ინვესტორები „გალერია თბილისით“ და „პარაგრაფ შეკვეთილით“ დაინტერესდნენ, თუმცა პროექტების გასხვისების პროცესი ჩაიშალა. როგორც„კომერსანტს“ „თანაინვესტირების ფონდის“ აღმასრულებელმა დირექტორმა, ცოტნე ებრალიძემ განუცხადა კორონავირუსით გამოწვეული პანდემიის გამო, მრავალმილიონიანი პროექტების გასხვისების პროცესი რამდენიმე წლით გადავადდა. საქართველოს უმსხვილესი საინვესტიციო ფონდის დირექტორი აცხადებს, რომ საქართველოში ზოგადად ინვესტორებს დაბალი გადასახადები და ბიზნესის წარმოების სიმარტივე იზიდავდა. თუმცა მისი განმარტებით, დღეს ზოგადად მთელი მსოფლიოს მასშტაბით ინვესტიციები მნიშვნელოვნადაა შემცირებული და სანამ მდგომარეობა არ გამოსწორდება მანამდე ინვესტორების გააქტიურებას ისეთი პერიფერიული ბაზრების მიმართულებით როგორიც საქართველოა არ უნდა ველოდოთ.

„როგორც მოგეხსენებათ, ყველა კერძო საინვესტიციო ფონდის ინტერესი ინვესტიციის განხორციელება და შემდეგ სხვადასხვა მექანიზმის საშუალებით კომპანიის საინვესტიციო წილს გასხვისებაა. ჩვენ, პანდემიამდე რამდენიმე პროექტში სწორედ ამ ეტაპზე მივედით და რამდენიმე თვით ადრე დავიწყეთ ინვესტორებთან მოლაპარაკებების წარმოება, ისეთი პროექტების თაობაზე როგორიცაა: „გალერია თბილისი“ და „პარაგრაფ შეკვეთილი“, თუმცა პანდემიით გამოწვეული მსოფლიოში მიმდინარე მოვლენებიდან გამომდინარე, ეს პროცესი მინიმუმ ერთი, ხოლო საშუალოდ 2-3 წლით გადაიდო, ვინაიდან ახლა ინვესტორები ძირითადად აქტივების იაფად შეძენით არიან დაინტერესებული“, - განაცხადა ცოტნე ებრალიძემ.

ცოტნე ებრალიძე კომერსანტთან აცხადებს, რომ ზოგადად მსოფლიოს მასშტაბით და რეგიონშიც მნიშნელოვნად აღინიშნებოდა პირდაპირი უცხოური ინვესტიციების შემცირება, შედეგად აღნიშნული ტენდენციის ასახვა მისი თქმით, საქართველოშიც მოსალოდნელი იყო. იქედან გამომდინარე, რომ „თანაინვესტირების ფონდის“ სტრატეგიული მიმართულებებია: სოფლის მეურნეობა და ლოგისტიკა, ტურიზმი და უძრავი ქონება, ენერგეტიკა და ინფრასტრუქტურა, მრეწველობა. ებრალიძეს ვკითხეთ, რა გამოწვევები აქვს ქვეყანას ფონდის ოთხი ძირითადი საინვესტიციო მიმართულების კუთხით:

 „ზოგადად, დღეისათვის ნებისმიერი დარგისთვის მთავარი გამოწვევა კოვიდ-19-ის შედეგად განვითარებული მოვლენებია. ქვემოთ ვეცდებით უფრო დავაკონკრეტოთ მდგომარეობა თითოეული დარგის მიხედვით, ჩვენი პროექტების ჭრილში:

უძრავი ქონების მიმართულებით მოგეხსენებათ, რომ ჩვენი პროექტების უმეტესობა ე.წ. კომერციულ უძრავ ქონებას წარმოადგენს (სასტუმროები, საოფისე ფართები, სავაჭრო ცენტრები და ა.შ.). ამ დარგში დღეს ძირითადი გამოწვევა კოვიდი და მისი თანმდევი ეფექტებია, რამაც მნიშვნელოვნად დააზარალა სექტორი. კომერციული უძრავი ქონების ერთმა ნაწილმა პანდემიით გამოწვეული შეზღუდვების გამო საერთოდ დაკარგა შემოსავალი, ხოლო მეორე ნაწილმა შემოსავლის მნიშვნელოვანი წილი ვერ მიიღო, ეს კი იმის პარალელურად რომ ამ სექტორში ხარჯების შემცირება ძალიან ძნელია და ხშირად გასავლების საკმაოდ დიდ ნაწილს ბანკის სესხის მომსახურების ხარჯი წარმოადგენს. უახლოეს მოკლევადიან პერიოდში მიგვაჩნია, რომ სამწუხაროდ ეს სექტორი შესაძლოა კიდევ უფრო დაზარალდეს, თუმცა ვიმედოვნებთ რომ მომდევნო ორი წლის განმავლობაში მდგომარეობა გამოსწორებას დაიწყებს რაც გარკვეულწილად ახალ შესაძლებლობებსაც გააჩენს დარგში.

ენერგეტიკის სექტორს რაც შეეხება, აღსანიშნავია, რომ პანდემიამ დროებით შეაფერხა პროექტების განხორციელება, მაგრამ ჯამში მნიშნელოვანი და ფართომასშტაბიანი პრობლემების წინაშე არ დავმდგარვართ. როგორც ყოველთვის, ახალაც განსაკუთრებით ამ სექტორში მნიშვნელოვანია სახელმწიფოს მიერ სწორი პოლიტიკის გატარება, რაც ენერგოდამოუკიდებლობის მნიშვნელობასთან დაკავშირებით, მოსახლეობის მეტ ინფორმირებულობაში გამოიხატება.

სოფლის მეურნეობის კუთხით, შეიქმნა გარკვეული ლოჯისტიკური პრობლემები, თუმცა ჯამში გამოწვევების მიუხედავად სხვა დარგებთან შედარებით ყველაზე ნაკლები ნეგატიური ეფექტი სწორედ ამ დარგმა განიცადა. მომავალშიც ვიმედოვნებთ, რომ მდგომარეობა სტაბილურად შენარჩუნდება, ხოლო მას შემდეგ რაც ეპიდემიოლოგიური მდგომარეობა გამოსწორდება აქაც შეიძლება ტურიზმის და ეკონომიკის ზრდის ფონზე  პროგრესის მოლოდინი.

როგორც მოგეხსენებათ, მრეწველობის მიმართულებით ჩვენ ერთ პროექტში, კერძოდ „ჰაიდელბერგ ცემენტში“ გვაქვს ინვესტიცია განხორციელებული. ამ შემთხვევაშიც სხვა  ზემოთხსენებულ სექტორებთან შედარებით პანდემიის ეფექტი ყველაზე ნაკლებად აისახა, თუმცა გამოწვევად რჩება ბაზრის დაცვა იმპორტირებული საქონლისაგან, რომელიც ხშირად სტანდარტებს ვერ აკმაყოფილებს ან დემპინგურ ფასად შემოდის“, - განმარტავს ცოტნე ებრალიძე.

ბაჩო ადამია