საქართველოს ეროვნულმა ბანკმა საინვესტიციო ფონდებისა და მისი მმართველი ორგანოს წევრების მიმართ ფულის გათეთრებისა და ტერორიზმის დაფინანსების აღკვეთის ხელშეწყობის შესახებ საქართველოს კანონმდებლობის დარღვევისთვის, ფულადი ჯარიმის ოდენობის განსაზღვრის, დაკისრებისა და აღსრულების წესი დაამტკიცა, რომელიც ძალაში 15 დღეში შევა. 

აღნიშნული წესი, რომელიც მხოლოდ სებ-ის მიერ რეგისტრირებულ, ავტორიზებულ ან აღიარებულ ფონდებზე ვრცელდება, განსაზღვრავს ბანკის მიერ საინვესტიციო ფონდებისა და მისი მმართველი ორგანოს წევრების  მიმართ ფულადი ჯარიმის განსაზღვრის, დაკისრებისა და აღსრულების საკითხებს.

თუ ეროვნული ბანკი დაადგენს, რომ ფონდმა დაარღვია „ფულის გათეთრებისა და ტერორიზმის დაფინანსების აღკვეთის ხელშეწყობის შესახებ“ კანონი,საქართველოს ფინანსური მონიტორინგის სამსახურისა და  ფულის გათეთრებისა და ტერორიზმის დაფინანსების აღკვეთის ხელშეწყობასთან დაკავშირებით ეროვნული ბანკის მიერ გამოცემული სამართლებრივი აქტები, ეროვნული ბანკის შემოწმების/ზედამხედველობის შედეგად განსაზღვრული მოთხოვნები, წერილობითი მითითებები ან/და არ შეასრულა ფინანსური მონიტორინგის სამსახურის მითითებები, ეროვნული ბანკი უფლებამოსილია ფონდის ან/და მისი მმართველი ორგანოს წევრების მიმართ გამოიყენოს ამ წესით დადგენილი ფულადი ჯარიმები.

ფულადი ჯარიმა გადახდილი უნდა იქნეს დაჯარიმების შესახებ განკარგულების ჩაბარებიდან 30 კალენდარული დღის ვადაში.

დარღვევები იყოფა შემდეგ კატეგორიებად:

ა) განსაკუთრებით მძიმე დარღვევები, რომლის დადასტურების შემთხვევაშიც ჯარიმა 2 ათასი ლარიდან 7 ათას ლარამდეა.

ბ) მძიმე დარღვევები, რომელიც 500 ლარიდან 3 ათას ლარამდე ჯარიმას ითვალისიებს.

გ) ნაკლებად მძიმე დარღვევების შემთხვევაში კი ჯარიმა 100 ლარიდან 1 ათას ლარამდეა.

თუ ფონდის შემოწმების შედეგად კვლავ დაფიქსირდა ისეთი დარღვევა, რომლისთვისაც ფონდის მიმართ ერთხელ უკვე იყო გამოყენებული  ფულადი ჯარიმა ან/და გარკვეული დარღვევა (დარღვევები) ფონდისთვის ქმნის ფულის გათეთრებისა და ტერორიზმის დაფინანსების სისტემურ რისკს, ეროვნული ბანკი უფლებამოსილია ფონდი დააჯარიმოს 50 000 ლარის  ოდენობით ან/და გამოიყენოს კანონმდებლობით გათვალისწინებული სხვა ღონისძიებები.