„ვისოლ პეტროლიმ ჯორჯიას“ შემოსავალი 2019 წელს 2018 წელთან შედარებით 24 მლნ ლარით 467 მლნ ლარამდე გაიზარდა. ამის შესახებ „დელოიტი და ტუშის“ მიერ მომზადებულ კონსოლიდირებულ აუდიტის დასკვნაშია ნათქვამი.
ანგარიშის მიხედვით გაყიდვებიდან მიღებული მოგება შედარებით მცირე თანხით - 7 მლნ ლარით 55 მლნ ლარამდე გაიზარდა. წლის განმავლობაში გაყიდვებისა და დისტრიბუციის ხარჯმა 27 მლნ შეადგინა, 28 მლნ-ით ნაკლები ვიდრე 2018 წელს. 25 მლნ-ით 15 მლნ-მდე შემცირდა ადმინისტრაციული ხარჯებიც. თუმცა 5 მლნ-დან 11 მლნ-მდე გაიზარდა გაცვლითი კურსის სხვაობით მიღებული ზარალი. საანგარიშო პერიოდში ყველაზე მეტად - 34 მლნ-ით 39 მლნ-მდე სხვა შემოსავალი გაიზარდა. წლიურმა მოგებამ გადასახადების გადახდის შემდეგ 26 მლნ ლარი შეადგინა, რაც წინა წლის მაჩვენებელს 86 მლნ-ით აღემატება. 2018 წელს ვოსოლის ზარალი 60 მლნ ლარი იყო.
2019 წელს "ვისოლის" აქტივების მოცულობა 29 მლნ ლარით 249 მლნ ლარამდე გაიზარდა, საიდანაც 79 მლნ ლარის აქტივები მიმდინარე იყო, 170 მლნ-ის კი გრძელვადიანი.
სს „ვისოლ პეტროლიუმ ჯორჯია“ დახურული სააქციო საზოგადოებაა, რომელიც 2000 წელს დაფუძნდა. ჯგუფი საქართველოში მდებარე 146 ბენზინ და გაზგასამართ სადგურს ამუშავებს, რომელთაგან 128 ბენზინის, 6 გაზისა და 12 კომბინირებული სადგურია. ჯგუფს დამატებით 97 სადგური (84 ბენზინის, 3 გაზისდა 9 კომბინირებული სადგურები)იჯარით აქვს აღებული.
2019 წლის ბოლოს დაქირავებულ თანამშრომელთა რაოდენობა ვისოლ პეტროლიუმ ჯორჯიაში შეადგენდა 1430, ჯგუფში კი - 1484-ს.
ვისოლს ქართულ ბაზარზე 4 მთავარი კონკურენტი ჰყავს: სოკარი, ლუკოილი, გალფი და რომპეტროლი, ლუკოილი და რომპეტროლი შედარებით მცირე ზომისანი არიან, სოკარი ბუნებრივი გაზის დისტრიბუციითაცაა დაკაცებული, შესაბამისად შედარებისთვის უკეთეს ვარიანტად გალფი რჩება.
2019 წელს გალფის შემოსავალი 79 მლნ ლარით 468 მლნ-მდე გაიზარდა, ხოლო მოგება 12 მლნ ლარით 67 მლნ-მდე. გაყიდვისა და დისტრიბუციის ხარჯებმა 33 მლნ ლარი შეადგინა, ადმინისტრაციულმა ხარჯებმა - 14 მლნ. ყველა სხვა ხარჯისა და გადასახადების დაფარვის შემდეგ წმინდა მოგება 15 მლნ დარჩა, 7 მლნ ლარით მეტი ვიდრე 2018 წელს.
გალფში აქტივების ღირებულება 1 წელიწადში 62 მლნ ლარით 231 მლნ-მდე გაიზარდა.
შპს „სან პეტროლიუმ ჯორჯია“ იგივე გალფი 2010 წლის 30 ნოემბერს დაფუძნდა. ჯგუფმა ბენზინგასამართი სადგურების ქსელის შექმნა 2011 წლის მარტში დაიწყო ძირითადად მესამე მხარეებისგან აქტივების - ბენზინგასამართი სადგურებისა და ბენზინის შესანახი დეპოს შესყიდვისა და გარემონტების გზით.
2019 წლის 31 დეკემბრის მდგომარეობით, ჯგუფი ამუშავებდა საქართველოში მდებარე 149 (2018: 144) ბენზინგასამართ სადგურს, რომელთაგან 86 (2018: 88) ბენზინგასამართ სადგურს საკუთრებაში ფლობდა კომპანია მის შვილობილ კომპანიებთან ერთად, დანარჩენები იჯარითაა აღებული. 2019 წლის 31 დეკემბრის მდგომარეობით გალფი 1538 ადამიანს ასაქმებდა.
გიორგი ელიზბარაშვილი
გალფი
