კორონავირუსზე განისაზღვრება და დადგინდება ტესტირების ფასი, რომელსაც სახელმწიფო უზრუნველყოფს. ამის შესახებ დაავადებათა კონტროლისა და საზოგადოებრივი ჯანდაცვის ეროვნული ცენტრის დირექტორმა ამირან გამყრელიძემ 20 მარტს გამართულ ბრიფინგზე განაცხადა. ამასთან, კორონავირუსზე ტესტირება შესაძლოა კერძო ლაბორატორიებმაც ჩაატარონ.
„საქართველოში სამედიცინო დაწესებულების უმრავლესობა, 80% გახლავთ კერძო, მათ აქვთ ძალიან კარგი ლაბორატორიები, სადაც შეუძლიათ იქნება ეს PSR ტექნოლოგიაზე დამყარებული ანუ მოლეკულურ ტექნოლოგიებზე დამყარებული ტესტირება თუ სხვა სწრაფი ტესტების ჩატარება და რა თქმა უნდა, ეს შესაძლებელია. დღეს პრემიერ-მინისტრის მხრიდან დავალება მიცემულია ჯანდაცვის სამინისტროსთვის, რომ უნდა განისაზღვროს და დადგინდეს ტესტირების ფასი, რომელსაც სახელმწიფო უზრუნველყოფს, რადგან ეპიდემიების დროს ტესტირების კომერციალიზაცია არ ხდება და დღეს ჩვენ გვაქვს პანდემია მსოფლიოში.
„ამ დროს ყველაფერს თავის თავზე იღებს სახელმწიფო, რათა ადამიანებისთვის ის იყოს ფინანსურად ხელმისაწვდომი. ამიტომ განისაზღვრება ოპტიმალური ფასი სწრაფი ტესტის, ანტიგენზე დამყარებული, ანტისხეულზე დამყარებული, PSR-ის და შესაბამისად, უფლება ექნება ყველას, ვისაც შეუძლია ამ ტესტირებების ჩატარება და რა თქმა უნდა, ამას აანაზღაურებს შესაბამისი სახელმწიფო პროგრამა," - განაცხადა გამყრელიძემ.
უნდა აღინიშნოს ისიც, რომ 19 მარტს პარტია „ახალი საქართველოს" თავმჯდომარემ, გიორგი ვაშაძემ თქვა, რომ ბიუროკრატიის გამო, ხუთი კომპანიის მიერ ტესტების შემოტანაზე უარის თქმა შეცდომაა და არ გამორიცხავს, სწრაფი ტესტების საფასურით სპეკულირება მოხდეს. თანაც, ოპოზიციონერმა ლიდერმა მზადყოფნა გამოთქვა შესაბამისი უფლებამოსილების მიღების შემთხვევაში ჩინეთიდან ნაჩუქარი 1000 ტესტი ჩამოიტანოს.
ვაშაძემ პრემიერ-მინისტრს მიმართა და აღნიშნა, რომ ეს პირადად გიორგი გახარიას პასუხისმგებლობაა, რომ დღემდე საქართველოში სწრაფი ტესტი არ არის.
ვაშაძის განცხადებას გამყრელიძემ უპასუხა, რომ ტესტების მომწოდებლებთან დაკავშირებაში დახმარება მათ არ სჭირდებათ.
„დიდი მადლობა ბატონ გიორგის ამ შემოთავაზებისთვის, მაგრამ მეგონა, რომ შემოგვთავაზებდა, ტესტებს გვაჩუქებდა და ძალიან დიდ მადლობას გადავუხდიდი, რადგან, გვარს არ დავასახელებ, რამდენიმე ადამიანმა შესწირა და გადმოგვცა ტესტიც. ასევე, სხვათა შორის, ფულადი სახსრებითაც დაეხმარა დაავადებათა კონტროლის ცენტრს.
გაზეთი „რეზონანსი“