ბოლო წლების განმავლობაში იზრდებოდა მსოფლიო ეკონომიკა და იზრდებოდა ფულადი გზავნილების ბრუნვაც. ფულადი გზავნილების ქართული კომპანია „ინტელიექსპრესი“ სულ უფრო მეტ ქვეყანაში ხსნიდა მომსახურების ოფისებს, მის სისტემაში ჩართულია ყველა კომერციული ბანკი, რომელიც საცალო საქმიანობას ეწევა და ათამდე მიკროსაფინანსო ორგანიზაცია და საგადახდო მომსახურების პროვაიდერი. რაც შეეხება მსოფლიო მასშტაბებს, ინტელიექსპრესის საშუალებით დღეს ფულადი გზავნილების გაგზავნა და მიღება ევროპის, აზიის, აფრიკის, ჩრდილო და სამხრეთ ამერიკის 70-ზე მეტ ქვეყანაშია შესაძლებელი, უმეტესობა მათგანში საკუთარი ფილიალებითაა წარმოდგენილი, თუმცა „ინტელიექსპრესის“ სისტემით ოპერირებენ აგენტი ბანკები და ფინანსური ინსტიტუტები. 

„კომერსანტთან“ საუბრისას ინტელიექსპრესში აღნიშნავენ, რომ პანდემიამ და ფულადი გზავნილების უფრო მეტად გააქტიურებამ დისტანციური სერვისების გაუმჯობესება გამოიწვია, ამიტომ კომპანიამ 2021 წელს MASTERCARD-ის საერთაშორისო ბარათების გამოშვება დაიწყო.

„მიუხედავად იმისა, რომ ოპერირება გვიწევს პანდემიის პირობებში და მიმდინარე წელიც მრავალი გამოწვევით იყო სავსე ჩვენთვის 2021 წელი მაინც პროდუქტიული აღმოჩნდა. ინტელიექსპრესის გზავნილების მოცულობა საქართველოს მიმართულებით წინა წელთან შედარებით 30%-მდე გაიზარდა. ზრდა ძირითადად ევროკავშირის ქვეყნებზე, აშშ-ზე, უკრაინასა და დსთ ქვეყნებზე მოდის. დავიწყეთ გზავნილები ინდოეთის მიმართულებით. ინდოეთი ძირითადად გზავნილების მიმღები ქვეყანაა და მიმდინარე წლის მდგომარეობით იგი ამ კუთხით მსოფლიოში პირველ ადგილს იკავებს. ამიტომ, ჩვენთვის ძალიან მნიშვნელოვანია ამ ბაზარზე შესვლა. ინტელიექსპრესს აზიის მიმართულებით მრავალწლიანი, წარმატებული, გამოცდილება აქვს და ოპერირებს ისეთ ქვეყნებში როგორიცაა: ფილიპინები, ბანგლადეში, პაკისტანი, ნეპალი, ინდონეზია, შრი ლანკა. დავამატეთ ახალი ბანკი ფილიპინებში, დღეს უკვე გვყავს რვა პარტნიორი და ძალიან მოქნილ, ხელმისაწვდომ სერვისს ვთავაზობთ მომხმარებლებს. ფილიპინებში ფულადი გზავნილები ძირითადად ირიცხება ევროკავშირის ქვეყნებიდან და დიდი ბრიტანეთიდან. გავაფართოვეთ პარტნიორთა ქსელი მოლდოვაში, სადაც დავიწყეთ თანამშრომლობა ქვეყნის წამყვან კომერციულ ბანკთან - Moldova Agroindbank (maib).

გავხსენით ახალი ფილიალები როგორც საქართველოში: თბილისში, გორსა და ბათუმში, ისე საზღვარგარეთ: თურქეთში, იტალიასა და კვიპროსში. აქტიურად ვმუშაობთ დისტანციური სერვისების კუთხით. საბერძნეთში ჩვენსმომხმარებლებს უკვე შეუძლიათ ინტელიექსპრესის საშუალებით გახსნან ევროპული IBAN ანგარიშები და დისტანციურად ისარგებლონ ინტელიექსპრესის სერვისებით. უკრაინაში დავნერგეთ ბარათებსა და ანგარიშებზე ჩარიცხვის სწრაფი სერვისი. პირველები ვართ ვინც მსგავს სერვისს საქართველოდან უკრაინაში სთავაზობს მომხმარებელს. ასევე დავამატეთ ანგარიშზე ჩარიცხვის სერვისი ნეპალში, აღნიშნული სერვისით ყველაზე აქტიურად სარგებლობენ კვიპროსიდან თანხის ჩარიცხვისას.

ინტელიექსპრესი Mastercard-ის ძირითადი წევრია. მიმდინარე 2021 წელს დავიწყეთ Mastercard-ის საკრედიტო ბარათების გამოშვება. 2022 წელს კი ვგეგმავთ ბარათების მასშტაბურად შეთავაზებას მომხმარებლებისთვის. მისი გამოყენება შესაძლებელია საქართველოში და საზღვარგარეთ. ასევე ვგეგმავთ დისტანციური გადახდების სერვისის დანერგვას, რომლის საშუალებითაც ონლაინ იქნება ხელმისაწვდომი როგორც ფულადი გზავნილები, ისე სხვადასხვა ტიპის გადახდები და საბანკო ანგარიშზე ჩარიცხვა საზღვარგარეთ. ამასთან ვაგრძელებთ მუშაობას ქსელის გაფართოების კუთხით და ახალი მიმართულებების დამატებას“, — აღნიშნავს „ინტელიექსპრესის“ ბიზნესის განვითარების დეპარტამენტის ხელმძღვანელი ლევან თავართქილაძე.

ნინო თამაზაშვილი