გალის რაიონში რუსულად გადაკეთებულ ქართულ სკოლებში დარჩენილ ერთადერთ ქართულ სექტორს - მე- 11 კლასს დღეიდან, 14 სექტემბრიდან, რუსულად მოუწევს სწავლის გაგრძელება. ქართული ენას კი ,,უცხო ენის“ სტატუსი აქვს. როგორც ,,კომერსანტს“ ოკუპირებული გალის რაიონის ერთ-ერთი სკოლიდან აცნობეს, აქამდე მე- 11 კლასი ერთადერთი ქართული სექტორი და ისიც რუსულ სწავლებაზე გადაიყვანეს. ქართული ენის მასწავლებელს კი საბოლოოდ უცხო ენის პედაგოგის სტატუსი მიენიჭა.

,,უმძიმეს მდგომარეობაში ვართ, არავინ ფიქრობს სწავლის ხარისხზე, მთავარია რუსულად გადაკეთდეს სკოლა, იდეა-ფიქსად იქცა, რომ ქართული არ ისწავლებოდეს. რუსული კადრი კი სკოლაში არ არის. ფორმალური სწავლებაა, რის შედეგიც არავის აინტერესებს. არადა, როგორი ნიჭიერი ბავშვები გვყავს, რომელთა უფლებები ყოველდღე წარმოუდგენელ დონეზე ირღვევა. აქ უცხო ენის მასწავლებლის სტატუსი მაქვს, ქართულ ენას უცხო ენის სტატუსი მიანიჭეს. ისიც საკვირველია, რომ საერთოდ მაძლევენ მშობლიური საგნის სწავლების უფლებას“, - ამბობს გალში მომუშავე მასწავლებელი.

გალის რაიონის საგანმანათლებლო რესურსცენტრის ცნობით, გალის რაიონის ზედა და ქვედა ზონაში დარჩენილი 19 სკოლის 1-ელ- მე-11 კლასებში ქართულ ენასა და ლიტერატურას აქამდე სულ 28 საათი ეთმობოდა, დანარჩენი საგნების სწავლება რუსულ ენაზეა. ამ დროს რუსულ ენასა და ლიტერატურას კი 79 საათი ეთმობოდა, გალის ქვედა და ზედა ზონის სკოლებში - 57 საათი.

ცხადია, 14 სექტემბრიდან ეს მონაცემის შეიცვლება.

გალელი მასწავლებლების ინფორმაციით, საგნები სკოლებში რუსეთის ფედერაციისთვის განკუთვნილი ძვირადღირებული წიგნებით ისწავლება და იმდენად მოძველებული ენითაა ეს ლიტერატურა დაწერილი, რომ თვითონ პედაგოგებსაც უჭირთ გაგება.

მარი ჩიტაია