„ონკოლოგიური მკურნალობისადმი პაციენტების ხელმისაწვდომობის გაზრდა რომ ხდება ეს ძალიან კარგია, მაგრამ ფაქტია წინასაარჩევნო პიარისთვის არის გამიზნული. ჯანდაცვის სამინისტროს მიდგომები არამარტო ამ მიმართულებით, არამედ სხვა მიმართულებითაც მხოლოდ წერტილოვანი ჩარევებია,“ - ამის შესახებ „კომერსანტს“ სამედიცინო ექსპერტმა სერგო ჩიხლაძემ მთავრობის ახალი პროგრამის შეფასებისას განუცხადა, რომელიც ონკოპაციენტებისთვის მკურნალობის ხელმწისაწვდომობის ზრდას ისახავს მიზნად.
როგორც ცნობილი გახდა, ონკოლოგიური პაციენტებისთვის მკურნალობისადმი ხელმისაწვდომობის გაზრდის ახალი პროგრამა ჯამში საქართველოს 40 ათასამდე პაციენტს შეეხება.
საყოველთაო ჯანდაცვის პროგრამის ფარგლებში სიმსივნის საწინააღმდეგო მედიკამენტების სია ფართოვდება და შესაბამისად, მედიკამენტებზე გამოყოფილი წლიური ლიმიტი 8 000 ლარით იზრდება.
ჩიხლაძის გაცხადებით, ამ პროგრამის ორი თვით ადრე გამოცხადება,წინასაარჩევნო აჟიოტაჯს უკავშირდება. მისივე თქმით, ონკოლოგიაში მთავარი პრობლემა არის ის რომ, ადამიანების უდიდესი ნაწილი მესამე-მეოთხე სტადიის შემთხვევაში მიდის ექიმთან სამკურნალოდ, რაც სიცოცხლის გარანტიას ვეღარ იძლევა, ამიტომ მნიშვნელოვანია დაავადების ადრეულ ეტაპზე გამოვლენა და მისი პრევენცია.
„იქნებ ბატონ პრემიერ-მინისტრს ვინმემ უთხრას, თუ რა არის ონკოლოგიაში პრობლემა. მკურნალობა არის პრობლემის ნაწილი, მაგრამ უდიდესი პრობლემა არის ის, რომ ადამიანების უდიდესი ნაწილი მესამე-მეოთხე სტადიის შემთხვევაში მიდის ექიმთან სამკურნალოდ. რაც არ უნდა ფული დაუმატო, მკურნალობა სიცოცხლის გარანტიას ვეღარ იძლევა და პრობლემა ზუსტად ეს არის, რომ ონკოლოგიური დაავადებების პრევენცია, ადრეული გამოვლენა და დიაგნოსტიკა არ ხდება. ჩვენი გუნდი მიიჩნევს, რომ მთლიანად უნდა იყოს ეს სფერო მოცული - პრევენცია უნდა იყოს პირველ ადგილზე, შემდეგ ადრეული დიაგნოსტიკა უნდა მოხდეს, რომ ადამიანი საწყის სტადიაში მიდიოდეს ექიმთან და გამოჯანმრთელების შანსი იყოს 100% და შემდეგ უკვე შორს წასული შემთხვევების მკურნალობა მოვლა, მათ შორის შინ მოვლა, პალეატიური მოვლა და ა.შ.“ - აღნიშნავს სერგო ჩიხლაძე.
მედიკოსის თქმით, ამ პროგრამაში არ უნდა იყოს ისეთი ბიუროკრატია, როგორიც სხვა შემთხვევებში და ხელმისაწვდომობა საქმით უნდა გამოიხატოს.
„არანაირი ბიუროკრატია აქ არ უნდა იყოს, რადგან ყოველ თვეს და კვირას მნიშვნელობა აქვს . აქაც თუ იგივე ბიუროკრატია იქნა, როგორც ორას ლარიანი სამას ლარიანი დახმარებების შემთხვევაში, ეს ყოვლად დაუშვებელია, ეს უნდა დაიწყოს მყისიერად და არ უნდა იყოს არანაირი ბარიერი.
არანაირი ბიუროკრატია არ უნდა იყოს, ადამიანს ერთი დღეც არ უნდა მოუწიოს დამატებით ბარიერების გავლა, შესაბამის პროგრამაში მონაწილეობის მისაღებად,“ - განმარტავს სერგო ჩიხლაძე.
გიორგი გახარიას თქმით, დღეს საქართველოს 1 972 მოქალაქე სარგებლობს ამ პროგრამით და მათთვის ეს იქნება უაღრესად მნიშვნელოვანი მხარდაჭერა იქნება. „ეს არის სახელმწიფოს მხარდაჭერა ადამიანებისთვის, რომლებიც მძიმე სენს ებრძვიან და რომლებიც შეძლებენ, სრული მკურნალობა მიიღონ სახელმწიფოს ხარჯზე“, – განაცხადა გიორგი გახარიამ.
თაკო კვაჭანტირაძე