გაეროს გენმდივნის მოადგილემ როზმარი დიკარლომ უშიშროების საბჭოს 22 თებერვლის საგანგებო სხდომაზე განაცხადა, რომ რუსეთის მხრიდან დონბასში სეპარატისტების მიერ კონტროლირებადი რეგიონების აღიარება არღვევს უკრაინის სუვერენიტეტს და ტერიტორიულ მთლიანობას.

დიკარლოს თქმით, „მსხვილმასშტაბიანი კონფლიქტის რისკი რეალურია და ნებისმიერ ფასად უნდა აღიკვეთოს ის“.

აშშ–ის მუდმივი წარმომადგენელი: პუტინი ომის საბაბს ქმნის

პუტინის სატელევიზიო გამოსვლა, რომელშიც მან დონეცკი და ლუგანსკი აღიარა, მთელ რიგ აღმაშფოთებელ და ცრუ განცხადებებს შეიცავდა, რომლებიც ომის საბაბის შესაქმნელად იყო მიმართული. ამის შესახებ გაეროში აშშ–ის მუდმივმა წარმომადგენელმა ლინდა თომას–გრინფილდმა განაცხადა. „ის სამშვიდობოებს უწოდებს მათ. ეს სისულელეა. ჩვენ ვიცით, ვინ არიან ისინი სინამდვილეში“, – თქვა მან პუტინის გადაწყვეტილებასთან დაკავშირებით, რომელმაც სეპარატისტების მიერ კონტროლირებად უკრაინის ტერიტორიაზე რუსეთის ჯარების შესვლის განკარგულებას მოაწერა ხელი.

„რუსეთის პრეზიდენტი ჩვენ საერთაშორისო სისტემას ტესტავს, ის ჩვენ სიმტკიცეს ამოწმებს“, – განაცხადა გრინფილდმა. მისივე თქმით, პუტინი აპირებს დაამტკიცოს, რომ ძალისმიერი მეთოდით შეუძლია გაერო ფარსად გადააქციოს. „ჩვენ შეთანხმებულად უნდა ვუპასუხოთ ამ კრიზისს“, – თქვა ამერიკელმა დიპლომატმა.

ჩინეთის მუდმივმა წარმომადგენელმა ყველას თავშეკავებისკენ მოუწოდა

თავის მხრივ, ჩინეთის მუდმივმა წარმომადგენელმა გაეროში ჩჟან ცზიუნმა კონფლიქტის ყველა მხარეს თავშეკავებისკენ და დიალოგისკენ მოუწოდა. პეკინი იმედს გამოთქვამს, რომ მხარეები კონსტრუქციულ პოზიციას და იკავებენ და შეიმუშავებენ საგზაო რუკასა მინსკის შეთანხმების უპირობო შესრულებისთვის. მას არაფერი უთქვამს დონეცკისა და ლუგანსკის აღიარებაზე და უკრაინის ამ რეგიონებში ჯარის შეყვანის გადაწყვეტილებაზე ოფიციალური პეკინის პოზიციასთან დაკავშირებით.

რუსეთის მუდმივი წარმომადგენელი: მოსკოვი გახსნილია დიპლომატიისთვის

ამასობაში, რუსეთის მუდმივმა წარმომადგენელმა გაეროში ვასილი ნებენზიამ კოლეგებს მოუწოდა, „გონს მოვიდნენ, თავიდან მოიცილონ ემოციები“ და არ გააუარესონ ვითარება. მისი თქმით, მოსკოვი კვლავაც გახსნილია დიპლომატიისთვის, თუმცა არ დაუშვებს დონბასში „ახალ სისხლიან სასაკლაოს“.

ზელენსკი: უკრაინა რჩება მშვიდობიანი გზით მოგვარების პრინციპზე

გაეროს უშიშროების საბჭოს სხდომის დაწყების წინ უკრაინის პრეზიდენტმა ვოლოდიმირ ზელენსკიმ ტელემიმართვაში განაცხადა, რომ რუსეთის ქმედებები უკრაინას ვერ შეაშინებს და ის რჩება კონფლიქტის მშვიდობიანი მოგვარების მომხრედ. „ჩვენ საკუთარ მიწაზე ვართ და არაფრის გვეშინია, ჩვენ არავის ვალი არ გვაქვს და არავის არაფერს მივცემთ“, – აღნიშნა ზელენსკიმ.

მანამდე, 21 თებერვალს პუტინმა ჯერ დონეცკისა და ლუგანსკის ოლქების „დამოუკიდებლობა“ აღიარა, ხოლო შემდეგ უკრაინის ამ ტერიტორიებზე რუსეთის ჯარის შეყვანის განკარგულება გასცა.

dw.de