2020 წლის სექტემბერში საქართველოში შემოსული ფულადი გზავნილების ნაკადების მოცულობამ 192.7 მილიონი დოლარი (611.4 მლნ ლარი) შეადგინა, რაც ქვეყანაში ერთი თვის განმავლობაში გადმორიცხული ფულადი გზავნილების რეკორდულ მოცულობას წარმოადგენს.
ეკონომიკის ექსპერტი ნიკა შენგელია „კომერსანტთან“ საუბრისას აცხადებს, რომ ფულადი გზავნილების ასეთი დიდი რაოდენობით ზრდა, ქვეყანაში არსებულ მძიმე სოციალურ-ეკონომიკურ პრობლემებთანაა დაკავშირებული. მისი თქმით, როდესაც პანდემიის ფონზე სხვა ქვეყნებთან შედარებით საქართველოს მთავრობა მოსახლეობას არ ეხმარება და უმუშევრობა იზრდება, ემიგრანტები ცდილობენ ოჯახის წევრებისთვის მაქსიმალურად დიდი რაოდენობის თანხების გადმორიცხვას.
„ცხოვრება გაძვირდა, ამას უმშევრობის ზრდაც დაემატა, მოსახლეობამ შემოსავალი დაკარგა და ახლა ემიგრაციაში წასული ოჯახის წევრი შიმშილით ხომ არ დახოცავს აქ მყოფ ახლობლებს, ამიტომ უფრო მეტ თანხას უგზავნის. შესაბამისად, აშკარაა, რომ ფულადი გზავნილების ზრდა იმის მანიშნებელია, რომ ქვეყანაში დიდი გაჭირვება და უმუშევრობაა.
ფულადი გზავნილების ასეთი რეკორდულად მაღალი მაჩვენებელი არამარტო სექტემბრის თვეში, არამედ აგვისტოშიც იყო, ეს უბრალოდ იმის მაჩვენებელია, რომ ქვეყანაში გაჭირვებაა, რომელსაც მთავრობა არ აღიარებს და ემიგრანტები, რომლებიც უცხოეთში არიან, ზრდიან ამ ფულის მასას, რადგან ოჯახის წევრები თუ კიდევ ვინმე, სადმე მუშაობდა ყველა უმუშევარი დარჩა, ამიტომ მაქსიმალურად ცდილობენ რომ მათ ხელი შეუწყონ. ასევე არის ერთი საკითხი, პანდემიის მეორე ტალღა მსოფლიოში ოფიციალურად დაიწყო, რამდენად შეძლებენ ემიგრანტები რომ მომავალშიც გააგრძელონ ასეთი მხარდაჭერა, პროგნოზირება რთულია, ფაქტობრივად ხდება ისე, რომ მხოლოდ ხალხი ზრუნავს ერთმანეთზე და მთავრობა არაფერს აკეთებს“, - აცხადებს ნიკა შენგელია.
მისი თქმით, მთავრობა რასაც მოქალაქეებს დაჰპირდა, თითქმის არაფერი შეასრულა, მათ შორის უმუშევრად დარჩენილების დახმარებიდან დაწყებული, ფასების შენარჩუნებით და დღგ-ს კომპანიებისთვის დაბრუნებით დამთავრებული.
„ფასები უკვე გაძვირებულია საწვავზე და გარკვეულ პროდუქტებზე, მაგრამ ამაზე არ აკეთებენ აქცენტს, თითქოს ეს ყველამ დაივიწყა და ისევ იწყება შეზღუდვები. შეზღუდვებით კი ეკონომიკურ მხარეს აზიანებენ, ისევ კაფეებს და რესტორანს ხურავენ, მაშინ როდესაც ბარები და სკოლები მუშაობენ. ამ პრობლემების ფონზე ისევ ემიგრანტების იმედადაა ხალხი დარჩენილი.
ემიგრანტების უმეტესობას მიღებული აქვს სტატუსი პოზიტივი, რომლებსაც ქვეყანა 1000 ევრომდე დახმარებას უხდის. თუ აქამდე ისინი თავის ოჯახის წევრებს უგზავნიდნენ 100 ევროს, ახლა უგზავნიან 200-ზე მეტ ევროს, რადგან საქართველოში პროდუქტი გაძირებულია და უმუშევრობა გაიზარდა, შესაბამისად გადმორიცხული დახმარებაც გაიზარდა“, - განმარტავს შენგელია.
აღსანიშნავია, რომ გზავნილების მოცულობით კვლავ რუსეთი ლიდერობს. ყველაზე მეტი ფულადი გზავნილი – 35,13 მლნ აშშ დოლარი მიმდინარე წლის სექტემბერში საქართველოში სწორედ რუსეთიდან შემოვიდა. მეორე ადგილზე, 29,21 მლნ აშშ დოლარით იტალიაა, შემდეგ მოდის აშშ – 22,65 მლნ აშშ დოლარით, მეოთხე ადგილზე 21,45 მლნ აშშ დოლარით საბერძნეთია, ხოლო მეხუთეზე ისრაელი – 13,98 მლნ აშშ დოლარით.