„ აუცილებელია, შრომის უსაფრთხოების სპეციალისტების მომზადების პროცესის დაჩქარება, მნიშვნელოვანია, რომ კერძო სექტორს და განსაკუთრებით შრომის უსაფრთხოების აკრედიტებული პროგრამის მიმწოდებელ დაწესებულებებს დროულად მიეწოდოთ ინფორმაცია, როდის და რა ფორმით იგეგმება სწავლის განახლების პროცესი - რომ ამ მიმართულებით სახელმწიფოს პოლიტიკა იყოს მაქსიმალურად განჭვრეტადი და უფრო მეტად აღარ დაზიანდეს ბიზნესი,“ - ამის შესახებ ევროპული ბიზნეს ასოციაციის გამგეობის თავმჯდომარემ ჯონ ჰიუგო ბრაეკეველდტმა ასოციაციის პოზიცია გაავრცელა.

შრომის უსაფრთხოების შესახებ საქართველოს ორგანული კანონის თანახმად, დამსაქმებელი ვალდებულია ჰყავდეს 1 ან მეტი შრომის უსაფრთხოების სპეციალისტი ან აღნიშნული მიზნით შექმნას შრომის უსაფრთხოების სამსახური“, თუმცა, დღესდღეობით იმ სასწავლო ორგანიზაციებს, რომლებიც შრომის უსაფრთხოების სპეციალისტთა გადამზადების პროგრამას ახორციელებენ, უკვე მეექვსე თვეა შეჩერებული აქვთ ეს საქმიანობა და სასწავლებლები მოლოდინის რეჟიმში არიან.

ევროპულ ბიზნეს ასოციაციაში მიიჩნევენ, რომ გადამზადების პროგრამების შეჩერების საკითხი პრობლემურია, რადგანაც შრომის პირობების ინსპექტირების დეპარტამენტის მიერ ბიზნეს ოპერატორის შემოწმებისას დარღვევად ფიქსირდება შრომის უსაფრთხოების სპეციალისტის არარსებობა კომპანიაში, მაშინ როცა შრომის ბაზარზე სპეციალისტების დეფიციტია შექმნილი.

„შრომის უსაფრთხოების კუთხით კულტურის ამაღლება კვლავ გამოწვევად რჩება და მხოლოდ ინსპექტორთა მანდატის გაფართოებით პრობლემა ვერ გადაიჭრება. კულტურის ამაღლება ხანგრძლივი პროცესია და მის დასაჩქარებლად, უპირველესად, დასაქმებულთა და დამსაქმებელთა ცნობიერების გაზრდისთვის სწორი და თანმიმდევრული პოლიტიკის გატარებაა საჭირო შესაბამისი პასუხისმგებელი ორგანოების მხრიდან.

COVID-19-ის შედეგად შექმნილი მდგომარეობის ფონზე კიდევ უფრო მეტი დატვირთვა შეიძინა შრომის უსაფრთოების სტანდარტების და ჰიგიენის ნორმების დაცვამ. ასეთ დროს შრომის უსაფრთხოების სპეციალისტების ჩართვა და კორონავირუსის უარყოფითი ეფექტის შემცირებაში მონაწილეობა შეიძლება ითქვას, რომ გადამწყვეტ მნიშვნელობას იძენს.

პანდემიასთან ბრძოლისთვის საჭიროა ქვეყანაში იყოს საკმარისი რაოდენობის გადამზადებული და მაღალკვალიფიციური კადრები, რომლებიც დაეხმარება ბიზნესს უსაფრთხო შრომის გარემოს შექმნაში, რაც შესაბამისი სპეციალისტების გადამზადების პროგრამების შეჩერებით ფაქტობრივად შეუძლებელია.

ამათან, იმის გათვალისწინებით, რომ დღეს ქვეყანაში აქტიურად განიხილება შრომის ინსპექციის მანდატის გაფართოების საკითხი, აუცილებელია, რომ გაფართოებული მანდატის მქონე შრომის ინსპექციას ბიზნესი დახვდეს სათანადოდ მომზადებული კვალიფიციური კადრებით,“- განმარტავს ჯონ ჰიუგო ბრაეკეველდტი.

ევროპული ბიზნეს ასოციაცია (EBA) 100-ზე მეტ ქართულ და ევროპულ კომპანიას აერთიანებს. მისი მისია მოიცავს საქართველოში ევროპული ბიზნესის ადვოკატირება/ლობირებას, საქართველოსა და ევროპას შორის ვაჭრობისა და ინვესტიციების ხელშეწყობას.

მარიამ მორგოშია