Toyota 2019 და 2020 წლის RAV4-სა და RAV4 ჰიბრიდებს უკან იწვევს. მიზეზი ქვედა ბერკეტია, რომელიც შეიძლება გატყდეს, წინა თვლისგან განცალკევდეს და ავარია გამოიწვიოს. გაწვევა 9502 კროსოვერს შეეხება, რომელიც კომპანიამ 2019 წლის სექტემბერ-ოქტომბერში ააწყო.Toyota-ს განცხადებით პრობლემა ფოლადით მომმარაგებლის მხრიდან უხარისხო საქონელის მიწოდების გამო წამოიშვა.
„კომერსანტი“ დაინტერესდა გავა თუ არა საქართველოს ბაზრიდან Toyota-ს 2019 და 2020 წლის კონკრეტული მოდელები. „ტოიოტა ცენტრ თბილისის“ დამფუძნებელი ირაკლი გურჩიანი აღნიშნავს, რომ ეს ფაქტი საქართველოს ბაზარს ჯერჯერობით არ უკავშირდება.
„ავტომობილის გაწვევა“ ე.წ. „რიქოლი“ მსოფლიო ავტომწარმოებლებში გავრცელებული პრაქტიკაა და ხშირ შემთხვევაში არ გულისხმობს მიმდინარე პრობლემის არსებობას, არამედ მიზნად ისახავს შესაძლო გაუმართაობის თავიდან აცილებას.
ამ სტანდარტული პროცედურის ფარგლებში ხდება შესაძლო ხარვეზის მატარებელი ავტომობილის მფლობელთან პირადად დაკავშირება, მისი მოწვევა სერვის ცენტრში და „სერვისის სპეციალური კამპანიით“ გათვალისწინებული სამუშაოების უფასოდ ჩატარება.
თქვენს მიერ ხსენებულ რიქოლთან დაკავშირებით ჩვენ ცოტა ხნის წინ მივიღეთ დაზუსტებული ინფორმაცია და შესაბამისად ჩვენი სერვისის განყოფილება უკვე მუშაობს აღნიშნული პროცედურების შესაბამისად.
ჩვენს მიერ გაყიდული მანქანებიდან სულ რამოდენიმე ავტომობილი არის მოხვედრილი აღნიშნულ სიაში, თუმცა ვინაიდან „ტოიოტა“ მუდმივად ზრუნავს თავისი მომხმარებლების კომფორტზე და უსაფრთხოებაზე, მეორად ბაზარზე შეძენილი ავტომობილების მფლობელებსაც აქვთ საშუალება გადაამოწმონ თავისი ავტომობილის უნიკალური ვინ კოდი ტოიოტას საიტზე და „სერვისის სპეციალური კამპანიის“ სიაში ვინ ნომრის დაფიქსირების შემთხვევაში ისარგებლონ ზუსტად ესეთივე უფასო სერვისით,-აცხადებს გურჩიანი.
ნათია ლომიძე
ტოიოტა ცენტრი თბილისი
