პანდემიის დაწყების შემდეგ მსოფლიოში 50 ახალი, ჯანდაცვის სექტორთან დაკავშირებული მილიარდერი გაჩნდა.
ისინი ფლობენ აქციებს და წილებს კომპანიებში, რომლებიც მუშაობენ კორონავირუსის ვაქცინაზე და წამალზე, ასევე აწარმოებენ სამედიცინო მოწყობილობებს და ინდივიდუალური დაცვის საშუალებებს.
მათი ქონების ზრდა ამ კომპანიების ღირებულების სწრაფმა მატებამ გამოიწვია. ახალი „ჯანდაცვითი“ მილიარდერების უმრავლესობა ჩინელია, თუმცა, არა ყველა.
მათ შორის ყველაზე წარმატებულები აღმოჩნდნენ:
უგურ შახინი - გერმანული ბიოტექნოლოგიური კომპანია BioNTech-ის დამფუძნებელი და გენერალური დირექტორი. სწორედ BioNTech-მა ამერიკულ Pfizer-თან ერთად შექმნა კორონავირუსის ვაქცინა, რომლის ეფექტურობაც 95%-ია. წლის დასაწყისიდან კომპანიის აქციები 160%-ით გაძვირდა, ამ ფონზე კი, BioNTech-ის 17% - ის მფლობელის უგურ შახინის ქონებამ 4,2 მლრდ. დოლარს მიაღწია.
სტეფან ბანსელი - ამერიკული ფარმაცევტული კომპანია Moderna-ს აქციონერი. კომპანიამ უკვე შექმნა ვაქცინა, რომელიც, ისევე როგორც Pfizer-ს პრეპარატი, შტატებში ოფიციალურად აღიარეს.
2020 წლის მარტში მან თავისი წილი კომპანიაში 9%-დან 6%-მდე შეამცირა, თუმცა, პარალელურად Moderna-ს აქციები 550%-ით გაძვირდა. სადღეისოდ ბანსელის ქონება 4,1 მლრდ. დოლარს შეადგენს.
იუან ლი პინი — Shenzhen Kangtai Biological Products-ის აქციათა 24%-ის მფლობელი. კომპანია ჩინეთში წამლების ერთ-ერთი უმსხვილესი მწარმოებელია, ის ასევე ბრიტანული AstraZeneca-ს მიერ დამუშავებულ ვაქცინას აწარმოებს.
წლის დასაწყისიდან Shenzhen Kangtai Biological Products-ს აქციები 90%-ით გაძვირდა, იუანის ქონება კი 4,1 მლრდ. დოლარამდე გაიზარდა.
ხუ კუნი - ჩინური Contec Medical Systems-ის დირექტორი და აქციონერი. კომპანია სამედიცინო აღჭურვილობას აწარმოებს. აგვისტოში კომპანიამ ბირჟაზე აქციები გაიტანა. ხუ კუნი აქციების 50%-ს ფლობს, რომელთა ღირებულება IPO-ს შემდეგ 150%-ით გაიზარდა. ხუ კუნის ქონება 3,9 მლრდ. დოლარად შეფასდა.
კარლ ჰანსენი - კანადური AbCellera-ის აქციონერი. კომპანია ხელოვნური ინტელექტის გამოყენებით დაავადებათა მკურნალობის პერსპექტიულ გზებს იკვლევს. მისი ქონება 2,9 მლრდ. დოლარია.
ტიმოტი სპრინგერი - Moderna-ს თანადამაარსებელი, მისი წილი კომპანიაში 3,5%-ს შეადგენს. პარალელურად სპრინგერი ინვესტიციებს ასევე სხვა ბიოტექნოლოგიურ კომპანიებში დებს. მისი ქონება 2 მლრდ. დოლარს შეადგენს.
სერჯიო სტევანატო - იტალიური Stevanato Group-ის მფლობელი. კომპანია არის შუშის ფლაკონების სიდიდით მეორე მწარმოებელი მსოფლიოში. კორონავირუსის საწინაამღდეგო 40 ვაქცინა სწორედ ამ კომპანიის ფლაკონებში მოთავსდება.
სტევანატოს ქონება 1,8 მლრდ. დოლარს შეადგენს.
2020 წლის შედეგებით, მსოფლიოში 2 200 მილიარდერი 19 ტრლნ. დოლარით გამდიდრდა, მათი ჯამური ქონება 11,4 ტრლნ. დოლარს შეადგენს - ეს 20% მეტია, ვიდრე 2019 წლის ბოლოსთვის.
გამდიდრების ძირითადი წყარო საფონდო ბირჟებზე აქციების გაძვირება გახდა, რომელიც მთელი წლის მანძილზე გრძელდებოდა.
ყველაზე მეტად, 110 მლრდ.-ით, 136 მლრდ. დოლარამდე ილონ მასკის ქონება გაიზარდა, შედეგად ის მსოფლიოს უმდიდრესი ადამიანების რეიტინგში მე-3 ადგილზე. ხოლო მსოფლიოს უმდიდრესი ადამიანი ჯეფ ბეზოსი 2020 წელს 67,5 მლრდ.-ით, 182 მლრდ.-მდე გამდიდრდა.
forbes.ge