომიკას.

„იმ პროცესებს რაც ქვეყანაში მიმდინარეობს სჭირდება ძალიან კომპეტენტური მიდგომა, იმისათვის რომ ეკონომიკა განვითარდეს და ეს პოლიტიკური კრიზისი საბოლოოდ დაიძრას. დღეს საზოგადოება და პოლიტიკოსები ცალკე არიან გამდგარი. ისინი  თავის საქმეს აკეთებენ და ფიქრობენ, რომ დანარჩენს ხელს არ  უშლიან, იმას რომ ეკონომიკას ხელი ეშლება, იმას რომ კოვიდ ვითარებას ხელი  ეშლება, ამას არავინ  უყურებს, შემდეგ ვიღაც გამოვა ძალიან მკაცრი და  ბრძენი სახით და ამბობს, რომ ქვეყანაში რესტორნები და სუფრები ქმნიან პრობლემას. თუ შეიძლება რეკომენდაციებიც მოაყოლონ როგორ უნდა ვიმუშაოთ, რომ არ გავრცელდეს ვირუსი.

გვაქვს ფოტოები, სადაც ჩანს, რომ სადღაც  სივრცეში, რომელიც რესტორანი არ არის, 500 კაციანი ქორწილები იმართება, რაღაც დანგრეული შენობა არის და ვიღაცას დარბაზი აქვს მოწყობილი, სადაც კლუბურ მუსიკას უკრავენ, ამას რა  საერთო აქვს რესტორანთან? აქედან გამომდინარე ამის ადმინისტრირება უნდა  ხდებოდეს და  არა ლოზუნგებით გამოსვლა, რომ რესტორანი ღუპავს ქვეყანას, მაშინ როდესაც ტურიზმი ახლდება, რა ქნას ტურისტმა რომ ჩამოვა, დიეტაზე იყოს?“ -  აღნიშნა შოთა ბურჯანაძემ.

შოთა ბურჯანაძემ აღნიშნა, რომ კორონავიურსით გამოწვეული პანდემია ისეთი შემთხვევაა, როცა მის მართვაში კომპეტენცია საქართველოს კი არა მთელ მსოფლიოსაც არ ჰყოფნის და ბიზნესი მას დევნას ვერ დაუწყებს.

„როდესაც სუფრაზე მიდის აქცენტი, მაშინ სად დაიფინცირდა იმნაძე, ცერცვაძე, გამყრელიძე, პრემიერ მინისტრი. სად ქეიფობდნენ ეს ადამიანები ისეთ რესტორანში მე რომ არ ვიცი, ან რას არღვევდნენ და რომელ ზომებს არ იღებდნენ, ამიტომაც ეს ისეთი ვირუსია, რომელსაც ჩვენ დევნას ვერ დავუწყებთ. სამწუხაროდ ამის კომპეტენცია არა მხოლოდ ჩვენ, არამედ მსოფლიოსაც არ ყოფნის, თორემ ეს  პრობლემა გადალახული იქნებოდა.

მე ხშირად მითქვამს გამყრელიძესთან და იმნაძესთან დაკავშირებით, რომ ესენი არიან კომუნისტური მენტალიტეტის ადამიანები, რადგან კომუნიზმში პარტია, ე.წ. ბოსები იყვნენ წარმოდგენილები და მათ საზოგადოებასთან არანაირი კავშირი არ ჰქონდათ, საზოგადოებას თვისთვის უნდა ეცხოვრა და მართლები მხოლოდ ეს „ბოსები“ იყვნენ.

დღეს თუ ვინმე თავის ბიზნესს მათრახით მართავს, ის  ბიზნესი წინ ვერ წავა. ასეა  სახელმწიფოც, თუ სახელმწიფო საზოგადოებას მათრახით მართავს და ხმამაღალი ტონით ელაპარაკება ამას საზოგადოება არ მოითმენს. ნახეს უკვე ადამიანებმა თავისუფლება და ეს ე.წ. რკინის ფარდა აღარ არსებობს. როდესაც გამყრელიძე გეუბნება, რომ  საზოგადოებამ  უნდა გაითვალისწინოს და არ იაროს რესტორნებში და მერე ეს საზოგადოება ცნობადი ადამიანების ქეიფს უყურებს ეს უკვე ორმაგი სტანდარია“,  - აღნიშნა შოთა ბურჯანაძემ.

ბურჯანაძე ამბობს, რომ ვირუსის მართვა წარმატებით არ მიმდინარეობს, რადგან ვირუსის გავრცელების და სიკვდილიანობის მაჩვენებელი კვლავ მაღალია და ეკონომიკა დაიქცა.

„შეიძლება ამ ადამიანებმა თავისი ღვაწლი დაფასებულად ჩათვალონ, მადლობა თქვან და სხვა ადამიანებს მისცენ მართვის შესაძლებლობა. მთავრობა ყველაზე კომფორტულ რეჟიმშია, მთელი პასუხისმგებლობა გადატანილია მედიკოსებზე, ესენიც იღებენ ამ პასუხისმგებლობას, შევიდნენ ამ თამაშში და უხარიათ, რომ ყველაფერში ჩართულები არიან და ამ ასაკში კვლავ საჭირო აღმოჩნდნენ.

გამყრელიძეს ვერ გავაგებინე, რომ დღეს საქართველოში 21-ე საუკუნეში  რესტორნის დეფიცინირება შეუძლებელია, აღარ არის ის მხოლოდ და მხოლოდ დიდი შეკრებების და ქეიფის სივრცე. დღეს სხვა რეალობაში ვართ, არის კაფე-ბარები სადაც საქმიანი  შეხვედრებია, არის სივრცეები სადაც საუზმობ, ვახშმობ, მიდიხარ სადღაც  და ერთ  ჭიქა ღვინოსაც ვერ მიირთმევ იმიტომ რომ მანქანით ხარ წასასვლელი.

დღეს შაბათ-კვირას არ მუშაობს რესტორნები, ადამიანები რომლებიც მუშაობენ კვირის დღეებში და შეუძლიათ რომ შაბათ-კვირას ფული დახარჯონ ამის შესაძლებლობა არ აქვთ და ეს  ეკონომიკაზე აისახება. ამას  კარგავს  ქვეყანა, სადაც ლარის კურსი 3.45 -ია და ბენზინის ფასი  4 ლარამდეა გაზრდილი“, -  აღნიშნა შოთა ბურჯანაძემ.

მოამზადა თაკო კვაჭანტირაძემ