„ქართული ოცნების“ ლიდერების, მათ შორის პრემიერ–მინისტრის განცხადებას, რომ საქართველო თავად ამბობს ევროკავშირის დახმარებაზე უარს საგარეო ვალის შემცირების მიზნით, მწვავედ აკრიტიკებს ექსპერტი გია ხუხაშვილი და ამბობს, რომ ევროკავშირის დახმარების შეჩერების გამო ინვესტორები საქართველოს მაღალი რისკის ზონაში გადაიყვანენ. ამის შესახებ ექსპერტი სოციალურ ქსელში წერს.
“ისინი კი არ გვიწყვეტენ, ჩვენ თვითონ ვამბობთ უარს”… და ვიღაცა პრევენციის მიზნით ნათქვამ ამ ერთუჯრედიან ქოცურ ვირეშმაკობას დაიჯერებს.
რეალურად, ევროკავშირის 75 მილიონიანი დახმარების შეჩერება ნიშნავს მინიმუმ ათჯერ მეტის დაკარგვას, რადგან ყველა პოტენციური ინვესტორი ამ ფაქტის გამო, საქართველოს გადაიყვანს მაღალი რისკის ზონაში და შეაჩერებს აქტივობას.
პოლიტიკურ შედეგებზე აღარაფერს ვამბობ“, – წერს გია ხუხაშვილი სოციალურ ქსელში.
შეგახსენებთ, რომ გუშინ, 30 აგვისტოს, „პალიტრანიუსის“ ეთერში, გადაცემა „დღის ნიუსრუმში“ „ქართული ოცნების“ თავმჯდომარე ირაკლი კობახიძემ განაცხადა, რომ ევროკავშირისგან მაკროფინანსური დახმარების მიღებას ფინანსური დატვირთვა აღარ აქვს, რადგან ეკონომიკური ზრდის შედეგად ბიუჯეტში დამატებით 1 მლრდ ლარის აკუმულირება მოხდა.
კობახიძის განცხადებას დღეს უკვე პრემიერ–მინისტრი ირაკლი ღარიბაშვილი უჭერს მხარს საკუთარი განმარტებებით:
„ნებისმიერი ინსინუაციის თავიდან აცილების მიზნით, გადაწყვეტილი გვაქვს, თავი შევიკავოთ ევროკავშირის სესხის მეორე ნაწილის აღებისგან“, - განაცხადა ირაკლი ღარიბაშვილმა და დასძინა – აღნიშნულის მთავარი მიზეზი ისაა, რომ ხელისუფლება საგარეო ვალის შემცირებას ცდილობს.
ევროკავშირი ძირითადი დონორი ორგანიზაციაა საქართველოში, რომელიც დამოუკიდებლობის აღდგენის დღიდან აქტიურად უჭერს მხარს ქვეყნის დემოკრატიულ, ეკონომიკურ და სოციალურ განვითარებას. 1992 წლიდან დღემდე ევროკავშირის ფინანსურმა დახმარებამ, მხოლოდ ორმხრივ ფორმატში, 2 მილიარდ ევროს გადააჭარბა.
საქართველოს საგარეო ვალის შესახებ
29 აგვისტოს მდგომარეობით, ბოლო ერთ თვეში სახელმწიფოს საგარეო ვალი 14 მლნ დოლარით შემცირდა. საქართველოს ფინანსთა სამინისტროს სტატისტიკის მიხედვით, 2021 წლის ივლისის მდგომარეობით, საქართველოს სახელმწიფო საგარეო ვალი 8,002 მლრდ დოლარს შეადგენს, ეს მაშინ, როდესაც ივნისში სახელმწიფო საგარეო ვალის მოცულობა 8,016 მლრდ დოლარი იყო.
8,002 მლრდ დოლარიდან მთავრობის საგარეო ვალდებულებები 7,521 მლრდ დოლარს შეადგენს, საქართველოს ეროვნული ბანკის - 481,496 მლნ დოლარს.
საქართველოს ფინანსთა სამინისტროს სტატისტიკის მიხედვით, სახელმწიფოს ყველაზე მსხვილი კრედიტორები არიან: აზიის განვითარების ბანკი (ADB); მსოფლიო ბანკის განვითარების საერთაშორისო ასოციაცია (IDA) და რეკონსტრუქციისა და განვითარების საერთაშორისო ბანკი (IBRD).
სახელმწიფოს მევალე საფინანსო ინსტიტუტები:
აზიის განვითარების ბანკი (ADB) – 1,757 მლრდ აშშ დოლარი
აზიის ინფრასტრუქტურის საინვესტიციო ბანკი (AIIB) – 184,706 მლნ აშშ დოლარი
ევროსაბჭოს განვითარების ბანკი (CEB) -3,203 მლნ აშშ დოლარი
ევროპის რეკონსტრუქციისა და განვითარების ბანკი (EBRD) - 236,232 მლნ აშშ დოლარი
ევროპის საინვესტიციო ბანკი (EIB) - 809,845 მლნ აშშ დოლარი
ევროგაერთიანება (EU) - 158,243 მლნ აშშ დოლარი
მსოფლიო ბანკი, რეკონსტრუქციისა და განვითარების საერთაშორისო ბანკი (IBRD) – 1,176 მლრდ აშშ დოლარი
მსოფლიო ბანკი, განვითარების საერთაშორისო ასოციაცია (IDA) - 874,581 მლნ აშშ დოლარი
სოფლის მეურნეობის განვითარების საერთაშორისო ფონდი (IFAD) - 32,930 მლნ აშშ დოლარი
საერთაშორისო სავალუტო ფონდი (IMF) – 215,013 მლნ აშშ დოლარი
სკანდინავიური გარემოსდაცვის საფინანსო კორპორაცია (NEFCO) - 2,361 მლნ აშშ დოლარი
რაც შეეხება ორმხრივ კრედიტორ ქვეყნებს, ჩამონათვალი ასეთია:
სომხეთი - 4,607 მლნ აშშ დოლარი
აზერბაიჯანი - 4,850 მლნ აშშ დოლარი
ავსტრია - 17,911 მლნ აშშ დოლარი
ჩინეთი - 464 ათასი აშშ დოლარი
საფრანგეთი - 557,485 მლნ აშშ დოლარი
გერმანია - 705,484 მლნ აშშ დოლარი
ირანი - 3,594 მლნ აშშ დოლარი
იაპონია - 199,569 მლნ აშშ დოლარი
ყაზახეთი - 6,464 მლნ აშშ დოლარი
ქუვეითი - 8,698 მლნ აშშ დოლარი
ნიდერლანდები - 244 ათასი აშშ დოლარი
რუსეთი - 34,649 მლნ აშშ დოლარი
თურქეთი - 9,406 მლნ აშშ დოლარი
თურქმენეთი - 211 ათასი აშშ დოლარი
უკრაინა - 24 ათასი აშშ დოლარი
ამერიკა - 15,094 მლნ აშშ დოლარი
უზბეკეთი - 26 ათასი აშშ დოლარი