„ჯამში, 22 მლნ დოლარზეა საუბარი, სადაც საქართველოს წილი, ფაქტობრივად, არის 70-დან 80%-მდე“, - ამის შესახებ „კრიპტო ბაზრის“ დამფუძნებელმა ავთანდილ კუჭავამ რადიო „პალიტრის“ ეთერში განაცხადა.
როგოც ცნობილი გახდა, Teslavideomedia.com-ი, რომელიც მომხმარებლებს გარკვეული ინვესტიციის სანაცვლოდ, თანხის გამომუშავებას სთავაზობდა, თანხებს აღარ გასცემს, რის შედეგადაც ათასობით მოთამაშემ ჩადებული ინვესტიცია ფაქტობრივად დაკარგა. ვინც არ იცის, Teslavideomedia.com-ის საშუალებით მომხმარებლებს თანხის გადახდის შემდეგ ვიდეოები უნდა ენახათ, რაშიც მათ სისტემა ანაზღაურებას აძლევდა. „ტესლა ვიდეო მედიის“ შემქმნელები, ამტკიცებენ, რომ ეს დროებითი, ტექნიკური ხარვეზია.
„მსგავსი პირამიდები, ყოველთვის ასე იქცევიან. თავიდან ვინც შემოდის, ისინი მოგებას იღებენ. შემდეგ ამ მოგებას ანდობენ თავის მეგობრებს, მეზობლებს, თუ ნათესავებს, ისინიც შემოდიან და სწორედ მათ ფული გაქვთ დამფუძნებლებს. ჩამოშლის ნაწილში, თუ შევხედავთ შემქმნელების მხრიდან, რა თქმა უნდა, არ ჩამოშლილა და კარგად მიდის საქმე, კარგად იმუშავა.
როდესაც ასეთ საქმეებს ვიძიებთ, სანამ დასკვნამდე მივალთ, ბევრ რამეს ვამოწმებთ, ფინანსურ ნაკადებს, თუ სად გადის თანხა, როგორ გადის და რა მომენტში წყვეტენ ისინი გადახდებს. რასაც წინა წლების გამოცდილება გვაჩვენებს, როგორც კი ასეთ გადახდები ჩერდება, მისი აღდგენის საშუალება აღარ არის. შესაბამისად, „ტესლა ვიდეო მედიაზე“ დღეს უკვე შეგვიძლია ვთქვათ, რომ ტყუილად დაელოდებიან ის ადამიანები, ვისაც უთხრეს, რომ ტრონის ქსელი გაჩერდა. მას ბოლო წლების განმავლობაში, მსგავსი არანაირი პრობლემა არ შექმნია. უბრალოდ, დროს იგებენ იმასთან დაკავშირებით, რომ ეს ფული კარგად გაიტანონ.
მეორე სცენარი, რაც შეიძლება მოხდეს, არის ის, რომ 2-3 დღით აღადგინონ, ადამიანებს აჩვენონ, რომ აი, უკვე აღდგა, ისევ დაიწყოს თანხის გაცემა და ამ დროს ისევ ახალი „იუზერები“ დაიმატონ. ეს არის კლასიკური პირამიდა, თაღლითური სქემა. ამბობენ, რომ მარტივად შეგიძლია ფულის შოვნა, ამ დროს, პირველად შესული ადამიანები იღებენ მოგებას, დანარჩენების აბსოლუტური უმრავლესობა აგებს. რაც მოხდა ჩვენს შემთხვევაში.
ჯამში 22 მლნ დოლარზეა საუბარი, სადაც საქართველოს წილი ფაქტობრივად, არის 70-დან80%-მდე“,- განაცხადა ავთანდილ კუჭავამ.
Google Trends-ის მონაცემებით, ეს ვებგვერდი მსოფლიოს მასშტაბით, ყველაზე პოპულარული საქართველოში იყო. Google Trends-ის თანახმად, საქართველოში ამ ვებგვერდის პოპულარობა 100 ქულით იყო შეფასებული, მაშინ როდესაც მეორე და მესამე ადგილებზე მყოფ სომხეთსა და აზერბაიჯანში მისი პოპულარობა 2 ქულით ფასდებოდა, მეოთხე პოზიციაზე მყოფ ყირგიზეთში კი 1 ქულით. შესაბამისად, ამ სისტემის მომხმარებელეთა უდიდესი ნაწილი სწორედ საქართველოდან იყო რეგისტრირებული.
ვებგვერდების სარეგისტრაციო სისტემის მიხედვით, Teslavideomedia.com-ი 2022 წლის 3 მარტს დარეგისტრირდა. აღსანიშნავია, რომ Teslavideomedia.com არავითარ კავშირში არ არის ილონ მასკის დაფუძნებულ, ავტომწარმოებელ ტესლასთან მიუხედად იმისა, რომ ლოგო და წარწერა სწორედ საერთაშორისო ბრენდს მოგაგონებთ.